Kalaallit Nunaanni sinerissap avataani sajuppillatsitsisarluni misissuinernut ilitsersuut: Avatangiisini suleriaatsinut pitsaanerpaanut (BEP),

Transcription

1 Kalaallit Nunaanni sinerissap avataani sajuppillatsitsisarluni misissuinernut ilitsersuut: Avatangiisini suleriaatsinut pitsaanerpaanut (BEP), Avatangiisinut Sunniutaasussanik Nalilersuinermut (ASN) aamma Suliniutinik Pitsaaliuisussanik Nalilersuinermut (SPN) malittarisassat 1

2 2 Imai 1 Aallaqqaasiut Ataatsimut isigalugu Avatangiisinut sunniutaasussanik nalilersuineq ASN Suliniutinik pitsaaliuisussanik nalilersuineq SPN Nipiliornernut pisuusaartitsineq Nipiliornerit nipitussusai naatsorsorneqartut Maannakkut nipiliornerit siammarsimaffii Sajuppillatsitsisarluni misissuinerit avatangiisinut suliniutit pitsaaliuisussat Pilersaarusiorneq Misissuinerpiaq Sumiiffik ilaatinneqartussaanngitsoq Pre-shooting atorlugu qinerneq Ramp-up Silaannarmut igeriuttakkanik igeriussinerup pilersaarutaanngitsumik uninnera Site-survey aamma Vertical Seismic Profiling (VSP) Silaannarmut igeriuttakkanik misileraaneq Narlumuinnaq aqqutini nikittarneq Nipinik alapernaarsuineq PAM-imik atuineq Imaani uumasunik miluumasunik aamma timmissanik imarmiunik alapernaarsuisut MMSO Sajuppillatsitsisarluni misissuinernut atatillugu sumiiffiit imaani uumasunut miluumasunut illersuiffiusut Uummasut immikkut malussarissuseqartut Sumiiffiit illersuiffiusut Qilalukkat qaqortat Qilalukkat qernertat Arfivik Aaveq Sumiiffiit niuernermik tunngaveqartumik aalisarfiusartut Innersuussutit Appendix

3 3 Eqikkaaneq Kalaallit Nunaata imartaanni sajuppillatsitsisarluni misissuinissanut avatangiisinut sunniutaasussanik nalilersuineq (ASN), pissutsit makkua ilaat ataaseq atuussimappat suliarineqassaaq: Scope-mut missingiutip oqartussaasunit nalilersorneqarnerani paasineqarpat annertuunik avatangiisinut sunniuteqarnissaa aarlerinaateqartoq. Sajuppillatsitsisarnermi aqqutigineqartussat sumiiffinnut matoqqasunut appakaatissappata. Sajuppillatsitsisarluni misissuinissaq piffissami ukiuunerani (decembarimiit juunip qiteqqunneranut) tamakkiisumik ilaannaasumilluunniit pisussatut pilersaarutigineqarpat. Sajuppillatsitsisarluni misissuinissaq Kalaallit Nunaata kitaani 77 N aamma Tunumi 74 N avannaanni ingerlanneqartussatut pilersaarutigineqarpat. Oqartussaasut scope-mut missingiummik nalilersuineranni inerniliisoqarpat, annertuumik avatangiisinut sunniinissaq aarlerinaateqanngitsoq, Suliniutinik Pitsaaliuisussanik nalilersuineq (SPN) suliarineqassaaq. Aalajangersakkat Sajuppillatsitsisarluni misissuinissaq pilersaarutaasoq pillugu scope-mut missingiut Aatsitassanik Suliassaqarfinnut Avatangiisinut Aqutsisoqarfimmi (EAMRA) tiguneqareersimassaaq misissuinissap pilersaarutigineqartup ingerlanneqarsinnaanissaani ukiup siuliani kingusinnerpaamik 1. december. ASN/SPN-mut nalunaarusiaagallartoq EAMRA-mi tiguneqareersimassaaq, ukioq taanna misissuinissamik pilersaaruteqarfiusumi 1. marts tikitsinnagu. ASN/SPN-mut nalunaarusiaq ilusiliamik sajuppillatsitsisarnerit nipiliornerisa siammarnissaanut naatsorsuutigisanik takutitsisumik imaqassaaq. Sajuppillatsitsisarluni misissuinerit arlallit nunap immikkoortuani ataatsimi pilersaarutigineqarpata, ilusiliaq ataatsimoorussaq nipiliornerit suminngaanneerfiinit tamaginnit nipiliornerit siammarnerannik ilaatitsiviusoq suliarineqassaaq. Ilusiliaq sumiiffinni toqqartorneqartuni aamma takussutissiinissamut naleqquttuni piffissap ingerlanerani nipiliornernik uuttortaanikkut uppernassusersineqassaaq. ASN/SPN-mut nalunaarusiaq avatangiisinik aqutsinermut pilersaarummik imaqassaaq. Imaani uumasut miluumasut nipiliornerinik iliuuseqarani alapernaarsuineq (PAM) mallernerata seastate 3 qaangersimappagu aammalu taartumi, isikkiviluttumi atorneqassaaq. PAM-imut atortut aammalu qanoq taakkua atorneqarnersut ASN/SPN-imut nalunaarusiami nassuiarneqassapput. Umiarsuarmi, sajuppillatsitsisarnerni nipiliortunik kalittumi imaani uumasunik miluumasunik aamma timmissanik imarmiunik alapernaarsuisut (MMSO-t) minnerpaamik sisamat ilaasorineqassapput. Taakkunannga marluk PAM-imik atuisutut misilittagaqarluartuussapput. Alapernaarsuisut ilitsersuut: Manual for Seabird and Marine Mammal Survey on Seismic Vessels in Greenland (Link) malissavaat. Sajuppillatsitsisarnermi igeriussineq aamma rampup atorlugu suleriaaseqarneq, sumiiffiup uumasunik illersuiffiusup 500 meteriusup iluani

4 4 imaani uumasunik miluumasunik soqanngitsoq MMSO-it qulakkeeriinngippassuk, aallartinneqarsinnaanngillat. Suliniutit pitsaaliuissutaasut Nunap qanoq sananeqaateqarneranik misissuinermi paasisassatut kissaatigineqartunut naleqqiullugu, nipitussuseq sapinngisamik nipikinnerpaaq toqqarneqassaaq. Nipiliornerit suminngaanneerfiannit nipit nipituut nipikillitinneqarnissaat, aammalu nipiliornerit siammarnerisa sammivilernissaat sulissutigineqassaaq. Sumiiffimmi suliaqarfiusumi imaani uumasunik miluumasunik peqarnera, akornusersuinernut immikkut malussarissuseqarnerat pingaartillugu, nalilersorneqassaaq. Silaannarmut igeriuttakkat taamaallaat sajuppillatsitsisarluni paasissutissanik katersinermi atoqqusaapput, tassani ilaanatik aqqutissat nikinneri imminnut qanittuaraappata ramp-up atorlugu suleriaaseqarneq aamma mitigation-gun atorneqartussaapput. Sajuppillatsitsisarluni paasissutissanik katersineq sapinngisamik isikkivigilluarnerani aallartinneqassaaq, taamaalilluni sumiiffiup aningaasarsiornermi killeqarfiusup iluani imaani uumasut miluumasut takuneqarsinnaanissaat ajornassanani. Sajuppillatsitsisarnermi silaannarmut igeriuttakkat atorneqartussaappata, ikinneqannginneranni aallartinneqannginnerannilu, pre-shooting atorlugu ujarlerneq ingerlanneqassaaq. Imaani itissutsini 200 meterinit ikkannerusuniittuni taanna nalunaaquttap akunneranik affarmik sivisussuseqassaaq, imaani itissutsini itinerusuniittuni taanna nalunaaquttap akunneranik ataatsimik sivisussuseqassalluni. Minutsit qulit inorlugit igeriussinerup unikkallartinneqarnerani tamanna taamaattoq pisariaqanngilaq. Taamaalereernermi taakkua suleriaaseq ramp-up atorlugu ikikkiartuaarneqassapput. Minutsit 20-it ingerlanerini qamutillip batteriiata nipitussusaa nipittoriartuaarneqassaaq. Minutsit qulit inorlugit igeriussinerup uninngatikkallarneqarneranni ramp-up pisariaqanngilaq aamma silaannarmut igeriuttagaq mikisoq ataasiinnaq atorneqarpat (annertussusaa < 10 inch 3 ). Silaannarmut igeriuttakkat batteriianut tunngatillugu igeriussiffissamut killeqarfik, batteriip qeqqaniit 500 meterinik kaajallallugu inissisimatinneqassaaq. Sajuppillatsitsinermi aqqutissamut igeriussinerup nalaani killeqarfiup taassuma iluani imaani uumasunik miluumasunik takusaqartoqarpat, imaani uumasoq miluumasup pineqartup igeriussiffissamut killeqarfiup avataanut pinissaata tungaanut, igeriussineq batteriimi igeriuttakkamut minnerpaamut (mitigation gun) annikillisinneqassaaq. Tamanna aamma ramp-up nalaani atuuppoq. Pre-shooting-imik ujarlernerup nalaani imaani uumasumik miluumasumik (nannut sikumiittut pinnagit) takusaqartoqarpat, ramp-up aallartinnissaanut piffissaq ujarlernerup iluani, uumasup killeqarfiup avataaniileqqinnerata kingorna, minutsinik 20-inik nikisinneqassaaq. Silaannarmut igeriuttakkap batteriia unippat, silaannarmut igeriuttakkamik minnerpaamik (mitigation gun) igeriussineq sapinngisamik ingerlateqqinneqassaaq. Silaannarmut igeriuttakkanik igeriussineq pilersaarutaanngitsumik unippat, imatut pisoqassaaq: Uninnganera minutsit 5-it inorlugit sivisussuseqarpat, silaannarmut igeriuttakkap batteriia tamakkiitillugu aallarteqqinneqassaaq.

5 5 Uninnganera minutsit 5-it aamma 10-it akornanniippat, igeriussiffissamut killeqarfimmi misissuineq ingerlanneqassaaq, aammalu tassani imaani uumasunik miluumasunik soqanngitsoq paasineqarpat, silaannarmut igeriuttakkap batteriia tamakkiitillugu aallarteqqinneqassaaq. Kisiannili killeqarfiup iluani imaani uumasumik miluumasumik takusaqartoqarpat, imaani uumasoq miluumasoq pineqartoq killeqarfiup avataaniilernerata kingorna minutsit 20-it utaqqisoqassaaq, aammalu taamaalinerani ramp-up aallartinneqarsinnaalissaaq. Uninnganeq minutsinit 20-init sivisunerusumik sivisussuseqarsimappat, silaannarmut igeriuttakkat batteriiat tamakkiitilerlugu nipittortinnissaa sioqqullugu pre-shooting-imi ujarlerneq aamma ramp-up ingerlanneqassapput. Uninnganeq tamaat MMSO-nik inissisimasoqarsimappat, aammalu piffissaq tamaat qinerlersimappata, pre-shooting-imi ujarlertitsineq ingerlanneqassanngilaq. Sajuppillatsitsisarnermi aqqutissaq nikisinneqarpat, aammalu piffissaq ingerlaarfiusoq aqqutissat taakkua marluusut akornanni nalunaaquttap akunneranik ataatsimik sivikinnerussasoq naatsorsuutigineqarpat, MMSO-nik inissisimasoqarpat, silaannarmut igeriuttagaq minnerpaaq (mitigation gun) igeriussilluni ingerlaannarsinnaavoq. Aqqutissat taakkua marluusut akornanni piffissaq ingerlaarfiusoq nalunaaquttap akunneranit ataatsimit sivisunerussasoq naatsorsuutigineqarpat, aqqutissaq siulleq naammassineqarpat batteriimi silaannarmut igeriuttakkat tamarmik qaminneqassapput, tamatumalu kingorna aqqutissap tulliata aallartiffigineqannginnerani pre-shooting-imi ujarlertitsineq aamma ramp-up ingerlanneqassapput. Sajuppillatsitsisarluni misissuereernerup kingorna, paasissutissat avatangiisinut tunngassuteqartut makkua, ukiumi sajuppillatsitsisarluni misissuinerup ingerlanneqarfiani decembari naatinnagu EAMRA-mut aamma ilisimatusarnikkut siunnersortinut nassiunneqassapput: MMSO-t nalunaarusiaat. Paasissutissat nalunaarsukkat MMSO-t katersorsimasaat. Nipiliornernik uuttortaanernit paasisat.

