GEBED VIR KERKLEIERS

Transcription

1

2

3 GEBED VIR KERKLEIERS HERE, Ek dank U vir ons geestelike leiers wat U aan die liggaam van Christus gegee het om ons te bewaar van elke gevaar, die waarheid in liefde te spreek en ons toe te laat om te groei in U. Seën ons leiers, Here, dat hulle die kerk sal bestuur volgens U wil. Help hulle om ware herders te wees wat omgee vir die skape, wat hulle nooit wil sien verlore gaan nie en wat omsien na hulle welsyn. Help my om hulle te ondersteun, om beskikbaar te wees as hulle hulp nodig het en om vir hulle te bid. Soos Aaron en Hur die arms van Moses opgehou het in die hitte van die stryd, wil ek graag hulle arms omhoog hou. Vul ons leiers met die kennis van U wil in wysheid en geestelike insig. Laat hulle wandel U behaag en mag hulle vreugdevol wees in elke goeie werk en mag hulle daagliks toeneem in kennis van U. Vermenigvuldig U genade en vrede aan hulle deur die kennis van God en Jesus. Mag hulle deur U verhoog word omdat hulle hul nederig hou, rein harte het en U woord eerste stel. Stel u geregtigheid, vrede en blydskap vry in hulle lewens. Laat u koninkryk kom en U wil geskied in hulle soos dit in die Hemel is. Seën hulle en vul hulle met u Gees. Bewaar hulle van elke versoeking. Hou hulle lewens heilig en rein voor u. Beskerm hulle geliefdes van die vyand. Maak hulle voorspoedig en gee hulle gesondheid. Seën hulle finansieël. Gee aan hulle helpers wat gevul is met die Heilige Gees en vol wysheid, aan wie hulle opdrag kan delegeer sodat hulle hulself kan toewy aan die bediening van die Woord. Gee aan hulle die vreugde om elke familielid gered te sien. Seën hulle familielewe met spesiale liefde en harmonie. Here, ek bid dat hulle u altyd sal onthou, hulle eerste liefde nie sal verlaat nie. Mag hulle die liefdesverhouding met u koester en bewaar en daardeur nader aan u groei.

4 GEESTELIKE LEIERS Vader, in die naam van Jesus, bid en bely ek dat die Gees van die Here op ons geestelike leiers sal rus. Die gees van wysheid en vermoë, die gees van insig, onderskeiding en mag, die gees van kennis. Ons bid dat as U gees op ons leiers rus, U hulle vinnig insig sal gee omdat u hulle gesalf het en toegerus het om die evangelie te bring aan die swakkes, armes, rykes en gebrokenes. U het ons leiers gestuur om te help om die gebrokenes van hart te genees, om vryheid uit te roep oor die gevangenis en hulle vry te laat en die oë te open van die wat gebind is. Ons geestelike leiers sal priesters van die Here genoem word en mense sal van hulle praat as leraars van God. Ek bid en glo dat geen wapen wat teen hulle gevorm word iets sal uitrig nie en geen komplot wat teen hulle beplan word, voorspoedig sal wees nie. Ek bid dat u hulle voorspoedig sal maak geestelik, fisies en finansieël. Ek bely dat ons leiers vas sal hou aan U woord en gesonde leering sal verkondig. Ek bid dat hulle die waarheid sal bewaar wat aan hulle toevertrou is deur die Heilige Gees wat in hulle woon. Here ek bid en glo dat hulle elke dag die vrymoedigheid sal hê om U evangelie te verkondig aan mense. Dankie Here vir die bonatuurlike krag waarmee U hulle sal toerus. Ek bely dat ek hulle sal ondersteun met my gebede. Dat ek voor hulle slegs sal bely wat opbouend is en dat ek hulle nie sal oordeel nie, maar sal aanhou om vir hulle by die Vader in te tree en seëninge oor hulle uit te spreek in Jesus naam. Dankie Jesus, vir U verhoring van die gebed. Jesaja 11: Tim 1:13 14 Jesaja 61: 1,6 Efesiers 6: 19-20

