RIDDERS OP REIS TURKYE - MEI 2016

Transcription

1 RIDDERS OP REIS TURKYE - MEI DIE REISVERHAAL Hierdie was my tweede keer in Turkye. Die eerste keer was in Mei 2013 saam met my dierbare familie. Ons was op die passasierskip die Norwegian Jade en was vir 'n dag in Izmir en twee dae in Istanbul. Hierdie pragtige ou stede het ons van die eerste sekonde af betower. Veral Istanbul met die bekende Blou Moskee, die Hagia Sophia, die indrukwekkende Topkapi Paleis van die klomp Ottomans, die Speserye Bazaar, die Grand Bazaar en vele meer. Hierdie keer was die besoek hoofsaaklik werk gewees, maar ek het darem so 'n paar dae gehad wat ek my toeriste stewels kon aantrek. Iets waarvoor ek baie lief is. Die eerste paar dae van my besoek was ek in Ankara gewees waar ons die GoFPEP kongres gehad het. Ek was die president van hierdie kongres in 2014 toe dit in Suid-Afrika aangebied is. Dit was dan ook heerlik gewees om weer al die internasionale vriende te kon sien. Die Sondag na die kongres is ek met die bus vanaf Ankara na Pamukkale. Ek was baie beïndruk met die hele busrit. Pragtige groot passasiersbus met 'n mini TV vir elke sitplek. Nie dat ek veel verstaan het nie, want die TV en flieks was alles in Turks. Dus het ek maar eerder musiek op my ipad geluister terwyl ek begin tik het aan hierdie reisverhaal. Hulle bedien gratis tee en koeldrank op die bus asook iets te ete. Gedurende die 7 ure rit van Ankara na Denizli, is ons drie keer bedien en alles was gratis. Dit vorm glo deel van jou kaartjie, het die knapie my beduie. Vriendelike ou Turk wat drie woorde Engels kon praat, maar ons het reggekom. Met 'n smile en gebaretaal kom mens ver. Ek het die kaartjie aanlyn bespreek en dit was verbasend maklik gewees. Die kaartjie het 70 Turkse Lira (ongeveer R350) gekos en jy kan jou sitpleknommer ook kies. Die bus het so elke twee ure gestop by die busstasies en ek was baie beïndruk met hoe skoon dit is. Daar is kos, water, koeldrank, toilette ens beskikbaar. Ek het vir R25 vir my 'n boks tuisgemaakte Turkish Delight gekoop en myself naar geëet. In Denizli het ek 'n minibus gekry en die 30 minute rit na die dorpie Pamukkale, het my 5TL gekos. In Pamukkale het ek in die White Heaven Hotel gebly en kan dit aanbeveel. Skoon, netjies, met baie vriendelike personeel. Ontbyt was ingesluit by die prys. Aandete kon jy van 'n spyskaart af eet en ek het al drie aande wat ek daar was regtig heerlik geëet. Onder andere steak en tjips. Glad nie duur nie. Die Pamukkale natuurwonder is een van die mooiste plekke wat ek in my hele lewe nog gesien het. 'n Jaar of wat gelede het ek 'n artikel gelees waarin die skrywer beweer het dit is een van die top 20 natuurwonders wat mens in jou leeftyd moet sien en hy was honderd persent reg. Ongelooflik mooi en indrukwekkend!!! 'n Plek wat enige reisiger op sy "bucket list" behoort te hê. Ek is die oggend vroeg die park in en het eers laatmiddag uitgekom nadat ek die hele dag daar rondgeloop het, geswem en alles terdeë geniet het. Soos die dag verander, verander ook die kleur van die water in die poele. Ongelooflik. Sien foto s P a g e

2 Van Pamukkale af is ek na Denizli waar ek by die Universiteit van Pamukkale gaslesings aangebied het. Ek was net een dag daar gewees, maar het dit baie geniet. Ek is gasvry ontvang en hulle het omtrent die 6 rooi tapyt vir my uitgerol. Ek het die nag in die Universiteit se gastehuis geslaap en moes die volgende oggend reeds 05:30 vertrek om betyds op die lughawe te wees vir my 08:00 vlug na Istanbul. Die lughawe is omtrent 'n uur se ry vanaf Denizli. As blyk van waardering het hulle vir my 'n kamerjas persent gegee. Giegiegie. Nogal vreemd, maar toe ek uitvind dit is 'n Maison D'Or kamerjas wat baie geld werd is, het ek die vreemde geskenk verstaan. Denizli is blykbaar bekend vir sy fabrieke wat kwaliteit nagklere maak en wêreldwyd uitvoer. Die laaste deel van my besoek aan Turkye, was twee nagte in Istanbul gewees en ek het in die Aybar Hotel tuis gegaan. Ek was beïndruk met die hotel se netheid en dit is stapafstand van 2 P a g e