6 6 1 Aallaqqaasiut Sajuppillatsitsisarluni misissuinerit uuliasiorluni misissuinermut atatillugu ingerlanneqartussat, Aatsitassanut ikummatissanullu inatsit naapertorlugu, avatangiisinut sunniinerit killilersimaarnissaat pitsaaliornissaallu siunertaralugu, maleruagassiuunneqartussaapput. Aalajangersakkat nalinginnaanerusut uani MLSA Guidelines for application, execution and reporting of offshore hydrocarbon exploration activities (excluding drilling) in Greenland (Link) nassuiarneqarput. Scoping-imik suliaqarnerup ingerlaneranut atatillugu sajuppillatsitsisarluni ingerlatanit avatangiisinik annertuumik sunniinissaq aarlerinaateqartoq naliliisoqarpat, avatangiisinut maleruagassiinissamut sakkussaq pingaarnerpaaq tassaavoq Avatangiisinut sunniutaasussanik nalilersuineq (ASN). Avatangiisinut sunniinerit annikinnerusunut tunngassuteqartut naliliisoqarpat, Suliniutinik Pitsaaliuisussanik nalilersuineq (SPN) sakkussaavoq. Imaani uumasut miluumasut sapinngisamik annertunerpaamik mianersuunniarlugit, imaani sajuppillatsitsisarluni misissuinerit Kalaallit Nunaata imartaanni qanoq ingerlanneqassanersut, allakkiami tassani nassuiarneqarpoq, taamatullu ASN-imut imaluunniit SPN-mut nalunaarusiap imarisassaannut ilitsersuisoqarluni. Qinnuteqaateqavinnissaq sioqqullugu aallarniutaasumik scope-mut missingiut Aatsitassanik Suliassaqarfinnut Avatangiisinut Aqutsisoqarfimmut (EAMRA) nassiunneqartussaq aallaavigalugu, ingerlatassap pineqartup ASN-imut nassuiaateqarfigineqarnissaa imaluunniit SPN-mut nassuiaateqarfigineqarnissaa pisariaqarnersoq aalajangerneqartarpoq. Scoping-imut suliaqarnerup ingerlasarnera ilitsersuummi, Namminersorlutik Oqartussat nittartagaanni nassaarineqarsinnaasumi nassuiarneqarpoq (Link). Allakkiat taakkuninngalu suliarinninneq ASN-imut aamma SPN-mut nalunaarusianut tunngatillugu suliap ingerlanerani tamarmi tulleriinneri malillugit ilusiliaq 1-imi takutinneqarpoq. Kalaallit Nunaata imartaanni sajuppillatsitsisarluni misissuinerit pillugit siusinnerusukkut ilitsersuutaasumut naleqqiullugu makkuninnga allannguuteqartitsisoqarpoq: Siusinnerusukkut protection/saftety zones 200 aamma 500 meteriusut ilaatitsinnginnissamut killeqarfimmut 500 meterimut allanngortinneqarpoq, Canadami maleruagassiinermut assingusunngorlugu. Imaani uumasunut miluumasunut illersuinissamut killeqarfiit marluk assigiinngitsut killissalersorneqarneranni allannguuteqartitsineq. Umiarsuarmi sajuppillatsitsisartumi MMSO-t ilaasut amerlassusaat. Appendix 1-imi takussutissiaq alla (Takussutissiaq 5). Immikkoortut nassuiaaffiusut peerneqarput. Sajuppillatsitsisarluni misissuinermi pissutsit avatangiisini ajornartorsiutitaqarnerpaajusut imaani uumasunut miluumasunut (pingaartumik arferit) aamma aalisakkanut (aamma aalisarnermut) tunngassuteqarput - erseqqinnerusumik takuuk ikummatissiassanik ingerlataqarnissanut piviusunngortitsinermi avatangiisinut sunniutaasussanik nalilersuinermut aammalu Kalaallit Nunaanni imaani sumiiffinnut amerlanernut tunngassuteqartut (Link). Taamaattumik tassani sajuppillatsitsisarluni ingerlatanut maleruagassiuinermi ataatsimut isigalugu imaani uumasut miluumasut aamma aalisakkat/aalisarneq sammineqarput. Kalaallit Nunaanni imaani sajuppillatsitsisarluni misissuinerit nalinginnaasumik piffissami juunip qiteqqunneraniit novembarimut, sikoqarnerani pissutsit pitsaanerpaamiileraangata

7 7 ingerlanneqartarput. Sajuppillatsitsisarluni misissuinerit piffissap taassuma avataani ingerlanneqassappata, qanoq pisoqaraluarpalluunniit ingerlatassanut ASN suliarineqassaaq. Allakkiami tassani naalisaanerit aamma taaguutit atorneqartut: ASN = Avatangiisinut Sunniutaasussanik Nalilersuineq BAT = Best Available Technique takuuk immikkoortoq 2 BEP = Best Environmental Practice - takuuk immikkoortoq 2 BPT = Best Practicable Control Technology CTD = Ingerlaartitsisinnaassuseqarnera (Conductivity), Kissassuseq, Itissuseq (Imarpinnut paasissutissat nalunaarsukkat, sakkumik immikkuullarissumik katersorneqartartut) DCE = Nationalt Center for Miljø og Energi - DCE, Aarhus Universitet EAMRA = Aatsitassanik Suliassaqarfinnut Avatangiisinut Aqutsisoqarfik EMP = Avatangiisini aqutsinissamut pilersaarut (Environmental Management Plan) EEZ = Aningaasarsiornikkut akisussaaffeqarfinnut killeqarfik, (imaani akisussaaffeqarfimmut killeqarfik) GN = Pinngortitaleriffik IMO = International Maritime Organization (Link) ISO = International Organization for Standardization IUCN = International Union for Conservation of Nature (Link) JIP = International Association of Oil and Gas Producers Joint Industry Project JNCC = Joint Nature Conservation Committee, UK MARPOL = International Convention for the Prevention of Pollution from Ships (Link) MLSA = Aatsitassanut Ikummatissanullu Aqutsisoqarfik (The Mineral Licence and Safety Authority) MMSO =Imaani uumasunik miluumasunik aamma timmissanik imarmiunik alapernaarsuisut (Marine Mammal and Seabird Observer) MRA = Kalaallit Nunaanni ataatsimoortumik Aatsitassanut oqartussaasoq (Mineral Resource Authority) NORSOK = Uuliasiorluni suliaqartunut Norgemi malitassat aamma aalajangersakkat PAM = Passive Acoustic Monitoring, imaani uumasut miluumasut nipiliornerinik alapernaarsuineq SEIA = Piviusunngortitsinermi avatangiisinut sunniutaasussanik nalilersuineq (SMV) SPN = Suliniutinik Pitsaaliuisussanik Nalilersuineq VSP = Vertical Seismic Profile, sajuppillatsitsisarneq puilasuliami uuliasiorfiusumi eqqaanilu ingerlanneqartartoq.

8 8 2 Ataatsimut isigalugu Kalaallit Nunaanni sajuppillatsitsisarluni misissuineq nunani tamalaani suleriaatsinut pitsaasunut naapertuuttumik aammalu isumannaallisaanikkut avatangiisinullu tunngatillugu akuersaarneqarsinnaasumik ingerlanneqassaaq, tamannalu isumaqarpoq: Avatangiisinut sunniinerit annikillisinneqarnissaat siunertaralugu BAT (Best Available Technique), BEP (Best Environmental Practice) aamma BPT (Best Practicable Control Technology ) pillugit tunngaviusut malinneqassasut aammalu atorneqassasut (Link aamma fodnote 1 ). Nunani tamalaani maleruagassat, ilitsersuutit aamma nunani tamalaani isumaqatigiissutit tamarmik avatangiisini pissutsinik ilanngussiviusut malinneqassasut, ilanngullugit MARPOL-imi isumaqatigiissut (Annex IV aamma V), IMO (imeq oqimaaloqutaq), OSPAR-imi isumaqatigiissut, NORSOK, ISO il.il. Avatangiisinut suliassaqarfimmi nunami namminermi maleruagassat ilitsersuutillu tamarmik malinneqassasut, ilanngullugu Sumiiffiit uumasunut pingaaruteqartut pillugit maleruagassat (Link). Uulia ikummatissaq umiarsuarni maskiinanilu ingerlatanut attuumassuteqartunut atorneqartoq tassaassaaq diesel/gasolie, annerpaamik 1,5 %-imik ikummarsaammik akoqartoq (oqimaassusaa aallaavigalugu), akua taanna MARPOL-imi maleruagassiineq naapertorlugu ulloq 1. januar 2020 nallertinnagu 0,5 %-imik appartussaq. Immap naqqanut inissinneqartut arrortinneqarsinnaanngitsut tamarmik ingerlatat naammassereerneranni peerneqassasut. EAMRA-p taassumalu ilisimatusarnikkut siunnersortaasa sulianik suliarinninnerup nalaani amigaataasut aamma qulequttat annertunerusumik paasinarsitinneqartussaasinnaasut tikkuartortassagai, tassunga malitassat aamma naliusunut killissaliussat malinneqartussat eqqumaffigeqquneqartarnissat ilaatinneqarluni. 1 OSPAR-imi isumaqatigiissummi Appendix 1-imi BAT nassuiarneqarpoq, tassaasoq silaannarmut aniatitsinerup, immamut kuutsitsinerup killilersimaarnissaa aamma eqqakkat amerlassusaasa killilersimaarnissaat siunertaralugu sulianik ingerlatitsinerup, atortorissaarutit, periaatsit aamma teknikkit iluanni nutaaliaanerpaaq; aamma BEP tassaasoq, avatangiisinut suliassaqarfimmi periaatsinik pitsaanerpaanik aamma nakkutiginninnermut iliuusissanik atuinermi pitsaanerpaasoq. Oqaatsit ineriartortinneqartuarput aammalu piffissap ingerlanerani teknologiip siuariartornerata, aningaasaqarnikkut inooqatigiinnikkullu pissutsit malitsigisaannik aammalu avatangiisit pillugit ilisimasat paasisimasaqarnerullu pitsanngoriartornerisa malitsigisaanik allanngoriartussallutik.

9 3 Avatangiisinut sunniutaasussanik nalilersuineq ASN 9 Pissutsit makkua naammassineqarsimappata ASN suliarineqassaaq: Scope-p nalilersorneqarnerani paasinarsippat, avatangiisinik annertuunik sunniinerit pisinnaasut. Sajuppillatsitsisarnermi aqqutissatut pilersaarutigineqartut sumiiffinnut matoqqasutut toqqarneqarsimasunut qalleraappata. Misissuineq ukiuunerani ingerlanneqassasoq pilersaarutigineqarpat (decembarimiit juunip qeqqanut). Misissuinerup Kalaallit Nunaata kitaata avannaani 77 N-imi aamma Tunup avannaani 74 N-imi ingerlanneqarnissaa pilersaarutigineqarpat. ASN-imi: Sajuppillatsitsisarluni suliassap pilersaarutigineqartup immikkoortuini tamaginni suliaqarnerup malitsigisaanik avatangiisinut, sunniinerusinnaasut paasinarsisinneqassapput, nalilersorneqassapput paasissutissiissutigineqassallutillu. Sumiiffik sunnerneqarsinnaasutut aarlerinaateqartoq tamaat ilaatinneqassaaq, pingaartumik nipiliortitsiviusussaq. Avatangiisinik sunniisinnaanerit ilimanaateqarnerat aammalu sunniinerit avatangiisinut kinguneqarsinnaasut nassuiarneqassapput nalilersorneqassallutillu. Avatangiisinut sunniinerit qanoq paasinarsitinneqartarnersut, aammalu sunniinerit pitsaaliorniarlugit pakkersimaarniarlugillu suliniutit suut aallartinneqarniarnersut nassuiarneqassapput. Avatangiisinut, pinngortitamut, uumasunut taassumalu inunnit atorneqarneranut (aalisarneq piniarnerlu) tunngatillugu pissutsit attuumassuteqartut tamaasa imarissavai. Ingerlatat pilersaarusiornerup ingerlanerani annertuumik allanngortinneqarpata nutarterneqassaaq. Ilusiliamik sajuppillatsitsisarnernit nipiliortunit nipiliornerit siaruarsinnaanerisa naatsorsuutigineqartup nassuiarneqarneranik takorloorneqarneranillu imaqassaaq. PAM-imi periaaseq toqqarneqarsimasoq nassuiarneqassaaq aammalu imaani uumasunik miluumasunik assigiinngitsunik paasiniaanermut atatillugu taassuma piginnaasaqarnera uppernarsarneqassalluni. Kalaallisut, danskisut tuluttullu tunniunneqassaaq. ASN-ip imarissavai: Tekniskiunngitsumik eqikkaaneq annertusisaq ilusilianik ilaqartinneqartoq takussutissiartaqartorlu. Taanna aamma innuttaasunut soqutiginnittunut aalajangiisartunut atuaruminartuussaaq paasiuminartuussallunilu, aammalu ASNimut nalunaarusiarpiamut attuumassuteqartinnagu atuarneqarsinnaassalluni paasineqarsinnaassallunilu. Aallaqqaasiut ingerlatassamik, taassuma siunertaanik tunngavianillu naatsumik nassuiaaffiusoq. Avatangiisit ingerlatassat sioqqullugit qanoq isikkoqarnersut nassuiaat. Sajuppillatsitsisarluni suliassap aallartinneraniit naammassineranut immikkoortuni tamaginni sukumiisumik nassuiarneqarnera, ilanngullugit nipiliortitsisunut aamma tusarnaarnermut atortunut teknikkikkut paasissutissat.