5 GEBED VIR EENHEID VADER in die naam van Jesus, het ons die vertroue dat as ons U iets vra volgens u wil, u ons sal verhoor. Vader, U sê in u Woord, En die Here sê: Daar is hulle nou een volk en het almal een taal! En dit is net die begin van hulle onderneming: nou sal niks vir hulle meer onmoontlik wees van wat hulle van plan is om te doen nie. (Gen 11:6). Ons bid dat in U naam al ons geestelike leiers in perfekte harmonie en volle ooreenstemming sal wees in wat hulle sê. Dat daar geen verdeeldheid onder hulle sal wees nie, maar dat hulle saam gebind sal wees in hulle opinies en beoordelings. Heilige Gees, leer hulle om saam te stem oor alles. Ons bid dat hulle as verskeie dele van die liggaam van Jesus Christus in nederigheid, onselfsugtigheid en geduld met mekaar sal verdra en aanvaar. Ons bid ook dat hulle sal streef om die eenheid te bewaar wat deur die Heilige Gees daar gestel is met die bindende krag van vrede. Ons vra dat deur die krag van God wat in hulle werk hulle een van gedagte sal word, empatie met mekaar en liefde teenoor mekaar sal hê. Dat hulle nooit kwaad vir kwaad sal vergeld nie, maar mekaar sal seën en vir mekaar sal bid vir welstand, geluk en beskerming. Vader, dankie dat hulle een mag wees soos U en Jesus een is. Jesus in hulle en U in Jesus sodat hulle volkome een kan word en dat die wêreld mag weet dat U Jesus gestuur het. Dat U hulle lief het soos U Jesus lief gehad het. Vader, laat U wil geskied soos in die hemel so ook op die aarde.

6 BID DIE VOLGENDE GEBEDE UIT DIE NUWE TESTAMENT Efesiers 1 : Ek hou ook nie op om dankie te sê vir ons leiers as ek aan hulle in my gebede dink nie, dat die God van onse Here Jesus Christus, die Vader van die heerlikheid, aan hulle die Gees van wysheid en openbaring in kennis van Hom mag gee, verligte oë van hul verstand, sodat hulle kan weet wat die hoop van sy roeping en wat die rykdom van die heerlikheid van sy erfdeel onder die heiliges is; en wat die uitnemende grootheid van sy krag is vir jul wat glo, na die werking van die krag van sy sterkte wat Hy gewerk het in Christus toe Hy Hom uit die dode opgewek het en Hom laat sit het aan die regterhand in die hemele, bo alle owerheid en mag en krag en heerskappy en elke naam wat genoem word, nie alleen in hierdie wêreld nie, maar ook in die toekomstige. En Hy het alle dinge onder sy voete onderwerp en Hom as Hoof bo alle dinge aan die gemeente gegeee, wat sy liggaam is, die volheid van Hom wat alles in almal vervul. En Vader, Ek bid ook Efesiers 3 : Om hierdie rede buig ek my knieë voor die Vader van onse Here Jesus Christus, van wie elke geslag in die hemele en op die aarde sy naam ontvang, dat Hy aan hulle mag gee na die rykdom van sy heerlikheid om met krag versterk te word deur sy Gees in die innerlike mens, sodat Christus deur die geloof in hulle harte kan woon, hulle wat in die liefde gewortel en gegrond is; en hulle in staat kan wees om saam met al die heiliges ten volle te begryp wat die breedte en lengte en diepte en hoogte is, en die liefde van Christus te ken wat die kennis oortref, sodat hulle vervul kan word tot al die volheid van God. Ek bid Kolossense 1 : 9-11 Daarom hou ons ook nie op nie, van die dag af dat ons dit gehoor het, om vir hulle te bid en te vra dat ons geestelike leiers vervul mag word met die kennis van sy wil in alle wysheid en geestelike insig, sodat hulle waardiglik voor die Here mag wandel om Hom in alles te behaag en hulle in elke goeie werk vrug mag dra en in die kennis van God mag groei, en met alle krag bekragtig mag word volgens die mag van sy heerlikheid tot alle lydsaamheid en lankmoedigheid met blydskap.