3 Hagia Sophia, Topkapi Paleis, Blou Moskee, die Grand Bazaar ens. Hierdie keer het ek die Hagia Sophia besoek, aangesien dit met ons vorige besoek gesluit was. Wat n belewenis! Die plek is 1480 jaar oud en daar is in 537 nc begin met bouwerk. Vir die eerste ongeveer 900 jaar was dit onder andere n Grieks Ortodokse- en Rooms-Katolieke katedraal gewees. Daarna was dit n moskee gewees totdat dit in 1931 n museum geword het. Absoluut n besoek werd. Maak jou reg vir baie selfies en foto s. Sien foto s 7-8. Ek het vir oulaas lekker geshop, voordat ek huis toe gekom het en vir die sussies pragtige handsakke gekoop en vir my persoonlike vrou parfuum, tafeldoeke, n serp en asook n Turkse teestel en van die beroemde appeltee. My seun het die kamerjas persent gekry wat ek as geskenk gekry het in Denizli. 7 8 Dit was vir my n lieflike tyd in Turkye gewees. Hierdie pragtige historiese land met stede waarvan daar in die Bybel gepraat word, bekoor jou vandat jy die eerste dag daar aanland. Ek is mal oor die Turke. Hulle is gasvry, vriendelik en snaaks. Praat vrot Engels maar hulle harte is in die regte plek. Dit is ook, soos ek reeds gesê, n shoppers paradys. Spaar en gaan koop die leerjas en persiese tapyt van jou drome en redeneer met hulle totdat jy jou prys betaal. Geniet die kos en Turkse wyn. Jy sal nie spyt wees nie. 2. BESOEK AAN DIE PAMUKKALE NATUURWONDER Hierdie Unesco Wêreld Erfenisgebied bestaan nie net uit die pragtige spierwit kalksteen hange met die pragtige blou poele warm water nie, maar is ook is ook die tuiste van die ruïnes van die Grieks-Romeinse stad van Hierapolis. Met meer as twee miljoen besoekers per jaar, is dit Turkye se grootste toeriste trekpleister. 2.1 Kostes 1. Dit kos 35 TL (ongeveer R175) vir toegang tot die park. Die kaartjie is geldig vir die hele dag. Elke sent die moeite werd. 2. As jy wil swem in die antieke warmbron, wat ek baie sterk sal aanbeveel, kos dit jou 'n verdere 32TL (ongeveer R160). Kaartjie geldig vir twee ure. 3. Jy betaal 'n deposito van 10TL (R50) om 'n sluitkassie te kry vir jou stuff terwyl jy swem. Na die tyd kry jy weer jou geld terug. 3 P a g e

4 4. Daar is 'n knaap wat foto's neem terwyl jy swem. Foto kos 10TL en dit is vrek duur. Ek het maar een gekoop, want ek was alleen met niemand wat my kon afneem terwyl ek geswem het nie. 2.2 Wat om saam te neem 1. Kos en drinkgoed is baie duur in die park. Vat jou eie water/koeldrank saam en iets om te eet vir middagete. Ek vat sommer altyd by ontbyt 'n ekstra broodjie of vrug vir die dag en sit dit in my rugsak. 2. Onthou om 'n hoed te vat en sonblok. Ek was in die lente daar en dit was vrek warm. 3. Trek kort klere aan. Dit is eerstens lekker koel en tweedens meer gemaklik. Veral as jy wil swem. 4. Donkerbril is BAIE belangrik. Die wit rotse weerkaats geweldig en ten spyte van die feit dat ek een gedra het, was my oë die aand lekker seer. 5. Moenie jou swembroek en handdoek vergeet nie. "Leen" sommer 'n handdoek by die hotel. Jy kan in die pragtige poele water swem of dan ook in die antieke warmbron. 6. Vat plakkies, want jy loop die meeste van die tyd kaalvoet. Jy mag nie op die wit rotse en in die poele enige vorm van skoene dra nie. Jy kry dit egter nodig as jy die res van die park wil verken. 7. Kamera met genoeg geheue. Moenie jou selfiestok vergeet as jy alleen is nie. 2.3 Laastens 1. Maak jou reg om baie te loop. Ek het vir die dag amper treë geloop volgens my polshorlosie (a.k.a. my VIVOfit). 2. Vat genoeg water saam. Omdat dit warm is en mens baie loop, dehidreer jy redelik vinnig. 3. Gaan vroeg, want hier van 12 uur af raak dit baie besig. Busse met toeriste van Istanbul arriveer dan. 4. My hotel in die dorpie Pamukkale waar ek gebly het, was slegs 500 meter van die park se hek af. Ek het sommer geloop en dit was heerlik gewees. Naam van die hotel is die White Heaven. 5. Bly die hele dag in die park, want soos die die dag vorder, verander die kleur van die water in die poele. Dit is met een word gesê, ongelooflik. 6. Sien foto's 3. BESOEK AAN ISTANBUL 3.1 Wat om te besoek en kostes 1. Die Blou Moskee is wêreldbekend en moet saam met die Hagia Sophia bo-aan jou lysie wees. Die plek is meer as 400 jaar oud en kry die naam a.g.v die blou teëltjies wat dit 'n blou skynsel gee. Dit is gratis, maar BAIE BELANGRIK!! Vrouens se hoofde moet bedek wees en mans moet 'n langbroek aanhê. Dames, onthou dus om 'n kopdoekie saam te neem. Jy moet ook jou skoene uittrek voordat jy mag ingaan. Die ry is lank om in te gaan, dus gaan vroeg. Moenie Vrydae oor die middaguur gaan nie, want dan is dit toe. Die moslems bid. 4 P a g e