10 10 Ajornartorsiutinut assigiinnut allatut aaqqiissutissat, aammalu taakkua atorneqannginnerannut tunngavilersuutaasoq. Avatangiisinut sunniisinnaanernik taakkualu avatangiisinut sunniutissaannik nalilersuineq. Avatangiisinut tunngatillugu aqutsinissamut pilersaarut (Environmental Management Plan, EMP), tassani avatangiisinut sunniinerit allat sajuppillatsitsisarnernit nipiliortunit allaanerusut qanoq pitsaaliorneqassanersut nakkutigineqassanersullu, aammalu naatsorsuutigineqariinngitsumik pisut (ikuallarneq, avatangiisinut kuutsitsinerit assigiinngitsut il.il.) qanoq passunneqassanersut nassuiarneqassalluni. Eqqagassalerinermut pilersaarut. Inerniliinerit. Najoqqutarisanut, oqaasertaanni issuarneqartunut innersuussutit. Naalisaanernut aamma suliap taaguutaannut allattuiffiit nassuiaatillu. Takussutissiat Appendix 1-imiittut tallimat immersorlugit. ASN-imi sajuppillatsitsisarluni misissuineq nunani tamalaani suleriaatsinut pitsaasunut (avatangiisinut suliassaqarfimmi) naapertuuttoq, isumannaallisaaneq pitsaanerpaajusoq aammalu avatangiisinut tunngatillugu akuersaarneqarsinnaasoq uppernarsarneqassaaq, tassunga ilanngullugit: BAT, BEP kiisalu BPT suliassap ingerlanneqarnera tamaat aammalu ingerlatani tamaginni atorneqassapput. Maskiinanit, eqqagassalerinermit il.il. kuutsitsinerni/aniatitsinerni pujuliortitsinernilu nunani tamalaani maleruagassat, ilitsersuutit, isumaqatigiissutit aamma nunani tamalaani isumaqatigiissutit (IMO-mi, ilanngullugit imeq oqimaalutassaq pillugu nunani tamalaani isumaqatigiissut, MARPOL, OSPAR il.il.) tamarmik malinneqassapput. Avatangiisini pissutsinik passussineq nakkutiginninnerlu ISO14001-mi malittarisassat malillugit ingerlanneqassapput. Pingaarnertigut isigalugu sajuppillatsitsisarluni ingerlatassat avatangiisini pinngortitamilu pissutsinik (sumiiffiit, uumasut) aporaaffeqarsinnaanersut, sunniinerusinnaasut aammalu sunniinerit taakkua pitsaaliortinnissaat siunertaralugu suliniutissatut siunnersuutit ASN-imi sammineqartarput. Nalilersuinermi aamma sunniinerit tamakkiisut ilaatinneqassapput, taamaalilluni eqqaani sajuppillatsitsisarluni misissuinernik allanik ingerlatsisoqarpat, ingerlatsisoqarsimappat imaluunniit tamatuma kingorna ingerlatsisoqassappat, ataatsimut katillugit sunniinerit tamakkiisut ilaatinneqassallutik, aamma ingerlatanik allanik akornusersuisartunik, soorlu assersuutigalugu aalisarnermut, ingerlatsisoqarsimappat tamanna atuutissaaq. Nunataanut ilisimasat nalinginnaanerusut aammalu attuumassuteqanngitsut, soorlu assersuutigalugu nunami uumasunik miluumasunik timmissanillu peqarnersoq, ilanngunneqassanngillat. Kissaatigineqarpat piviusunngortitsinermi avatangiisinut sunniutaasussanik nalilersuineq attuumassuteqartoq innersuussutigineqarsinnaavoq (piviusunngortitsinermi avatangiisinut sunniutaasussanik nalilersuinernut Link). ASN-imut nalunaarusiami aaqqiissutissat sajuppillatsitsisarluni ingerlatanit sunniinissanik pitsaaliuisinnaasut nassuiarneqassapput. Tassaasinnaapput nipiliornernik nipikillititsinerit, nipiliortup aalajangersimasumik sammiveqartinnerulernera, nipinik nipituunik nipikillititsinerit, pilersaarusioqqissaarneq, taamaalillunilu uumasunut immikkut

11 11 malussarissuseqartunut qalleraannerit pinngitsoortinneqassallutik aammalu ingerlatanut allanut (sajuppillatsitsisarnerit, aatsitassarsiorluni misissuinermi qillerinerit, aalisarneq, umiarsuit angallannerat il.il.) ataqatigiissaarneqassallutik. ASN-imut nalunaarusiami PAM-imi periaaseq toqqarneqartoq nassuiarneqassaaq aammalu siunertaasoq malillugu atorsinnaasoq uppernarsarneqassalluni. PAM-imi periaatsimik atuineq nassuiarneqassaaq qanoq akulikitsigisumik aamma pisuni suni atorneqassanersoq. Nipiliorsinnaassusaa nassuiarneqassaaq, ilanngullugu periaatsip malussarissusaa (clip level) aammalu periaatsip piginnaaneqarneranut, immami nipiliorneranut aammalu silaannarmut igeriuttakkanit nipiliornermut naleqqiullugu suliaqarnermi ingerlanermini isorartussutsit annguffigisassai. Sajuppillatsitsisarluni ingerlatassanut ASN-imi pingaaruteqartunut ilaasoq tassaavoq, imaani avatangiisini avatangiisuni nipiliornissaanut naatsorsuutigisat siammarsinnaassusaannik pisuusaartitsineq. Pisuusaartitsineq taanna periaatsit nutartikkat atorlugit ingerlanneqassaaq aammalu avatangiisit avatangiisut pillugit ilisimasat sukumiisut tunngavigineqassallutik. Ilusiliinermi nipiliortumit piviusorsiortumik ungasissusilimmi uuttortaaviusut arlallit attuumassuteqartut ilaatinneqassapput. 20 km angullugit ungasissusilimmi minnerpaamik 48 khz angullugu, aamma 20 km-it sinnerlugit ungasissusilimmi 20 khz angullugu akulikissuseqartitsinerit ilaatinneqassapput. Takuuk erseqqinnerusumik immikkoortoq 5-imi allassimasut. Kalaallit Nunaanni pitsaaliuissutitut suliniutinut aallartinneqartussanut Tuluit Nunaanni maleruagassiinerit (Joint Nature Conservation Committee (takuuk JNCC 2010, Link) annertuumik isumassarsiorfigineqarput. Taamaattoq annertunerusunik maleruagassaqarpoq Kalaallit Nunaanni malinneqartussanik, taamaattumik JNCC-mi ilitsersuummuinnaq (imaluunniit pitsaaliuissutitut suliniutini nunami namminermi ilitsersuutinut allanut) innersuussinissaq naammanngilaq. ASN-imut nalunaarusiaagallartoq Namminersorlutik Oqartussat nittartagaanni tamanut saqqummersinneqassaaq aammalu sapaatit akunnerini 8-ini tamanut ammasumik tusarniaassutigineqassalluni. Taanna iluarsaanneqareernerata kingorna Naalakkersuisuni suliarineqarnissaa siunertaralugu EAMRA-mit taassumalu ilisimatusarnikkut siunnersortaannit nalilersorneqassaaq. ASN-imik suliaqarnermut piffissap ingerlanera imatut isikkoqarpoq (aamma takuuk Ilusiliaq 1). Scope-mut missingiut EAMRA-mit tiguneqareersimassaaq, ingerlatassat ingerlanneqarnissaat sioqqullugit ukiup siuliani kingusinnerpaamik ulloq 1. december. 15. decembari tikitsinnagu EAMRA-p (ilisimatusarnermut siunnersortit peqatigalugit) nalilersussavaa, scope-mut missingiut ingerlatassanut siunnersuutigineqartunut ASN-imik imaluunniit SPN-mik malitseqartinneqassanersoq. Tamatuma kingorna ingerlatseqatigiiffik qinnuteqartoq nalunaarfigineqassaaq aammalu scope-mut missingiummut oqaaseqateqarfigineqarsinnaalluni, kiisalu aamma sumiiffimmi tassani ingerlatseqatigiiffinnik allanik sajuppillatsitsisarluni misissuinissamik pilersaaruteqartoqarnersoq nalunaarfigineqarsinnaalluni. ASN pisariaqarpat, scope-mut missingiut naammassisaq ulluni 35-ini piareersaataasumik tusarniaassutigineqarluni nassuinneqassaaq. Piareersaataasumik tusarniaareernerup taassuma kingorna ingerlatseqatigiiffik itisiliiffiusumik nalunaarusiamik suliaqassaaq, tassani oqaaseqaatit

12 piareersaataasumik tusarniaanerup nalaani tiguneqartut aammalu taakkua qanoq isummerfigineqarnersut oqaaseqarfigineqassallutik. Taakkua allannguinernik malitseqarsinnaapput, taamaalillunilu scope naammassillugu suliarineqarsinnaalissaaq. Tamatuma kingorna ASN-imut nalunaarusiaagallartoq ingerlatassap ingerlanneqarluni ukiup aallartiffissaani 1. marts tikitsinnagu EAMRA-mut nassiunneqassaaq. ASN-imut nalunaarusiaagallartoq taanna imarisassaannut piumasaqaatit naammassineqarsimanersut paasinissaa siunertaralugu sukkasuumik EAMRA-mit nalilersorneqassaaq. Tamatuma kingorna ASN-imut nalunaarusiaagallartoq sapaatit akunnerini 8-ini tamanut ammasumik tusarniaassutigalugu nassiunneqassaaq, tassani tamanut ammasumik innuttaasunik ataatsimiititsinerit ilaatinneqarsinnaallutik. Tusarniaanerup ingerlareernerani ingerlatseqatigiiffik nalunaarusiamik itisiliiffiusumik nutaamik suliaqassaaq, tassani oqaaseqaatit tiguneqartut aamma taakkununnga qanoq isummernerluni nassuiarneqassalluni. Pisariaqarpat ASNimut nalunaarusiaagallartumi allannguuteqartitsinerit suliarineqassapput aammalu ASN-imut naammassisamut missingiut itisiliiffiusumik nalunaarusiamut ilanngullugu nassiunneqassalluni. Tamatuma kingorna Naalakkersuisunut saqqummiussinissaq suliarinninnissarlu siunertaralugit EAMRA-mit (aamma ilisimatusarnikkut siunnersortinit) nalilersorneqassapput. 12

13 Ilusiliaq 1. Kalaallit Nunaata imartaanni sajuppillatsitsisarluni misissuinissanut ASN/SPNmik suliaqarnerup ingerlanerani piffissap ingerlasarnera. Kipparissuni allakkiat allanneqarput, aammalu kipparissut ulamertumik teqeqqulinni suliap ingerlaneri allanneqarlutik. 13