7 GEBED GEHOORSAAMHEID HERE, U sê in u Woord dat U nie sal luister as ons sonde in ons hart het nie ( Psalm 66 : 18). Ek wil hê dat U my gebede hoor, dus vra ek U om aan my te openbaar as daar enige sonde in my lewe is, veral ten opsigte van my geestelike leiers. Wys my as ek selfsugtig, liefdeloos, krities, toornig, gegriefd, onversoenlik of verbitterd teenoor hom is. Wys my waar ek U nie gehoorsaam of volgens u weë leef nie. Ek bely dit as sonde en vra U vergifnis. Ek bid dat U vir ons leiers n begeerte sal gee om in gehoorsaamheid aan u wet en u weë te leef. Openbaar en roei enigiets uit waaraan hulle gewillig plek gee en wat nie van U is nie. Help hulle om elke gedagte en daad onder u beheer te stel. Herinner hulle daaraan om goed te doen, van niemand kwaad te praat nie, nie rusie te soek nie en inskiklik en altyd bedagsaam teenoor almal te wees. (Titus 3: 1,2). Leer geestelike leiers om die pyn en spanning wat met dissipline en dissipelskap gepaard gaan, aan te gryp. Beloon hulle omdat hulle reg doen en omdat hul hande skoon is (Psalm 18 : 21). Maak u wil aan ons leiers bekend, Here, leer hulle U paaie. Laat U waarheid hulle lei en onderrig hulle daarin, want U is God, hul redder ( Psalm 25 : 4,5 ). Maak ons leraars vol lofprysing, want ek weet dat ons duidelike begrip ontvang, dat ons lewens verander word, en dat ons krag ontvang om volgens u weë te leef wanneer ons U aanbid. Help hulle om u spesifieke opdragte vir hulle te hoor en stel hulle in staat om dit te gehoorsaam. Gee ons leraars harte wat begeer om u wil te doen en gee dat hulle die vrede sal ervaar wat net uit n lewe van volkome gehoorsaamheid aan U gebooie kan voortspruit. My seun, wat ek jou leer moet jy nie vergeet nie, hou vas aan wat ek jou voorskryf, want dit sal vir jou n lang lewe verseker, dit sal maak dat jy n vol lewe het. Moenie dat liefde en trou by jou ontbreek nie; leef daarmee saam, maak dit n deel van jou lewe. Spreuke 3: 1-3 Nie elkeen wat vir My sê: Here, Here, sal in die koninkryk van die hemel ingaan nie, maar net hy wat die wil doen van my Vader wat in die Hemel is. Matt.7 : 21 As iemand hom doof hou vir die wet van die Here, sal die Here n afsku hê van so n man se gebed. Spreuke 28 : 9 Julle moet My gehoorsaam. Dan sal Ek julle God wees en julle sal my volk wees. Maar julle moet leef soos Ek julle beveel sodat dit met julle goed kan gaan. Jeremia 7 : 23

8 GEBED VIR N MUUR VAN BESKERMING VADER, in die Naam van Jesus, lig ek die geestelike leiers op na U en vra U beskerming rondom hulle. Ek dank U Vader dat U n muur van vuur rondom hulle is. (Sagaria 2 : 5) En dat u u engele opdrag gee om n laer om hulle te trek. (Psalm 34 : 8) Ek dank u Vader dat hulle wat skuil in die skuilplek van die Here, skuil in die skadu van die Almagtige. Here U is vir hulle n veilige vesting, op U sal hulle vertrou. (Psalm 91 : 1-2) U bedek hulle met u vleuels en onder u vlerke sal hulle skuil. Ons geestelike leiers sal nie bevrees wees vir die skrikwind in die nag nie en ook nie die vurige pyle bedags nie. (Psalm 91 : 4 5) Omdat ons leiers u as hulle veilige vesting gekies het, sal geen onheil hulle tref nie geen ongeluk sal oor hulle kom nie, ook sal geen pes of plaag naby hulle kom nie. U gee u engele opdrag om hulle te beskerm, en hulle op U weë te hou. (Psalm 91 : 6) Vader, omdat ons leiers u lief het, sal U hulle verlos. Hulle sal u aanroep en u sal hulle antwoord. U sal met hulle wees in tye van nood en u sal hulle seën met n lang lewe. (Psalm 91 : 14 16) Geen haar sal van hul hoof val en u nie daarvan weet nie. (Lukas 21 : 18)