5 2. Die Hagia Sophia is soos die Blou Moskee, wêreldberoemd, en is defnitief die besoek werd. Dit kos 40TL om in te gaan en jy kan kaartjies by die plek koop. Omdat dit 'n museum is, hoef vrouens nie hulle hoofde te bedek nie en kan mans met kortbroeke ingaan. Die plek is 1480 jaar oud en was eers 'n kerk toe 'n moskee en nou is dit 'n museum. Die ry is lank om in te gaan, dus gaan vroeg. 3. Die Grand Bazaar is 'n belewenis. Die Turke maak jou gek en probeer almal om iets aan jou te verkoop. Loop rustig rond en geniet die pragtige leer, tapyte en al die pragtige Turkse tafeldoeke, serpe en alles en nog wat. 4. Bootrit op die Bosphorus is absoluut die moeite werd. Daar is enige gegewe tyd tussen 50 tot 70 groot skepe op hierdie beroemde stuk see. 5. Die Topkapi Paleis van die Ottomans. Hierdie klomp sultans was op hulle dae die magtigste en rykste van hulle soorte in die wêreld. Die prag en praal van hierdie paleis is verstommend en dit kos jou 40 TL om in te gaan. 6. Oorweeg om 'n museumpas te koop vir 85 TL. Dit is geldig vir 5 dae en gee toegang tot alle museums. Jy kan dit ook aanlyn koop. 7. Wat kan ek sê oor die Speserye Bazaar. 'n Absolute warboel van mense, geure en kleure. By beide bazaars moet jy mooi kyk na jou stuff. Veral jou geld. Dra dit aan jou lyf op 'n veilige plek. Daar waar niemand sal vat sonder om slae te kry nie. 4. ALGEMENE REISWENKE VIR TURKYE 4.1 Visum Die wonderlike nuus is dat om 'n visum vir Turkye te kry, makliker is as om my vrou se Lindt Tjoklits te steel. Jy doen dit aanlyn en dit vat jou maksimum 15 minute. Hulle e-pos dit vir jou in die vorm van 'n pdf lêer en jy kan dit uitdruk of 'n elektronies kopie daarvan stoor. Dit hoef nie in jou paspoort ingeplak te wees nie. So maklik soos dit. 4.2 Vervoer 1. As jy binnelands wil vlieg is Turkish Airlines regtig baie goed. Bietjie aan die duur kant, maar effektief. Die Ataturk lughawe in Istanbul is nogal besig en ek het bietjie gesukkel om die hotel se gratis bussie in die hande te kry. 2. Die lughawens by Ankara en Denizli is klein, maar effektief. Denizli s'n is nie veel groter as George se lughawe nie en omtrent 'n uur se ry vanaf die stad met 'n motor. 3. As jy tyd op jou hande het, ry met die groot passasiersbusse. Bespreek jou kaartjie aanlyn. Jy sien die platteland en ervaar iets van die ou Turkye en dit is baie veilig. Die bus stop so elke twee ure en die busstasies is pragtig skoon. Toilet kos jou 1 TL (ongeveer R5) en is skoon. Daar is kos en water te koop by al die plekke waar gestop word. Hulle bedien ook tee en kos op die bus - alles gratis en deel van 9 jou kaartjie. Ek het van die Pamukkale Busdiens gebruik gemaak. Hulle is landwyd (sien foto 9). 5 P a g e