14 14 4 Suliniutinik pitsaaliuisussanik nalilersuineq SPN Sajuppillatsitsisarluni misissuinissamit pilersaarutigineqartumit avatangiisinut sunniinerit annikitsuinnaassasut Scope-mut missingiummik nalilersuinerup takutippagu, ingerlatseqatigiiffik qinnuteqaateqartoq Suliniutinik pitsaaliuisussanik nalilersuinermik (SPN) suliaqassaaq. Allakkiaq taanna tassaavoq Avatangiisinut nalilersuineq (ASN) annikillisaq, tassani suliniutit avatangiisinik sunniinissanik, pingaartumik imaani uumasunut miluumasunut, pitsaaliuissutaasussat pakkersimaarisussallu pilersaarutigineqartut sammineqassallutik. SPN-mut nalunaarusiammi Sajuppillatsitsisarnermut atortut silaannarmut igeriuttakkat (najoqqutarisat sakkortussusaat, annertussusaat) aamma kabelit tusarnaarutit teknikkikkut piginnaasaqarneri, taakkualu pillugit paasissutissat saqqummiunneqassapput. Imaani uumasunut miluumasunut sunniinerit pakkersimaarniarlugit qanoq iliortoqassanersoq nassuiarneqassaaq. Ingerlatassat pilersaarusiornerup nalaani annertuumik allanngortinneqarpata nutarterneqassaaq. Ilusiliami sajuppillatsitsisarnerit nipiliortuinit nipiliornerit siammarnissaat naatsorsuutigineqartoq nassuiarneqassapput takorloorneqassallutillu (takuuk matuma kingulianiittoq). PAM-imi periaaseq toqqarneqartoq nassiuarneqassaaq aammalu imaani uumasunik miluumasunik assigiinngitsunik suussusersiisarnermut atatillugu piginnaasai uppernarsarneqassallutik. Kalaallisut, danskisut tuluttullu tunniunneqassaaq. SPN-mut nalunaarusiap imarissavai: Eqikkaaneq tekniskiunngitsoq annertusisaq ilusiliartaqartoq takussutissiartaqartorlu. Taanna innuttaasunut soqutiginnittunut aamma aalajangiisartunut atuaruminartuussaaq paasiuminartuussallunilu, aammalu ASNimut nalunaarusiarpiamut attuumassuteqartinnagu atuarneqarsinnaassalluni paasineqarsinnaassallunilu. Aallaqqaasiut naatsumik ingerlatassamik, taassuma siunertaanik tunngavigisaanillu nassuiaaffiusoq. Sajuppillatsitsisarluni suliassap aallartinneraniit naammassineranut immikkoortui tamaasa ilanngullugit nassuiarneqarnera, ilanngullugit nipiliortuinut paasissutissat teknikkimut tunngasut aamma tusarnaarnermut atortut. Avatangiisinut sunniinissanik naatsorsuutigineqartunik nalilersuineq. Nipiliortunit avatangiisinut sunniinerit pakkersimaarniarlugit qanoq iliortoqarniarnersoq nassuiaaneq. Avatangiisini aqutsinissamut pilersaarut (Environmental Management Plan, EMP), tassani avatangiisinut sunniinerit allat sajuppillatsitsisarnermi nipiliortunit allaanerusut qanoq pitsaaliorneqarniarnersut nakkutiginiarneqarnersullu, aammalu naatsorsuutigeriinngisamik pisut (ikuallanneq, avatangiisinut kuutsitsinerit assigiinngitsut il.il.) qanoq passunneqarniarnersut nassuiarneqassalluni. Eqqagassalerinermut pilersaarut. Inerniliinerit.

15 15 Oqaasertani najoqqutarisanut issuarneqartunut innersuussutit. Naalisaanernik suliaqarnermilu taaguutinut nassuiaatinut allattuiffiit. Takussutissiat Appendix 1-imiittut tallimat immersorlugit. SPN-mi sajuppillatsitsisarluni misissuineq, nunani tamalaani suleriaatsinut pitsaanerpaanut (avatangiisinut suliassaqarfimmi) naapertuuttumik suliarineqartoq, isumannaallisaaneq pitsaanerpaajusoq aammalu avatangiisinut tunngatillugu akuersaarneqarsinnaasoq uppernarsarneqassapput, taakkununnga ilanngullugit: BAT, BEP aamma BPT suliassap ingerlanneqarnera tamaat aammalu ingerlatani tamaginni atorneqassasut. Maskiinanit, eqqagassalerinermit il.il. aniatitsinerni kuutsitsinernilu aamma pujuliornerni nunani tamalaani maleruagassat, ilitsersuutit, isumaqatigiissutit aamma nunani tamalaani isumaqatigiissutit (IMO-mi, ilanngullugit imermut oqimaaloqutaasussamut nunani tamalaani isumaqatigiissut, MARPOL, OSPAR il.il.) tamarmik malinneqartut. Avatangiisini pissutsinik passussineq nakkutiginninnermi ISO14001-mi malitassat malillugit ingerlanneqassasoq. Pingaarnertigut isigalugu avatangiisinut sunniinissat naatsorsuutigineqartut annikillisinniarlugit pitsaaliorniarlugillu qanoq iliortoqarniarnersoq sajuppillatsitsisarluni ingerlatassanut SPN-mi nassuiarneqassaaq. SPN-mut nalunaarusiami sajuppillatsitsisarluni ingerlatanit sunniinernik pitsaaliuinissamut suliniutinut toqqaannartumik aaqqiissutissat nassuiarneqassapput. Tassaasinnaavoq nipiliornerit nipikillisinneqarnissaat, nipiliornerit sammiveqarnerutilernissaat, nipit nipituut nipikillisinneqarnissaat, pilersaarusioqqissaarneq, taamaalilluni uumasunut immikkut malussarissuseqartunut qalleraannerit pinngitsoortinneqassallutik aammalu ingerlatanut allanut (sajuppillatsitsisarnerit, aatsitassarsiorluni misissuinermi qillerinerit, aalisarneq, umiarsuit angallannerat il.il.) ataqatigiissaarinikkut. Appendix 1-imi takussutissiat tallimat immersorneqassapput aammalu SPN-mut nalunaarusiami ilaatinneqassallutik SPN-mut nalunaarusiami PAM-imut periaaseq toqqarneqartoq nassuiarneqassaaq aammalu siunertaasut malillugit atorneqartoq uppernarsarneqassalluni. PAM-imut periaatsip atorneqarnera nassuiarneqassaaq qanoq akulikitsigisumik aammalu pisuni suni atorneqartarnersoq. Nipiliorsinnaassusaa nassuiarneqassaaq, ilanngullugu periaatsip malussarissusaa (clip level) aammalu periaatsip piginnaaneqarneranut, immami nipiliorneranut silaannarmullu igeriuttakkanit nipiliornermut naleqqiullugu suliaqarluni ingerlanermini isorartussutsit annguffigisassai (dynamic range). Sajuppillatsitsisarluni ingerlatassanut SPN-mi pingaaruteqartunut ilaasoq tassaavoq, imaani avatangiisini avatangiisuni nipiliornissaanut naatsorsuutigisat siammarsinnaassusaannik pisuusaartitsineq. Pisuusaartitsineq taanna periaatsit nutartikkat atorlugit ingerlanneqassaaq aammalu avatangiisit avatangiisut pillugit ilisimasat sukumiisut tunngavigineqassallutik. Ilusiliinermi nipiliortumit piviusorsiortumik ungasissusilimmi uuttortaaviusut attuumassuteqartut arlallit ilaatinneqassapput. 20 km angullugit ungasissusilimmi minnerpaamik 48 khz angullugu aamma 20 km sinnerlugu ungasissusilimmi 20 khz angullugu akulikissuseqartitsinerit ilaatinneqassapput. Takuuk erseqqinnerusumik immikkoortoq 5-imi allassimasut.

16 16 Kalaallit Nunaanni pitsaaliuissutitut suliniutinut aallartinneqartussanut Tuluit Nunaanni maleruagassiinerit (Joint Nature Conservation Committee (takuuk JNCC 2010, Link) annertuumik isumassarsiorfigineqarput. Taamaattoq annertunerusunik maleruagassaqarpoq Kalaallit Nunaanni malinneqartussanik, taamaattumik JNCC-mi ilitsersuummuinnaq (imaluunniit pitsaaliuissutitut suliniutini nunami namminermi ilitsersuutinut allanut) innersuussinissaq naammanngilaq. SPN-mut nalunaarusiaagallartoq Namminersorlutik Oqartussat nittartagaanni tamanut saqqummersinneqassaaq aammalu sapaatit akunnerini 8-ini tamanut ammasumik tusarniaassutigineqassalluni. Taanna iluarsaanneqareernerata kingorna EAMRA-mit taassumalu ilisimatusarnikkut siunnersortaannit nalilersorneqassaaq. SPN-mik suliaqarnermut piffissap ingerlanera imatut isikkoqarpoq (aamma takuuk Ilusiliaq 1). Scope-mut missingiut EAMRA-mit tiguneqareersimassaaq ingerlatassat ingerlanneqarnissaat sioqqullugit ukiup siuliani kingusinnerpaamik ulloq 1. december. Tamatuma kingorna EAMRA-p (ilisimatusarnermut siunnersortit peqatigalugit) nalilersussavaa scope-mut missingiut ingerlatassanut siunnersuutigineqartunut ASN-imik imaluunniit SPN-mik malitseqartinneqassanersoq aammalu taassuma inernera 15. decembari nallertinnagu qinnuteqartumut nalunaarutigineqassaaq, taamatullu ingerlatseqatigiiffinnik allanik sumiiffimmi tassani sajuppillatsitsisarluni misissuinissamik pilersaaruteqartoqarpat, tamanna eqqumaffigeqquneqassalluni. SPN-mut nalunaarusiaq pineqarpat SPN suliaagallartoq ingerlatassap ingerlanneqarfissaani ukiumi 1. marts nallertinnagu EAMRA-mut nassiunneqassaaq. SPN-mut nalunarusiaagallartoq taanna imarisassaannut piumasaqaatit naammassineqarsimanersut paasinissaa siunertaralugu, sukkasuumik EAMRA-mit nalilersorneqassaaq, tamatumalu kingorna sapaatit akunnerini 8-ni tamanut ammasumik tusarniaassutigalugu nassiunneqassalluni. Tusarniaanerup ingerlareernerani ingerlatseqatigiiffik itisiliiffiusumik nalunaarusiamik suliaqassaaq, tassani oqaaseqaatit tiguneqartut aamma taakkununnga qanoq isummernerluni nassuiarneqassalluni. Pisariaqarpat SPN-mut nalunaarusiaagallartumi allannguuteqartitsinerit suliarineqassapput, aammalu SPN-mut naammassisamut missingiut itisiliiffiusumik nalunaarusiamut ilanngullugu nassiunneqassalluni. Tamatuma kingorna taakkua akuersissuteqarfigineqarnissaat siunertaralugu EAMRA-mit (aamma ilisimatusarnikkut siunnersortinit) nalilersorneqassapput.