9 GEBED HUWELIK HERE, ek bid dat U ons leiers se huwelike sal beskerm teen enige iets wat dit sou kon beskadig of vernietig. Beskerm hulle teen hul eie selfsug en nalatigheid, teen die bose planne en begeertes van ander en teen ongesonde of gevaarlike situasie. Gee dat daar geen gedagtes van egskeiding of ontrouheid in hulle harte of in hulle toekoms sal wees nie. Bevry hulle van pyn uit die verlede, herinneringe en bande met vorige verhoudings en onrealistiese verwagtinge van mekaar. Ek bid dat nie een van hulle enige jaloesie sal koester, of n swak selfbeeld sal hê wat jaloesie voorafgaan nie. Gee dat niks, veral invloed soos alkhol, dwelms, dobbelary, pornografie, wellus of obsessies, in hulle harte of gewoontes sal insluip wat hul huwelik op enige manier sal kan bedreig nie. Verenig hulle huwelike in n verbond van vriendskap, verbintenis, groothartigheid en begrip. Elimineer hul onvolwassenheid, vyandigheid, of gevoelens van ontoereikenheid. Help hulle om tyd te maak vir mekaar om alleen te wees, om die huwelik te voed en te vernuwe en hulself te herinner aan die redes waarom hul in die eerste plek getrou het. Ek bid dat ons leraars so tot U verbind sal wees, Here, dat hulle verbintenis tot hul vroue nie sal wankel nie, maak nie saak watter storms kom nie. Ek bid dat hulle liefde vir mekaar elke dag sterker sal word sodat hulle nooit n erfenis van egskeiding aan hulle kinders sal nalaat nie. SKRIFVERWYSING Twee vaar beter as een. Hulle inspanning kom tot iets. As die een val, kan die ander hom ophelp. Maar as een val wat alleen is, is daar niemand om hom op te help nie. Prediker 4 : 9-10 Beheers julle, moenie ontrou wees aan die vrou met wie jy van jou jeug af getroud is nie. Die Here die God van Israel sê Hy haat egskeiding. Egskeiding is niks anders as geweld nie, sê die Here die Almagtige. Beheers julle, moenie ontrou wees nie. Maleagi 2 : 15b,16 Die huwelik moet deur almal eerbaar gehou word. Wees in die huwelikslewe getrou aan mekaar, want ontugtiges en egbrekers sal onder die oordeel van God kom. Hebreërs 13 : 4 As twee langs mekaar slaap, word hulle warm, maar hoe sal een wat alleen is, warm word? Prediker 4 : 11 Die getroudes beveel ek nee, nie ek nie, maar die Here dat n vrou nie van haar man mag skei nie. As sy tog skei, moet sy daarna ongetroud bly of haar met haar man versoen. Net so mag n man ook nie van sy vrou skei nie. 1 Korintiers 7 : 10-11