6 4. Beide Ankara en Istanbul het moltreine of metro's. In Istanbul kan jy ook met die trem ry. Dit is baie goedkoop en 'n rit kos jou nie meer as 3 TL (ongeveer R15) nie. Jy kan ook vanaf die lughawe in Istanbul met die metro inry stad toe. 5. Taxis is aan die duur kant en ek is oor die algemeen nie lief om taxis te gebruik nie. Ek sal nie sommer 'n taxi aanbeveel nie. Ek vertrou hulle ongelukkig nie en het al slegte stories gehoor van Turkse taxibestuurders. 4.3 Verblyf 1. Ek het in Istanbul, Ankara en Pamukkale in goeie hotelle gebly. Ek bespreek al my verblyf op booking.com. Het nog nooit 'n probleem gehad nie. 2. Ek maak veral baie staat op die kommentaar van mense. As 10 vorige kliënte sê die hotel is vuil, dan kan jy daarop peil trek. Ek steur my nie aan mense wat oor snert kla nie. Veral die Amerikaners en die Engelse. Hulle kla oor alles. Van die klagtes wat ek al gesien het is: Kussings is te hard, TV is te klein, koffie by ontbyt was te sterk. Regtig?! Belaglik! As jy wil reis moet jou soms dinge vat soos jy dit kry. 3. Daar is geen verskuilde kostes nie. Maak net seker as jy bespreek ontbyt is ingesluit by die prys. Booking.com dui dit duidelik aan. 4.4 Kommunikasie 1. Die klomp Turke praat maar vrot Engels. Klink omtrent soos my generasie Namibiërs. Dad het altyd gesê in Duitswes praat ons net Engels uit selfverdediging. Mens kom egter reg, want met 'n glimlag en gebaretaal kom jy ver. 2. Die hotelle het almal WiFi gehad. Die sein was nie altyd so sterk in die kamers nie, maar dan gaan sit mens maar in die sitkamer by ontvangs. Gewoonlik is daar sterk sein. 3. Die Turke is werklik 'n vriendelike klomp wat graag wil help. Veral op die platteland. Geen moeite is te veel nie. 4. Wees versigtig in die stede vir glibberige manne. Veral in Istanbul. Jy sal hulle sommer op 'n myl sien, veral op die lughawe. Hulle wil alles aan jou afsmeer en verkoop. Vervoer, sambrele, toere, poskaarte ens. Ignoreer hulle net. Hulle het ook 'n oog vir 'n mooi jong meisie, veral blondines, dus indien daar sulke dames in jou groep is hou hulle fyn dop. 4.5 Eet en drink 1. Ek het lekker geëet oral in Turkye. Hulle kos is nie duur nie en hulle eet ook graag vleis en brood. Veral hulle gebraaide kebabs is regtig lekker. Ek is maar versigtig vir uiteet as ek in die buiteland is, want dit kan jou baie geld kos. Veral in Europa. In Turkye egter is dit nie duur om uit te eet nie en hulle maak daarvan 'n heerlike kuiergeleentheid. 2. Hulle eet baie soos die Grieke. Mediterreense eetstyl en lief vir olywe, tamaties, verskillende soorte kaas, slaai, tamatie en olyf pestos, komkommer ens. Hulle sit 'n klomp geregte voor jou neer en almal eet saam uit die bakke uit. Iets waarvan ek baie hou. Dit is baie gesellig. 3. Koop maar jou water en koeldrank by die supermark. Die hotelle s'n is soos gewoonlik duur. 4. Trek erens jou stoute skoene aan en koop vir jou tuisgemaakte Turkish Delight en eet jouself naar. Absoluut die moeite werd. 6 P a g e