17 17 5 Nipiliornernut pisuusaartitsineq Kalaallit Nunaata imartaani sajuppillatsitsisarluni suliat annertusiartornerat, taamaaqataanillu imaani uumasunut miluumasunut nipiliornernik sunniinerit annertusiartorput. Taamaattumik sajuppillatsitsisarnerni nipiliortunit nipiliornerit siammarnissaannut naatsorsuutigineqartunut pisuusaartitsineq ASN/SPN-mut nalunaarusiami ilaatinneqassaaq. Pisuusaartitsineq taanna sapinngisamik sumiiffimmi sunnerneqartumi pissutsit (itissutsit, immap naqqata ilusaa, immap naqqanut kinnerit, sikoqarnera il.il.) aammalu nipiliornerit sukkassusaasa ammuinnaq ingerlanissai pillugit piviusorsiortumik ilimagisat aallaavigineqassapput. Paasissutissat taakkua sukumiinerutillugit, pisuusaartitsinerup inerneri pitsaanerulissapput. Pisuusaartitsineq immap qaavanuinnaq killeqartinneqassanngilaq, kisiannili immap naqqanut killitsillugu imaluunniit minnerpaamik 1000 meterinut, aammalu sumiiffinnut nipiliorfigineqartunut imaani uumasunut miluumasunut sunniisussanut ammuinnaq immap ilua ilaatinneqassaaq. Imaani sumiiffimmi ilusiliami ilaatinneqartumi sajuppillatsitsisarluni misissuinerit arlallit ingerlanneqassappata, ilusiliaq ataatsimoorussaq nipiliortunik tamaginnik ilaatitsiviusoq suliarineqassaaq. Taassuma ilusiliat ataasiakkaat, immikkut ingerlatseqatigiiffimmit suliarineqartussaagaluartut taarsersinnaavai. Ingerlatseqatigiiffiit imminnut qanillutik sulinissamik pilersaaruteqartut, scope-mut missingiutip nalilersorneqarneranut atatillugu tamanna pillugu nalunaarfigineqassapput, taamaalillutik imminnut attaveqarfigisinnaassallutik. Suliffissuarnit nipiliornerit allat (taamaattoqassappat) aamma pisuusaartitsinermi ilaatinneqassapput. 5.1 Nipiliornerit nipitussusaat naatsorsorneqartut Nipiliornernut ilusiliaq nipiliortunut naleqqiullugu ungasissutsini assigiinngitsuni aamma itissutsini assigiinngitsuni (imaani uumasunut miluumasunut takussaasunut attuumassuteqartut) nipiliornerit nipitussusaannik naatsorsuinernik inerneqassaaq. Nipiliornerit nipitussusaat nipiliornerit naqitsinerat peak-to-peak atorlugu 1μPa-mut allanneqassapput; nipiliornerit naqitsinerat rms atorlugu 1 μpa-mut (rms nipiliornerup ingerlaarnerata sivisussusaata 90 %-ia sinnerlugu uuttorneqartoq, Malme et al nassuiarneqartoq; Blackwell et al. 2004; Madsen 2005) aamma nipiliornerit sunniinerisa annertussusaat nipiliornerup ingerlaarnerani ataatsimi 1 μpa 2 s.-imut. Sunniinernik ataatsimoortunik nalilersuinermi nalunaaquttap akunnerisa 24-it ingerlaneranni nipiliornerit sunniinerat tamarmiusoq (sumiiffimmi tamarmi misissuinernit tamaginnit silaannarmut igeriuttakkanit tamaginnit) naatsorsorneqassaaq (nipiliornerit sunniinerisa annertussusaat nalunaaquttap akunnerini 24-ni 1 upa 2 s-imut). Pisuusaartitsinermi nipiliorfiusut uumassusilinnut tamaginnut attuumassuteqartussat tamarmik ilaatinneqassapput, tassungalu atatillugu tassaassaaq nipiliorfiusumit 20 km tikillugit 48 khz angullugit aamma 20 km-init ungasinnerusumi 20 khz angullugit akulikissusillit.

18 Maannakkut nipiliornerit siammarsimaffii Sajuppillatsitsisarluni misissuinerit nalaanni silaannarmut igeriuttakkamit nipiliorneq atuuttoq uuttortarneqassaaq. Tamanna ungasissutsini toqqartukkani aammalu sumiiffinni annertunerni suliap ingerlanerani ingerlanneqassaaq. Tamanna piffissaq misissuiffiusoq tamaat imaluunniit minnerpaanik annertunersaa ingerlanneqartariaqarpoq. Tamanna tusarnaarutit puttaqutit inissinneqartut atorlugit imaluunniit umiarsuarmit nipiliornernik uuttortaatinik kalittumit allaanerusumit ingerlanneqarsinnaavoq. Nipiliornernik uuttortaanissanut taamaattunut pilersaarut EAMRA-mit akuersissuteqarfigineqassaaq. Nipiliornernik uuttortaanerit uuttortaavinni tamaginni itissutsini arlalinni ingerlanneqassapput, itissutsimut imaani uumasut miluumasut aqqarfigisartagaannut, aammalu sanimuinnaq nipiliornerup sukkassusaa uuttorneqartoq naapertorlugu minnerpaamik itissutsimut nipiliornerup sukkassusaata arriinnerpaamiinneranut killikkuni pitsaassalluni. Uuttortaaffinni minnerpaamik ungasissutsini pingasuni aammalu sumiiffiup misissuiffiusup killeqarfianit minnerpaamik 50 km-inut uuttortaasoqassaaq. Nipiliornerit narlorissumut sukkassusaat uuttortaaviusuni tamaginni, toqqaannartumik imaluunniit immap iluatigoortumik CTD-inik uuttortaanerit (itissusaa, tarajoqassusaa aamma kissassusaa) tamaasa aallaavigalugit, naatsorsorneqassapput. Nipiliornernik uuttortaanerit immikkoortortani nipiliornernik ilusiliami atorneqartuni nalunaarutigineqassapput, tassalu nipiliornerit naqitsinerat peak-to-peak atorlugu 1μPa-mut; nipiliornerup naqitsinera rms atorlugu 1 μpa-mut (rms nipiliornerup ingerlaarnerata sivisussusaata 90 %-ia sinnerlugu uuttorneqartoq, Malme et al imi nassuiarneqartoq; Blackwell et al. 2004; Madsen 2005) aamma nipiliornerit sunniinerisa annertussusaat nipiliornerup ingerlaarnerani ataatsimi 1 μpa 2 s.-imut (aamma takuuk Appendix 1 Takussutissiaq 3). Uuttortaanerup inerneri ukiumi sajuppillatsitsisarluni misissuiffiusumi kingusinnerpaamik decembarip naanerani EAMRA-mut nassiunneqareersimassapput.

19 19 6 Sajuppillatsitsisarluni misissuinerit avatangiisinut suliniutit pitsaaliuisussat Ilitsersuummi matumani siunertaasoq tassaavoq sajuppillatsitsisarluni misissuinernit pisumik imaani uumasut miluumasut timaannik ajoqusiinissanik pitsaaliuinissaq. Pissusilersortarnerit allanngortinneqarnerini pitsaaliuisoqarsinnaanngilaq imaluunniit annikitsuinnarmik pitsaaliuisoqarsinnaalluni. Suliniutit pingaarnerit tassaapput pre-shooting-imik ujarlertitsineq aamma ramp-up-imi suleriaaseq. Taamaattoq taakkua sunniutaannut uppernarsaatit annikitsuinnaapput. 6.1 Pilersaarusiorneq Pitsaaliuinissamut suliniutinut tunngaviusussaavoq sukumiisumik pilersaarusiorneq. Makkua ilaatinneqassapput: Nunap qanoq sananeqaateqarneranik uuttortaanermi angusaqarniarluni sapinngisamik nipiliortut nipikinnerpaat toqqarneqassapput. Toqqaaneq ASN/SPN-mut nassuiaammi uppernarsarneqassaaq. Sinaannut nipiliornerup siammarnissaata killilersimaarnissaa aammalu nipimik nassiussiffiusut (nunap qanoq sananeqaateqarneranik misissuinermi pingaaruteqanngitsut) nipitunersaasa nipikillitinnissaat siunertaralugu, silaannarmut igeriuttakkat nipiliornerisa siammarfii aallunneqassapput. Sumiiffimmi misissuiffiusumi imaani uumasunik miluumasunik peqarfiusut uumasunut taakkununnga uumaniarnermi immikkut pingaaruteqarpat, aammalu piffissat taakkununnga immikkut pingaaruteqarpat? Pissutsit taakkua ASN/SPNmut nalunaarusiami takuneqarsinnaassapput. Sunniinerit tamakkiisut nalilersinnaajumallugit, sumiiffimmi sajuppillatsitsisarluni misissuinerit allat. Sumiiffimmi ingerlatat akornusersuisut allat. Immikkut pre-shooting-imi aamma ramp-up-imi suleriaatsit, suleriaatsini ilanngunneqassapput (takuuk matuma kingulianiittut). 6.2 Misissuinerpiaq Sumiiffik ilaatinneqartussaanngitsoq Pre-shooting atorlugu qinernermi silaannarmut igeriuttakkap qeqqata batteriianiit sumiiffiup 500 meterinik annertussuseqartup iluani imaani uumasunik miluumasunik takusaqartoqarpat (nannut sikumiittut pinnagit) umiarsuup ingerlanerani imaluunniit uumasup nammineerluni qimagukkiartornerani - uumasut pineqartut 500 meterinit ungasinnerusumiilernissaasa tungaanut, silaannarmut igeriuttakkat ramp-up-iat kinguartinneqassaaq. Pisuni marlunni taakkunani, uumasoq maannakkut killeqarfiup avataaniilersimanersoq qulakkeerniarlugu ramp-up-imi suleriaatsip aallartinnissaanut, killeqarfiup 500 meterinik annertussuseqartup iluani kingullermik uumasumik takusaqarnermit 20 minutsit ingerlareersimassapput. PAM atorneqarsimappat, 500 meterinut killeqarfiup iluani imaluunniit avataani nipiliornernik malugisaqarnerit imaani uumasunit miluumasuneersuunersut, PAM-imik suliaqartuusup aalajangissavaa.

20 20 Ramp-up ingerlanneqarnerani imaluunniit tamakkiisumik sakkortussuseqartillugu igeriussinerup nalaani 500 meterit iluanni imaani uumasumik miluumasumik takusaqartoqarpat (MMSO-nit), nipiliortoq uumasumut pallinngitsoortinniarlugu, igeriussineq batteriip silaannarmut igeriuttagaanut (mitigation-gun) minnerpaamut annikillisinneqassaaq. Uumasoq pineqartoq 500 meterit killeqarfiusup avataaniilerpat, taanna tamakkiitilerlugu sakkortusineqarsinnaavoq. Nannut sikumi pisuttut, taakkua sikumiiginnarneranni, ramp-up-ip taamatut utaqqisinneqarnissaanut imaluunniit igeriussinerup tamakkiisuutilernissaanut kinguartitsinermik pissutissaqalersitsissanngillat. Imaanut aqqarpata aalajangersagaq taanna atuutilissaaq. Sumiiffinni imaani uumasunik miluumasunik peqartuni sajuppillatsitsisarluni misissuinerit sapinngisamik ullukkut qaamanerani aallartinneqassapput, taamaalilluni MMSO-t preshooting atorlugu qinerneq ingerlassinnaassallugu. Alapernaarsuinissamut atugassarititaasut imaani uumasunik miluumasunik takusaqarsinnaanissaq ajornartinnginneraat MMSO-it aalajangissavaat. Igeriussineq taartumi imaluunniit isikkiviluttumi (mallertumi (> seastate 3), pujortumi, siallertumi, il.il.) aallartinneqassappat, PAM atorlugu iliuuseqarani naalaarneq atorneqassaaq Pre-shooting atorlugu qinerneq Sumiiffiup suliaqarfiusussaanngitsup 500 meteritut annertussusillip iluani imaani uumasunik miluumasunik qinerneq taanna, silaannarmut igeriuttakkat aallartinneqarnissaat sioqqullugu 30 imaluunniit 60 minutsini ingerlanneqassaaq (imaata itissusaa malillugu aalajangerneqartussaq). Piffissami ujaasiffiusumi sumiiffimmi tassani imaani uumasunik miluumasunik (nannut sikumiittut ilaanatik) peqanngitsoq aammalu piffissami taaneqartumi sumiiffiup imaani uumasunik miluumasunik peqarunnaarnerata nalunaarutigineqarnera sioqqullugu silaannarmut igeriuttakkat aallartinneqannginnissaat, MMSO-t qulakkiissavaat. Imaq 200 meterit inorlugit itissuseqarpat qinerneq 30 minutsini aammalu imaani imaq 200 meterit sinnerlugit itissuseqarpat qinerneq 60 minutsini sivisussuseqassaaq. Kingulliullugu taaneqartumi uumasut itisuumut aqqartartut (kigutilissuit, arferit siggullit) 30 minutsinit sivisunerusumik aqqarsimasinnaanissaat sillimaffiginiarneqarput. Sivisuumik qinerneq (60 minutsit), tamatuma kingorna batterii qamivinneqassappat, narlumuinnaq aqqutip naammassinnginnerani aallartinneqarsinnaavoq. PAM atorneqarpat, periaaseq ikinneqarsimasoq aammalu pre-shooting atorlugu qinernerit tamaasa alapernaarsorneqartoq PAM-imik ingerlatsisuusup qulakkiissavaa Ramp-up Oqaaseq ramp-up (aamma taaneqartartoq soft start) piffissami silaannarmut igeriuttakkat ikinneqarnerannit tamakkiitilerlugit sakkortusineqarfiannut taaguutigitinneqarpoq. Siunertaavoq imaani uumasut miluumasut imaaniittut nipitussusaata sakkortussusaata ajoqusiisinnaalinnginnerani nigorternissamut periarfissinnissaat. Ramp-up-ip ingerlaneranut piffissaq minutsinik 20-inik sivisussuseqassaaq aammalu nipitussusaata sakkortussusaa nipittoriartuaartinneqassaaq, assersuutigalugu silaannarmut igeriuttakkamik minnerpaamik aallartillugu, tamatumalu kingorna sinnerisa ataasiakkaarlugit ikittarnerisigut. Inassutigineqarpoq nipitussusaa minutsimut 6 db-nik nipittorneqartassasoq.