10 HERE, ek bid dat U ons leiers met U genesende hande sal aanraak. Gee dat elke deeltjie van hulle liggame sal funksioneer soos U dit ontwerp het. Waar enige iets uit balans is, laat dit volmaak werk. Genees hulle van enige siektes, ongesteldheid, beserings, gebrek of swakheid. Maak hulle liggame sterk om hul werklas te dra en waar hulle slaap, gee dat hulle volkome uitgerus, met nuwe krag en verfris sal wakker word. Gee hulle n sterk hart wat nie sal ingee nie. Ek bid dat ons leiers die begeertes sal hê om hul liggame te versorg, die soort kos te eet wat gesondheid in die hand werk, gereelde oefeninge te kry en enige iets wat vir hulle nadelig sal wees te vermy. Help hulle om te verstaan, dat hul liggaam n tempel is en dat hulle dit as sodanig moet versorg. ( 1 Kor 3:16) Ek bid dat ons leraars hul liggame sal gee as n lewende en heilige offer wat vir U aanneemlik is. (Romeine 12 : 1) Wanneer hulle siek is, bid ek dat U hulle sal bystaan en genees. Vul hulle met U vreugde om hul krag te gee. Ek bid in besonder vir energie om hul take te verrig. Gee hulle geloof om te sê: Here my God, ek het na U geroep om hulp en U het my gesond gemaak. (Psalm 30 : 3). Dankie Here, dat U my Geneser is. Ek bid dat ons leraars n lang en gesonde lewe sal hê en dat wanneer die dood kom, dit met vrede en nie met ondraaglike lyding en angs sal gepaard gaan nie. Dankie Here dat U daar sal wees om hulle in U teenwoordigheid te verwelkom en dat dit nie n oomblik voor die tyd wat deur U bepaal is, sal wees nie. GEBED GESONDHEID Loof die Here, o my siel, en vergeet geeneen van sy weldade nie! Wat al jou ongeregtigheid vergewe, wat al jou krankhede genees. Psalm 103 : 2-3 Toe het hulle die Here aangeroep in hulle benoudheid; uit hul angste het Hy hulle verlos. Hy het sy woord uitgestuur dat Hy hulle kon gesond maak en hulle uit hul kuile red. Psalm 107 : Ek het jou gebed gehoor, Ek het jou trane gesien, kyk Ek sal jou gesond maak. 2 Konings 20 : 5 Dan sal jou lig deurbreek soos die dageraad en jou genesing skielik uitspruit; en jou geregtigheid sal voor jou uit gaan, die heerlikheid van die Here jou agterhoede wees. Jesaja 58:8 Kyk, Ek laat vir die stad genesing en gesondmaking tot stand kom en sal hulle gesond maak en aan hulle openbaar n oorvloed van duursame vrede. Jeremia 33 : 6

11 HERE, ek bid dat ons leiers U roeping op hulle lewens duidelik sal hoor. Help hulle om te besef wie hulle in Christus is en gee hulle die oortuiging dat hulle vir n hoër doel geskep is. Mag hulle geestesoë so verhelder dat hulle sal weet watter hoop U roeping inhou. (Efesiërs 1 : 18). Here, wanneer U ons roep, stel U ons ook in staat om te luister. Stel hulle in staat om die lewe waartoe U hulle geroep het waardig te wees, sodat hulle manne van God kan word wat U hulle geskep het om te wees. Herinner hulle voortdurend waarvoor U hulle geroep het en gee dat hulle nie op n syspoor geneem word deur dinge wat nie vir u doel noodsaaklik is nie. Vernietig moedeloosheid sodat dit ons leiers nie sal oorweldig nie. Laat hulle by die omstandighede van die oomblik verbykyk sodat hulle die doel waarvoor U hulle geskep het, kan sien. Gee hul geduld om op U volmaakte tydsberekenig te wag. Ek bid dat die begeertes van hulle harte nie in stryd met U begeertes sal wees nie. Gee dat hulle u aangesig sal soek vir leiding en sal hoor wanneer u tot hul gemoed spreek. GEBED VIR SY DOEL Maar elkeen het van God sy besondere gawe ontvang, die een dit en die ander iets anders. 1 Kor 7:7 Verder moet elkeen in die omstandighede bly wat die Here vir hom gegee het. Hy moet bly wat hy was toe God hom geroep het. 1 Kor 7 : 17 Daarom bid ek ook altyd vir julle: Mag ons God julle waardig maak vir die lewe waartoe Hy julle geroep het, en mag Hy deur sy krag julle liefde vir die goeie en die werk van die geloof volkome maak. 2 Tess 1 : 11 Ek bid dat die God van ons Here Jesus Christus, die Vader aan wie die heerlikheid behoort, deur sy Gees aan hulle wysheid gee en Hom so aan hulle openbaar dat hulle Hom werklik kan ken. Ek bid dat Hy hulle geestesoë so verhelder dat hulle kan weet watter hoop sy roeping inhou en watter rykdom daar is in die heerlike erfenis wat Hy vir die gelowiges bestem het en hoe geweldig groot sy krag is wat Hy uitoefen in hul wat glo. Efesiërs 1 : Mag Hy u gee wat u hart begeer en al u voornemens laat geluk. Ps.20 : 5