7 5. Hulle is baie lief vir tee en drink dit ook baie uit sulke koddige glasies. Ek is nie 'n vreeslike teedrinker nie, maar het die tee geniet. Hulle appeltee is baie beroemd. 6. Turkse koffie is wêreldbekend. Ek is 'n koffiepens, maar hulle koffie is ongelooflik sterk. Dit skop jou lewer deurmekaar. Jy drink dit soos espresso saam met bietjie water, maar dit is net 3 keer sterker as die espresso wat ek ken. Eisch! 7. Ek hou van die Turkse bier. Bier soos EFES en Toborg is baie lekker. Sien foto Die eerste rooiwyn wat ek in Ankara gedrink het, het bietjie soos parafien gesmaak. Rondom Denizli egter is daar heelwat wingerde en ek het selfs 'n wynkelder gesien. Die wyn was heerlik. Veral die een versnit tussen 'n Shiraz, Cabernet S en 'n Turkse kultivar wat ek nie ken nie, was lieflik. 9. In Istanbul bederf party restaurante jou met Turkse brood. Gratis. Word van pizza deeg gebak en is hol aan die binnekant. Word bedien met olyf pesto. 10. Ek kan die Faros restaurant aanbeveel. Dit is naby die Hagia Sophia en die Aybar Hotel waar ek gebly het. Het heerlik daar geëet. 4.6 Inkopies 1. Persiese tapyte is enige vrou se droom en 'n man se nagmerrie. Hulle is vrek duur. Ek weet dit is kwaliteit en duursaam en hou vir 'n leeftyd al daardie mooi dinge, maar as jy gelukkig is, is dit 250 US doller vir 'n medium mat en 450 US (ongeveer R7000) vir 'n groot mat. Dit bly baie geld, veral met ons rand wat so swak is. Dus spaar vooraf as jy vir jou 'n mat wil koop. 2. As jy 'n groot mat koop, stuur hulle dit vir jou Suid-Afrika toe teen ekstra koste. Kleiner matte vat jy sommer saam op die vliegtuig as handbagasie. 3. Vir tussen 30 to 50 TL kan jy vir jou pragtige handgemaakte tafeldoeke koop. Regtig goeie waarde vir geld. 4. Dan is daar natuurlik pragtige leerhandsakke, leerbaadjies ens. 5. Istanbul is 'n inkopie paradys. Die Turke is baie goeie besigheidsmanne. Ek sal nie sê skelm nie, glad nie, maar hulle is vindingryk. Mens moet hulle maar fyn dophou. 4.7 Geldeenheid en betaling Die geldeenheid is die Turkse Lira. Tans (Mei 2016) betaal jy ongeveer R5 vir 'n Turkse Lira 2. By die meeste plekke kan jy met 'n kredietkaart betaal. Ek gebruik graag VISA, maar die ander kaarte werk ook goed. 3. Jy kan ook op baie plekke met Euro betaal. Wees net versigtig, want hulle laai die pryse as hulle weet jy betaal met Euro. 4. Jy kan ook op die meeste plekke geld omruil. Orals is daar ook kitsbanke waar jy kan geld trek met jou kredietkaart. Laasgenoemde is soms die beste en veiligste opsie. Tref net reëlings met jou bank vooraf as jy jou kaart in die buiteland wil gebruik. Onthou jy betaal 'n internasionale fooi. 7 P a g e

8 5. HOOGTEPUNTE 1. Defnitief die besoek aan Pamukkale en die ruïnes van die stad Hierapolis 2. Lieflike uiteetaand saam met die kollegas van die Universiteit van Pamukkale in Denizli (sien foto 11). 3. Besoek aan die Hagia Sophia in Istanbul. Die plek is 1480 jaar oud. Indrukwekkend EK IS SPYT OOR... keer....die feit dat ek nie genoeg tyd gehad het om Cappadocia te besoek nie. Volgende 7. ONTHOU 1. Reis is fantasties, maar dit is nie vir sissies nie!!! 2. Maak altyd afskrifte van jou paspoort/visum en hou dit in jou tas. Neem dit ook af met jou foon of ipad. 8. VYF KITSFEITE VAN TURKYE 1. Ankara is die hoofstad en nie meer Istanbul soos in die ou dae nie. Ankara het die hoofstad geword in 1923 toe Turkye 'n republiek geword het. 2. Istanbul het in die Bybelse tyd bekend gestaan as Konstantinopel. Dit is 'n baie, baie ou stad en bronne beweer die stad is tot so oud is as 3000 jaar. Die Bosphorus is die stuk see in Istanbul wat letterlik die skeiding is tussen Europa en Asië. 3. Pamukkale beteken letterlik "Kasteel van Watte" en dit is 'n perfekte naam. 4. Ataturk is 'n groot held in Turkye en die mense het geweldig respek vir hom. Mustafa Ataturk het Turkye gehelp om 'n republiek te word in 1923 nadat die mense vir baie jare onder die Ottoman bewind gely het. Die klomp Ottoman Sultans was baie wreed en die een was meer behep met mag en geld as die ander. Ataturk was dan ook die eerste president van die Republiek van Turkye. 5. Omdat die Nederlanders groot is op Tulpe sou mens dink Tulpe kom van daar af. Tulpe kom egter oorspronklik van Turkye af en is reeds so vroeg as 1000nC deur die Turke gekweek. Die blom het eers in die 1700's in Holland posgevat. Travel and fill your life with experiences, not things. Have stories to tell, not stuff to show. Hans de Ridder 6 Junie P a g e