21 21 Ramp-up silaannarmut igeriuttakkat aallartinneqarneri tamaasa ingerlanneqartassaaq, taamaattoq batterii immikkut misilerarneqassappat, aammalu silaannarmut igeriuttakkat mikisunik taaneqartartut (annertussusaa < 10 inch 3 ) atorneqarneranni, atorneqanngitsoorsinnaavoq. Ilusiliaq 2. Pre-shooting atorlugu qinernermut aamma ramp-up-imut iliuusissanut pilersaarut. Aamma takuuk immikkoortoq aamma

22 22 Pisariaqanngitsumik nipiliornerit annertusitinnginnissaat eqqarsaatigalugu ramp-up-ip ingerlatinneqarnera 20 minutsinit sivisunerusariaqanngilaq. Tamatuma malitsigisaanik sajuppillatsitsisarluni paasissutissanik katersineq, ramp-up-imi suleriaatsip ingerlanneqareernerata kingorna, ingerlaannaq aallartinneqassaaq. Ajornanngippat ramp-up-imi suleriaaseq ullukkut qaamanerani aammalu isikkiviginnerani ingerlanneqassaaq. Ilusiliaq 3. Silaannarmut igeriuttakkanik igeriussinerup uninnerani iliuusissanut pilersaarut. Takuuk erseqqinnerusumik immikkoortoq Silaannarmut igeriuttakkanik igeriussinerup pilersaarutaanngitsumik uninnera Silaannarmut igeriutakkanik igeriussinerup unittoornera minutsinit 10-nit sivisuneruppat, igeriussinerup aallarteqqinneqannginnerani ramp-up ingerlanneqassaaq. Unittoornermi MMSO-t qinerpata, pre-shooting atorlugu qinernissaq pinngitsoorneqarsinnaavoq. MMSOnik qinertoqanngippat ramp-up sioqqullugu pre-shooting atorlugu qinerneq ingerlanneqassaaq (aamma takuuk Ilusiliaq 3). Igeriussinermi unittoorneq 5 aamma 10 minutsit akornanni sivisussuseqarpat, sumiiffiup suliaqarfiusussaanngitsup 500 meterinik annertussuseqartup iluani imaani uumasunik miluumasunik peqannginnera qulakkeerniarlugu MMSO-t sukkasuumik misissuissapput. Taamaattoqarsimappat uumasoq 500 meterit killeqarfiusup avataaniilereernerata kingorna 20 minutsit utaqqereernermi ramp-up ingerlanneqassaaq. 500 meterit killeqarfiup iluani imaani

23 23 uumasunik miluumasunik soqanngippat igeriussineq aallarteqqinneqarsinnaavoq (aamma takuuk Ilusiliaq 3). Unittoorneq minutsit 5-it inorlugit sivisussuseqarsinnaappat, igeriussineq ingerlaannaq aallarteqqinneqarsinnaavoq. Ajornanngippat unittoornermi inassutigineqarpoq igeriuttagaq mikineq atorlugu igeriussineq (mitigation-gun) ingerlateqqinneqassasoq (aamma takuuk Ilusiliaq 3) Site-survey aamma Vertical Seismic Profiling (VSP) Sajuppillatsitsisarluni misissuinerit taamaattut nipiliortunik nipiliortitsinnginnerusunik atuigaluartut, matuma siuliani malittarisassat nassuiarneqartut malillugit pre-shooting atorlugu qinerneq aamma ramp-up-imi suleriaaseq ingerlanneqassapput. Taamaattoq silaannarmut igeriuttakkamik mikisumik (annertussusaa < 10 inch 3 ) taamaallaat atuinermi ramp-up pisariaqanngilaq, kisiannili pre-shooting atorlugu qinerneq ingerlanneqassaaq Silaannarmut igeriuttakkanik misileraaneq Misissuinissaq sioqqullugu imaluunniit iluarsaassinerup kingorna silaannarmut igeriuttakkat misilerarneqarnerisa ingerlanneqarnissaa pisariaqarsinnaavoq. Pre-shooting atorlugu qinerneq qanoq pisoqaraluarpalluunniit ingerlanneqassaaq, silaannarmut igeriuttagaq ataaseq arlallilluunniit tamakkiisumik sakkortussuseqartillugu misileraanermi imaluunniit batterii tamarmi aamma sakkukitsumik sakkortussuseqartillugu misilerarneqassappat, taamaallaat ramp-up pisariaqarluni. Silaannarmut igeriuttagaq ataasiinnaq sakkukillisamik sakkortussuseqartillugu misilerarneqassappat, tamanna pisariaqanngilaq. 6.3 Narlumuinnaq aqqutini nikittarneq Sajuppillatsitsisarnermi narlumuinnaq aqqutit marluk akornanni nikinnermi suleriaatsinik immikkuullarissunik atuinissaq pisariaqarsinnaavoq. Narlumuinnaq aqqutit marluk taakkua akornanni piffissaq ingerlaarfiusussaq nalunaaquttap akunneranit ataatsimit sivisunerussasoq naliliisoqarpat, narlumuinnaq aqqutip siulliup naanerani silaannarmut igeriuttakkat unitsinneqassapput aammalu aqqummi nutaami aallartinnginnermi pre-shooting atorlugu qinerneq tamakkiisoq aamma minutsini 20-ni ramp-up ingerlanneqassapput (Ilusiliaq 4). Narlumuinnaq aqqutit marluk taakkua akornanni piffissaq ingerlaarfiusussaq nalunaaquttap akunneranit ataatsimit sivikinnerussasoq naliliisoqarpat, batterii sakkukitsillugu imaluunniit silaannarmut igeriuttagaq minnerpaaq (mitigation gun) kisiat atorlugu ingerlasoqassaaq aammalu MMSO-t tamatuma nalaani qinissapput. Site surveys (silaannarmut igeriuttakkat mikisut atorlugit) ingerlanneqarneranni igeriussinerit ataasiakkaat akornanni piffissaq atorneqartoq minnerpaamik minutsinik 5-inik sivitsorneqarsinnaavoq (shot point interval). Sumiiffiup suliaqarfiusussaanngitsup 500 meterinik annertussuseqartup iluani imaani uumasunik miluumasunik takusaqartoqarpat, narlumuinnaq aqqutissap tullia anguneqarpat, silaannarmut igeriuttakkat tamakkiitilerlugit sakkortusineqarsinnaapput. Kisiannili killeqarfiup iluani imaani uumasunik miluumasunik takusaqartoqarpat, narlumuinnaq aqqutissap tulliup aallartiffiginissaanut (taamaalillunilu batteriip tamakkiisunngorlugu sakkortusineqarnissaanut) 1/ uumasup pineqartup killeqarfiup avataaniilernissaa aamma 2/

24 24 uteqqinnginnissaa qulakkeerniarlugu minutsinik 20-inik ilallugu, utaqqisinneqassaaq (Ilusiliaq 4). Ilusiliaq 4. Narlumuinnaq aqqutini nikinnissamut iliuusissanut pilersaarut. 6.4 Nipinik alapernaarsuineq Tamatumunnga tuluit taaguutaat tassaavoq Passive Acoustic Monitoring, aammalu naalisaaneq PAM aamma danskisut atorneqartarpoq. Imaani uumasunik miluumasunik illersuinissamut tunngatillugu isaannarnik alapernaarsuinissaq ajornartillugu (assersuutigalugu taartumi, iseriatsillugu imaluunniit mallertillugu (sea state over 3), PAM alapernaarsuinermi periarfissat annertusitinnissaannut atorneqartarpoq. Taamaattoq PAM-imi periaatsit assigiinngitsut atorneqarsinnaanerat killeqarpoq, ilaatigut uumasut nipaqanngitsut takunngitsoorneqartarmata. Imaani uumasut miluumasut infrarød atorlugu sumiissusersiniartarnissaat PAM-imut taarsiullugu siunissami piumasaqaatigineqalersinnaavoq. PAM-imut atortut tassaapput nipinik immiussisartut (mikrofonit imaani atorsinnaasut), taakkunanilu malugineqartut qarasaasiami programmini immikkuullarissuni suliarineqartarput. Tamatuma saniatigut PAM-imik atuinissamut ingerlatitsisussat periaatsimik ikkussuinissamut allanngutsaaliuinissamullu misilittagaqarnissaat, aammalu immiunneqartut ilisarnaataannik nassuiaasinnaanissaat pisariaqarpoq.

25 PAM-imik atuineq PAM isigalugit alapernaarsuinermut tapertatut iluaqutaasinnaavoq. Kisianni imaani uumasunut miluumasunut pineqartunut ungasissuseq nalilerneqartussanngortillugu taamatut eqqoqqissaartigisinnaanngimmat eqqumaffigineqassaaq. Assersuutigalugu PAM-imi atortut nalorninartortaqarnerat +/- 300 meteriusinnaavoq; imaani uumasoq miluumasoq 500 meterinik ungasissusilimmiissorineqartoq 800 meterit angullugit ungasissusilimmiissinnaavoq, taamaakkaluartorlu ramp-up-ip kinguartinneranik malitseqarsinnaalluni. Taamaattumik atortut eqqoqqissaarnerpaat niuerfimmi pissarsiarineqarsinnaasut atorneqarnissaat pingaaruteqarpoq. Kisianni qanoq pisoqaraluarpalluunnit PAM-imik ingerlatitsisup akisussaasuusup ungasissutsimik naliliinerata, suliaqarfiusussaanngitsumut killeqarfik imaani uumasunik miluumasunik peqannginnersoq imaluunniit taamaattoqarnersoq aalajangertussaavaa. PAM-imut atortut nipiliortunut malussarissusaannut, uumasunut malugisinnaasaannut aammalu qanoq pitsaanerpaamik ikkussorneqarsinnaaneranut atorneqarsinnaaneranullu tunngatillugu piginnaasai, ASN/SPN-mut nalunaarusiami nassuiarneqassapput (Appendix 1, Takussutissiaq 4). Ukiuni kingulliunerusuni qarasaasiami programmit assigiinngitsut inerisarneqarput, PAMimut atortunit malugineqarsinnaasunik suliarinnissinnaasut nalilersueqqissaarsinnaasullu. Assersuutigalugu uuliasiornermik suliaqartunik suleqateqarnermi (International Association of Oil and Gas Producers Joint Industry Project (JIP)) qarasaasiami programmi PAMGuard angusarineqarpoq. Taanna kikkunnilluunniit pissarsiarineqarsinnaavoq aammalu suli inerisarneqarluni, taamaattumik atuisut kaammattorneqarput taassuma ineriartortinneqarnerata ingerlaqqinnerani pitsanngorsarneqarneranilu peqataaqqullugit. 6.5 Imaani uumasunik miluumasunik aamma timmissanik imarmiunik alapernaarsuisut MMSO-t Alapernaarsuisut umiarsuarmi sajuppillatsitsisarnermi atorneqartumi inissinneqartut taaneqartarput MMSO-t (Marine Mammal and Seabird Observers). Sajuppillatsitsisarluni misissuinermi MMSO-t minnerpaamik sisamaasussaapput. Taakkua alapernaarsuinermi periaatsini aamma maleruagassani imaani uumasunik miluumasunik sunniinernik pitsaaliuisussanik aqutsinermi immikkut sungiusarsimassapput. Sisamat taakkua ilaat marluk PAM-imut atortunik ingerlatitsisussatut akuerisaasimasuussapput, aammalu Kalaallit Nunaanni imaani uumasut miluumasut aamma timmissat imarmiut qanoq ilisarineqartarnersut, sukumiisumik ilisimasaqarlutik tamarmik uppernarsarsinnaassallugu. Taamaattumik MMSO-it Kalaallit Nunaata imartaani imaani uumasut miluumasut aamma timmissat imarmiut suussusaannik ilisimasaqartuunissaat pisariaqarpoq. MMSO-t sisamat taakkua umiarsuarmut, sajuppillatsitsisarnermi nipiliortunik kalittussamut inissinneqassapput. Allatut inissiinerit pisussanngorsinnaapput, kisiannili taamaattoqassappat tamanna EAMRA-mut isumaqatigiissutigineqassaaq. MMSO-t aamma umiarsuarmi naalakkersuisarfiup sulisullu silaannarmut igeriuttakkanik aqutsisut (assersuutigalugu VHF-radiut atorlugit) akornanni attaveqaqatigiinnermi aqqutissat isumaqatigiissutigisimanissaat qulakkeersimanissaallu pingaaruteqarpoq.