12 GEBED HUL WERK HERE, ek bid dat U die werk van ons geestelike leiers se hande sal seën. Gee dat hulle arbeid nie net guns, sukses en voorspoed sal bring nie, maar ook groot vervulling. As hul bediening nie in ooreenstemming is met dit wat U volmaakte wil vir hul lewe is nie, openbaar dit aan hulle. Wys hulle wat hulle moet verander en lei hulle op die regte pad. Gee ons leraars krag, geloof en n toekomsvisie sodat hulle bo enige geneigdheid tot luiheid kan uitstyg. Gee dat hulle nooit weens vrees, selfsug of n begeerte om verantwoordelikheid te vermy van werk sal vlug nie. Gee hulle die vermoë om hulle sukses te geniet sonder om na meer te streef. Help hulle om uit te blink, maar bevry hulle van die druk om dit te doen. Ek bid dat U Heer van hulle roeping sal wees en dat hulle u in elke aspek van hul werk sal plaas. Gee hulle genoeg vertroue in die gawes wat U hulle gegee het om hul in staat te stel om goeie werk te doen. Open deure van geleenthede vir hulle bedieninge wat geen mens kan toemaak nie. Ontwikkel hul vaardighede sodat dit elke jaar steeds in waarde sal toeneem. Ek bid dat hul bedieninge gevestig, veilig, suksesvol, bevredigend, en finansieël lonend sal wees. Gee dat hulle nie in toewyding (sal) verslap nie, altyd geesdriftig (sal bly), die Here (sal dien) (Romeine 12 : 11). Laat hulle wees soos bome wat by waterstrome geplant is, wat op die regte tyd vrugte dra. Gee dat hulle nooit onder druk sal ingee nie, maar sterker sal word en voorspoedig sal wees in alles wat hulle aanpak (Psalm 1 : 3) SKRIFVERWYSING Jy sien self: iemand wat vaardig is in sy werk, kom in diens van konings, nie in die diens van mense sonder aansien nie. Spreuke 22 : 29 Moet jou nie afsloof om ryk te word nie en moenie jou sin vir waardes verloor nie. Jy het nog skaars die rykdom gesmaak of dit is weg; dit kry vlerke en vlieg die lug in soos n arend. Spreuke 23 : 4-5 Wat sal dit n mens help as hy die hele wêreld as wins verkry maar sy lewe verloor, of wat sal n mens gee in ruil vir sy lewe? Matteus 16 : 26 Luiheid laat die dak inval, slap hande laat die huis lek. Prediker 10 : 18 Laat die goedheid van die Here ons God belewe: hou die werk van ons hande in stand, ja, die werk van ons hande, hou dit in stand. Psalm 90 : 17

13 GEBED HUL INTEGRITEIT HERE, ek bid dat U ons geestelike leiers manne en vroue van integriteit sal maak, volgens U standaarde. Gee hulle die krag om te sê Ja wanneer hulle Ja moet sê en die moed om Nee te sê wanneer hulle Nee moet sê. Stel hulle in staat om standpunt in te neem vir dit wat hulle weet is reg en om nie te huiwer onder die druk van die wêreld nie. Gee dat hulle nie iemand sal wees wat altyd iets wil leer, maar tog nooit tot die kennis van die waarheid kan kom nie (2 Tim 3 : 7). Gee hulle in plaas daarvan n ontvanklike gees wat bereid is om te luister na die stem van wysheid en om te groei in U weë. Maak hulle manne wat die waarheid nastreef. Help hulle om altyd met U Gees van waarheid te wandel (Joh. 16 : 13). Help hulle om van die waarheid te getuig sodat hulle met selfvertroue daarvolgens kan handel wanneer druk op hulle uitgeoefen word (John 1 : 7-8). Wanneer ons leiers in hierdie en ander opsigte fouteer, gee hulle n hart wat gou hulle foute bely, want U sê in U Woord As ons beweer dat ons nie sonde het nie, bedrieg ons onsself en is die waarheid nie in ons nie. Maar as ons ons sondes bely Hy is getrou en regverdig, Hy vergewe ons ons sondes en reinig ons van alle ongeregtigheid (1 Joh. 1 : 8-9). Gee dat hulle nie mislei sal word nie. Gee dat ons leraars op geen manier sal huigel nie. Moenie dat liefde en trou by hulle ontbreek nie, laat hulle daarmee saamleef, dit n deel van hul lewe maak en so guns verwerf en byval vind by God en mens. (Spreuke 3 : 3-4) Liewer arm wees en eerbaar lewe as oneerlik lewe en ryk wees. Spreuke 28: 6 Die opregtheid van eerlike mense bepaal hulle koers; die valsheid van onbetroubares bring hulle ondergang. Spreuke 11 : 3 U wat regspreek oor die volke, Here, bevind tog dat ek reg het, Here, dat ek onskuldig is. Psalm 7 : 9 Laat reg aan my geskied, Here, want ek is onskuldig. Ek het op die Here vertrou en nie getwyfel nie. Psalm 26 : 1 Laat onskuld en opregtheid oor my die wag hou, want op U vertrou ek. Psalm 25 : 21