26 26 MMSO-t piffissaalluarallartillugu suliaqarnerit ataasiakkaat pillugit ilisimatinneqassapput, taamaalillutik pre-shooting atorlugu qinernermik suliaqarnissamut inissereersimasinnaassallutik. Sajuppillatsitsisarluni misissuinerit ingerlanneqarneranni MMSO-t marluk sumiiffimmi alapernaarsuiffiusumi inissereersimassapput. Suliaqarnissamut tassunga ilitsersuut immikkuullarissoq suliarineqareerpoq (Manual for Seabird and Marine Mammal Survey on Seismic Vessels in Greenland (Link)). Alapernaarsuinerit karsinit alapernaarsuiffiusussanit immikkoortunit silamut MMSO-nik oqquisimatitsisussanit ingerlanneqassapput. Karsi naalakkersuisarfiup qaavani, silaannarmi aammalu sunut tamanut akornuteqanngitsumik alapernaarsuiffiusinnaasumut inissinneqassaaq (takuuk erseqqinnerusumik Manual for Seabird and Marine Mammal Survey on Seismic Vessels in Greenland (Link). Karsit alapernaarsuiffiugallartussat sumiiffimmi alapernaarsuinissamik periarfissaqarfiusumi inissereersimanissaat suliaqartuusussap akisussaaffigaa. Karsip alapernaarsuiffiusussap inissisimanerani umiarsuarmi isumannaatsuutitsinissaq aamma atuuffiit allanngortinneqassanngillat aammalu pisinnaatitsissummik pigisaqartup aamma suliaqartuusup isumannaallisaanermut politikkia aamma isumannaallisaariaatsit naammassineqarsimassallutik. MMSO-t pingasunik suliassaqarput: #1 pre-shooting atorlugu qinernermi aamma sajuppillatsitsisarluni paasissutissanik katersinerup nalaani sumiiffiup suliaqarfiusussaanngitsup 500 meterisut annertussuseqartup alapernaarsorneqarnissaa. Ramp-up aamma tamakkiisuutillugu killeqarfiup 500 meterisup iluani imaani uumasunik miluumasunik soqanngitsoq, MMSO-p pingaartuusup qulakkeeriinngippagu aallartinneqarsinnaanngillat aammalu igeriussinerup nalaani imaani uumasunik milluumasunik killeqarfiup 500 meteriusup iluanut appakaattoqassappat, mitigation-gun-imut immikkuullarissumut igeriussinerup annikillisinneqarnissaa siunertaralugu MMSO nalunaaruteqassaaq. #2 timmissanik aamma imaani uumasunik miluumasunik peqarnersoq pillugu paasissutissanik PAM-imut atortut atorlugit alapernaarsuinermik isumaginninneq. Suliassat ilitsersuummi uani erseqqissarneqarput: Manual for Seabird and Marine Mammal Survey on Seismic Vessels in Greenland (Link). Suliassaq #2-mi siunertaavoq, sumiiffinnit sajuppillatsitsisarluni misissuinernik ingerlatsiviusunit timmissat imarmiut aamma imaani uumasut miluumasut agguataarsimanerat peqarneralu pillugu ilisimasat tunngaviusut pitsanngorsarnissaat. Ilisimasat taakkua ilisimasanut tunngaviusussanut DCE/GN-ip qarasaasiami paasissutissaasiviani ilaapput, aammalu taanna ingerlatseqatigiiffinnit, assersuutigalugu ingerlatassaq qinnuteqaatigisartik pillugu ASN-imut nassuiaammik suliaqartussanit atorneqarsinnaavoq. Paasissutissat taakkua (#2) periaaseq immikkuullarissoq malillugu katersorneqartussaapput, taamaalilluni taakkua qarasaasiami paasissutissaasivimmi toqqaannartumik immiunneqarsinnaassallutik (takuuk erseqqinnerusumik Manual for Seabird and Marine Mammal Survey on Seismic Vessels in Greenland (Link)). Ukiumi sajuppillatsitsisarluni misissuiffiusumi kingusinnerpaamik decembarip naanerani paasissutissat aamma MMSO-t nalunaarusiaat EAMRA-mut taassumalu ilisimatusarnikkut siunnersortaannut nassiunneqarsimassapput (najugaat matuma kingulianiipput). Paasissutissat ilaatigut naqitanngorlugit (nalunaarusiaq) ilaatigut elektroniskinngorlugit (paasissutissat aamma nalunaarusiaq) tunniunneqassapput.

27 27 Aatsitassanik Suliassaqarfinnut Avatangiisinut Aqutsisoqarfik Environmental Agency for Mineral Resource Activities (EAMRA) Imaneq 1A 801 (Nuuk Center) P.O. Box Nuuk, Greenland Nationalt Center for Miljø og Energi Danish Centre for Energy and Environment DCE Aarhus University att. David Boertmann Frederiksborgvej 399 P.O. Box 358 DK-4000 Roskilde, Denmark Pinngortitaleriffik Greenland Institute of Natural Resources att. Josephine Nymand Kivioq 2 P.O. Box Nuuk, Greenland

28 28 7 Sajuppillatsitsisarluni misissuinernut atatillugu sumiiffiit imaani uumasunut miluumasunut illersuiffiusut Immikkoortumi matumani sajuppillatsitsisarluni misissuinernut tunngatillugu sumiiffiit imaani uumasunut miluumasunut illersuiffiusut assigiinngitsut marluk takutinneqarput: Sumiiffiit eqqumaffigineqartussat tassaapput sumiiffiit arfernik, puisinik imaluunniit aarrinik immikkut malussajasunik takusaqarfiusartut taakkuninngalu peqarnera, aammalu sajuppillatsitsisarluni misissuinerit qalleraassinnaanerat aarlerinaateqarsinnaalluni. Sajuppillatsitsisarluni misissuinerit sumiiffiit taakkua iluanni aammalu piffissani nunap assingani allassimasuni pilersaarusiorneqassappata, uumasut pineqartut taakkua nipiliornernik sunnerneqarnissaannut illersorneqarnissaat siunertaralugu maleruagassiineq sukannernerusoq atuutsinneqalersinnaavoq. Tamanna assersuutigalugu, uumasut taakkua sumiiffimmiittut pillugit nutaanik ilisimasanik peqalersimappat, pisussanngorsinnaavoq, aammalu maleruagassiineq annertunerusoq nipiliortup nipitussusaanut, sajuppillatsitsisarnermi aqqutit imminnut qanissusaanut aamma/imaluunniit sumiiffiit immikkuullarissut matugallarneqarnerannut, tunngassuteqarsinnaavoq. Sumiiffiit matoqqasut tassaapput sumiiffiit tunngaviusumik maleruagassatut sajuppillatsitsisarluni misissuinernik ingerlatsivigineqarnissaannik periarfissaqarfiunngitsut. Taamaattoq immikkuullarissumik qinnuteqaateqartoqarneratigut killilersukkamik misissuinissamut akuersissummik tunniussisoqarsinnaavoq. Taanna sajuppillatsitsisarnerni narlumuinnaq aqqutissat inissisimaffissaasa, suliniutit pitsaaliuisussat aamma misissuinissanut siunnersuutit, sumiiffimmi imaani uumasut miluumasut takussaasut sunnerneqarsinnaanerinik paasinarsititsisinnaasut, sukumiisumik nassuiarneqarnerannik imaqassaaq. Tassunga atatillugu killilersugaq isumaqarpoq, ingerlatseqatigiiffiup ataasiinnaap sumiiffinni suliaqartuussasup, sajuppillatsitsisarluni misissuinerit taamaallaat sajuppillatsitsisarnermi narlumuinnaq aqqutit naatsut killilimmik amerlassuseqartut minnerpaamik 10 km-inik akuttussuseqarlutik inissisimasut sinerlugit ingerlatissagai (sumiiffimmit sumiiffimmut nikerassaaq, EAMRA-mit aalajangerneqassaaq). Sumiiffiit illersuiffiusussat marluusut tamarmik nunap assingini tulliuttuni takuneqarsinnaapput (Ilusiliaq 4-7). Shp-fil-it MRA-p nittartagaani (Link) aaneqarsinnaapput, aammalu GIS-programmini killeqarfiit eqqoqqissaartumik sumiissusersinissaannut atorneqarsinnaallutik. 7.1 Uumasut immikkut malussarissuseqartut Kalaallit Nunaata imartaanni ikummatissiassanik ingerlataqarnissamut piviusunngortitsinermi avatangiisinut sunniutaasussanik nalilersuineq (Link) malillugu, imaani uumasut miluumasut makkua sajuppillatsitsisarluni misissuinernut immikkut malussarissuupput: Qilalukkat qaqortat (Delphinapterus leucas). Qilalukkat qernertat (Monodon monoceros). Arfivik (Balaena mysticetus). Aaveq (Odobenus rosmarus).

29 29 Sumiiffiit piviusunngortitsinermi avatangiisinut sunniutaasussanik nalilersuinermi ilaatinneqartut avataanniittut, tamatumalu saniatigut qaqutigoortut aammalu ikittuinnaasut tassaapput: Arfivik alla (Eubalaena glacialis). Imaani uumasut miluumasut allarpassuit kalaallit Nunaata imartaanni takussaapput (puisut, arferit, nannut). Taakkua sajuppillatsitsisarluni misissuinernit akornusersuinernut malussarinnginnerupput imaluunniit sumiiffinnik illersuiffiusussanik toqqaanissaq ajornartarluni. Qilalukkat qaqortat Canadami issittumit Kalaallit Nunaata avannaata kitaanut oktobarimi takkuttarput (Heide-Jørgensen et al. 2003) aammalu sajuppillatsitsisarnerup ukiuuneranit unitsinneqarnissaa (oktobari-novembari) sioqqullugu sivikitsumik sajuppillatsitsisarluni misissuinernut qalleraassinnaallutik. Kisiannili qilalukkat qernertat piffissami sajuppillatsitsisarluni misissuinerup nalinginnaasumik ingerlanneqartarfiani, Kalaallit Nunaata avannaata kitaani aamma Tunumi takussaasarput. Taakkua aasaanerani killissalersorneqarluarsimasunik uninngaartarfeqarput, tassani amerlasoorpassuullutik takussaasinnaallutik. Ingerlaarnerminni aqqutigisartagaat qaammataasakkut nassitsissutinik atortulerlugit malinnaaffigalugit misissorneqarsimapput, aammalu uumasut assigiinngitsut taakkua taamatuttaaq ukiuunerani killissalersorneqarluarsimasunik uninngaartarfeqarlutik. Taakkua pingaartumik sumiiffinni imaani itisoorsuarmiinnerusarput, aammattaarlu Baffin Bugtimi, Davis Strædemi aamma Tunup kitaata avataani sikorsuit akornanniittarlutik (Heide-Jørgensen & Laidre 2006, Heide- Jørgensen et al. 2013). Arfiviit Kalaallit Nunaata kitaani imaata sikuuneranut atatillugu ukiuunerani takussaanerusarput. Tunumi arfiviit allat takussaapput, tassalu Spitsbergen-it Nungutaanissamut aarlerinartorsiortut (takuuk IUCN). Ukiuni kingullerpaani misissuinerit paasinarsitippaat, Tunumi ammalataq tassanngaaniillu sikup sinaa ilaatigut ataavartuusartoq, aammalu kujammuinnaq Île de France-p tungaanut uumasunut taakkununnga aasaanerani uninngaarfittut pingaaruteqartoq (Boertmann et al. 2009a, b, 2015, Boertmann & Nielsen 2010, Lydersen et al. 2012). Arfiviit allat ullumikkut ikittuaraannaallutik takussaapput (uumasut hundredit arlaqanngitsut) aammalu tassunga atatillugu nungutaaqqajaasunut allattuiffimmi Nungutaanissamut aarlerinartorsiortutut allassimallutik. Uumasut ikittuinnaat ukiut tamaasa Islandip aamma Tunup kujataata akornanni imaani takussaasarput (Mellinger et al. 2011), kisiannili ilisimasat pigineqartut ikittuinnaammata sumiiffinnik illersuiffiusussanik toqqaasoqarsinnaanngilaq. Tunup avannaarsuani ukioq tamaat aarrit takussaasarput, tassa imaappoq sajuppillatsitsisarluni misissuinerit ingerlanneqarsinnaaffiini piffissaq tamaat. Kalaallit Nunaata kitaani sajuppillatsitsisarluni suliaqarfiusartup avataani taakkua pingaartumik ukiukkut takkutillatsiartarput. Aarrit pingaartumik ikkannerni (< 100 m) uninngaartarput, taakkunani immap naqqanut aqqartarlutik uillunik neriniartarlutik, aamma taakkunani anginerusunik aalisagaqarpoq. Tamatuma saniatigut ukiuunerani (nalinginnaasumik sajuppillatsitsisarluni misissuisarnerit avataanni) Sisimiut aamma Kangaatsiap avataanni Qaleraleqarfissuarmi aammalu Tunup avannaa sinerlugu ammalatani amerlasoorpassuullutik katersuuttarput. Imaani uumasut miluumasut piniarnermut atatillugu kalaallinut innuttaasunut pingaaruteqarput, aammalu pingaartumik aasaanerani Qimusseriarsuarmi qilalukkat qernertat

30 sajuppillatsitsisarluni misissuinernit sunnerneqarsinnaapput (takuuk nalunaarusiaq una Link). Qilalukkat qaqortat, aarrit arfiviillu aamma piniarneqartarput, kisiannili pingaartumik piffissami (ukiuunera) nalinginnaasumik sajuppillatsitsisarluni misissuinernik ingerlatsiviusanngitsumi tamanna pisarpoq. Uumasut taaneqartut pillugit paasissutissat annertunerusut Kalaallit Nunaata imartaanni ikummatissiassanik ingerlataqarnissamut piviusunngortitsinermi avatangiisinut sunniutaasussanik nalilersuinermi nassaarineqarsinnaapput (Link) Sumiiffiit illersuiffiusut Qilalukkat qaqortat Tassunga tunngatillugu sumiiffinnik eqqumaffigineqartussanik toqqaasoqarpoq (Ilusiliaq 5), taakkua sajuppillatsitsisarluni nalinginnaasumik ingerlataqarnernut piffissatigut qalleraaffiunissaat 1. oktobarimiit 30. novembarimut killeqartinneqarpoq. Sumiiffik qilalukkat aasaanerani Canadamiittartut aammalu ukiuunerani Kalaallit Nunaata kitaata sineriaata avataaniittartut, aqqutigisarpaat, taamatullu kujasinnerusortaa aamma ukiuunerani uninngaarfittut atorneqarluni Qilalukkat qernertat Kalaallit Nunaata avannaata kitaani aamma Tunumi sumiiffinnik matoqqatinneqartussanik arlalinnik toqqaasoqarpoq. Taakkua tamarmik aasaanerani qilalukkat qernertat immikkuullarissut uninngaarfigisarpaat. Piffissaq atuuffiat tassaalluni 1. juunimiit 30. septembarimut (Ilusiliaq 6). Tassunga ilanngutissapput sumiiffiit eqqumaffigineqartussat marluk, aasaanerani 1. juunimiit 30. septembarimut aammalu ukiakkut arferit piffissami ingerlaartarfianni 1. oktobarimiit 30. novembarimut atuuttut (Ilusiliaq 6) Arfivik Maannamuugallartoq arfivinnut tunngatillugu sumiiffinnik matoqqatinneqartussanik toqqaasoqarsimanngilaq, kisiannili sumiiffinnik eqqumaffigineqartussanik piffissani marlunni atuuttunik annertuunik atuuttoqarpoq: Ukiaanerani 1. oktobarimiit 30. novembarimut aamma aasaanerani 1. juunimiit 30. septembarimut (Ilusiliaq 7). Uumasut taakkua Kalaallit Nunaanni pingaartumik Tunumi, qilalukkat qernertat immikkuullarissut uninngaarfigisarpaat takussaasarnerat pillugu ilisimasaqarnerulerneq sumiiffinnik matoqqatinneqartussanik toqqaanissamut pissutissaqalersitsisinnaassaaq. Kalaallit Nunaata kitaani sumiiffik eqqumaffigineqartussaq tassaaneruvoq aasaanerani uninngaartarfiat, aammalu piffissap taamaalinerani arfiviit amerlanerpaartaat Canadamiittartut ilimagineqarpoq. Tunumi arferit taakkua ukioq tamaat takussaasarput Aaveq Tunup avannaani sumiiffinnik matoqqatinneqartunik annertoorujussuarnik peqarpoq, tassani aarrit nunami qatsimaarfigisartagaat neriniarfigisartagaallu aallaavigineqarlutik (1. juunimiit 30. septembarimut atuuppoq), taamatullu sumiiffinnik eqqumaffigineqartussanik annertoorujussuarnik atuuttoqarluni (1. juunimiit 30. septembarimut aamma 1. oktobarimiit 30. novembarimut atuuttut) (Ilusiliaq 8). Kalaallit Nunaata kitaani sumiiffiit toqqarneqartut annikitsuupput, tassami aarrit sajuppillatsitsisarluni misissuinerup ingerlanneqartarfiisa avataanni takussaanerusarmata.

31 Ilusiliaq 5. Qilalukkanut qaqortanut sumiiffiit eqqumaffigineqartussat. Tamanna piffissami 1. oktobarimiit 30. novembarimut atuuppoq. Nunap assinga upernaakkut aamma ukiukkut atuutinngilaq, tassani qilalukkat qaqortat aamma Kalaallit Nunaata imartaani takussaasarlutik. 31

32 Ilusiliaq 6. Qilalukkanut qernertanut tunngatillugu sumiiffiit matoqqatinneqartut aamma sumiiffiit eqqumaffigineqartussat. Sumiiffiit matoqqatinneqartut 1. juunimiit 30. septembarimut atuupput aammalu sumiiffiit eqqumaffigineqartussat 1. oktobarimiit 30. novembarimut (tungujortut) aamma 1. juunimiit 30. septembarimut (aappaluttut) atuullutik. Nunap assinga ukiuunerani upernaajuneranilu atuutinngilaq, tassani qilalukkat qernertat aamma Kalaallit Nunaata imartaani takussaasarlutik. 32

33 Ilusiliaq 7. Arfivinnut tunngatillugu sumiiffiit eqqumaffigineqartussat. Aappaluttut 1. juunimiit 30. septembarimut aamma tungujortut 1. oktobarimiit 30. novembarimut atuupput. Nunap assinga ukiuunerani upernaajuneranilu atuutinngilaq, tassani arfiviit aamma Kalaallit Nunaata imartaani takussaasarlutik. 33

34 Ilusiliaq 8. Aavernut tunngatillugu sumiiffiit matoqqatinneqartut aamma sumiiffiit eqqumaffigineqartussat. Sumiiffiit matoqqatinneqartut 1. juunimiit 30. septembarimut aamma sumiiffiit eqqumaffigineqartussat 1. juunimiit 30. septembarimut (aappaluttut) aamma 1. oktobarimiit 30. novembarimut (tungujortut) atuupput. Nunap assinga ukiuunerani upernaajuneranilu atuutinngilaq, tassani aarrit aamma Kalaallit Nunaata imartaani takussaasarlutik. Toornerni taartuni nunami qatsimaarfiusartut takutinneqarput. 34

35 35 8 Sumiiffiit niuernermik tunngaveqartumik aalisarfiusartut Sajuppillatsitsisarluni misissuinerit aalisakkanut aamma aalisarnermut tunngatillugu maleruagassiivigineqanngillat. Taamaattoq sumiiffinni piniarfiusartuni aalisarfiusartunilu najukkami piniartut aalisartullu peqatigiiffiisa attaveqarfigisarnissai ilisimatinneqartarnissaalu inassutigineqarpoq, taamatullu sumiiffinni aalisarfiusartuni aalisarnermik ilisimasalimmik ilaasoqartarnissaq inassutigineqarluni. Matumani sajuppillatsitsisarluni misissuinissamik pilersaarusiornissaq siunertaralugu, nunap assingi marluk sumiiffinnik maannakkorpiaq niuernermik tunngaveqartumik aalisarnermik ingerlatsiviusut takutinneqarput. Ilusiliani 8-mi aamma 9-mi nunap assingini angallatinik 30 fodinit anginerusunik niuernermik tunngaveqartumik aalisarneq piffissami 1999-imiit 2013-imut ingerlanneqarsimasoq takutinneqarpoq. Aalisarneq ineriartortuaannartuuvoq, aammalu sumiiffiit nutaat ilaatinneqalersimasinnaasarput, taamatullu aalisarfitoqqat taamaatinneqarsimasinnaasarlutik. Assersuutigalugu avaleraasartoorniarneq annertunerusoq Tunup kujataani ineriartortinneqaleruttorpoq, aammalu ammassassuarniarluni, saarullernarniarluni ammassanniarlunilu aalisarneq ukiuni aggersuni pilersinnaasoq eqqarsaatigineqarsinnaavoq. Aalisarneq sajuppillatsitsisarluni misissuinermit, imaani sumiiffinni aalisarfiusartuni ingerlanneqartumit, sunnerneqarnissaa mattunneqarsinnaanngilaq, kisiannili sajuppillatsitsisarluni misissuinerit qalleraatsitsiviuneranni pisat annikillisimanerannik maannamut nalunaarutiginnittoqarsimanngilaq. Kalaallit Nunaata kitaani ikkannerni saarulleqaqqilissappat, sumiiffiit suffiffiusartut. suffinerup nalaani malussariffiusinnaasut aammalu sajuppillatsitsisarluni misissuinernut maleruagassiivigineqarnissaannik pisariaqartitsiviulersinnaasut eqqumaffigineqartussaapput.

36 Ilusiliaq 9. Piffissami imi kilisalluni suliaqarnerit. Nunap assingani angalaarfiit tamarmik takutinneqarput. Raajarniarluni, qaleralinniarluni aamma annikinnerusumik saarullinniarluni kilisanneq annertunerpaajuvoq, aammalu angalaartut eqimanerpaajusut takutinneqarluni. Taakkua nunap ilusaa (ikkannerit killingi) imaluunniit immap naqqata immikkut itissuseqarneri malikkajuttarpaat. Kilisannermut qassutit puttasut atorlugit avaleraasartoorniarluni aalisarneq aamma siusinnerusukkut suluppaagarniarneq, Kalaallit Nunaata kujataata imartaanni sumiiffinni annertunerusuni ingerlanneqarpoq, taamaattumillu tassani eqimassutsit annikinnerupput. Paasissutissat Kalaallit Nunaanni aalisarnermut nakkutilliisoqarfimmeersuupput aammalu Pinngortitaleriffimmit suliarineqarsimallutik. 36

37 Ilusiliaq 10. Piffissami 1999-imiit 2013-imut piniarnermi periaatsit iliuuseqarfiunngitsut atorlugit niunermik tunngaveqartumik aalisarneq. Nunap assingani qassutit, ningittakkat aamma pullatit eqimassusaat takutinneqarpoq, atortut ninginneqarfiinut immikkoortut nalunaarsorneqarlutik, aammalu tassani pingaartumik nipisanniarneq, qaleralinniarneq aamma saattuarniarneq ingerlanneqarpoq. Tamatuma saniatigut kilisaammik aalisarnerit pisoqqat amerlanngitsut ilaatinneqarput, kalittutut nalunaarsorneqaratik immikkoortutut nalunaarsorneqarlutik. Paasissutissat Kalaallit Nunaanni aalisarnermut nakkutilliisoqarfimmeersuupput aammalu Pinngortitaleriffimmit suliarineqarsimallutik. 37