14 GEBED OM GOD TE EER VADER, gee dat ons geestelike leiers U sal behaag eerder as die mens. Vergewe hulle dat hulle gelei voel deur die goedkeuring en lofprysinge van die mens meer as die glorie wat van U kom en dat hulle hulle goedkeuring van mense meer waardevol ag as goedkeuring van U. (Joh. 12 : 43) In Jesus se naam vra ek dat U hulle sal vry maak van die vrees vir die mens wat n lokval is. (Spreuke 29 : 25 ) Ek vra dat hulle al hulle geloof, hoop en vertoue in U alleen sal stel. Laat hulle met vrymoedigheid sê: Die Here is vir my `n Helper, ek sal nie vrees nie. Wat sal `n mens aan my doen? (Hebreërs 13:6) Vader, net soos u U Seun gestuur het na die wêreld het U hulle geroep. U sal met hulle wees en hulle sal u wil behaag. (Johannes 8:29) In Jesus naam, amen.

15 HERE, leer ons leiers om goeie vaders te wees. As hulle nie n model volgens U weë gehad het nie, genees hierdie areas en help hulle om hulle vaders te vergewe. Gee hulle openbaring van U en n honger in hulle harte om U werklik as hulle hemelse Vader te leer ken. Trek hulle na aan U om altyd in u teenwoordigheid deur te bring sodat hulle meer soos U kan word en U vaderhart van barmhartigheid en liefde hulle ten volle kan verstaan. Laat dieselfde hart vir hulle kinders in hulle ontwikkel. Help hulle om barmhartigheid, oordeel en onderrig te balanseer soos U dit doen. Hoewel U gehoorsaamheid vereis, gee U dadelik erkenning aan n berouvolle hart. Laat hulle ook so wees. Wys ons leiers wanneer en hoe om te dissiplineer. Help hulle om te sien dat iemand wat sy kind liefhet, hom sal straf wanneer dit nodig is (Spreuke 13:24). Gee dat hulle nooit hulle kinders so (sal) behandel dat hulle opstandig word nie, maar (sal grootmaak) met tug en vermaning soos die Here dit wil (Efesiërs 6 : 4). Ek bid dat hulle en hul gades een sal wees met betrekking tot die reëls wat hulle vir hulle kinders neerlê en ten volle saamstem oor hoe om hulle groot te maak. Ek bid dat daar geen twis of onenigheid sal wees oor hoe hulle die kwessie rakend hulle lewens sal hanteer nie. Gee ons geestelike leiers kommunikasievaardigheid met hulle kinders. Ek bid dat hulle nie te streng of hard, wreed, koud, beledigend, stug, passief, krities, swak, onbelangstellend, nalatig, onbetroubaar of onbetrokke sal wees nie. Help hulle om eerder vriendelik, liefdevol, saggeaard, warm, belangstellend, bevestigend, minsaam, betrokke, sterk, konsekwent, betroubaar, verbaal gesellig, simpatiek en geduldig te wees. Gee dat hulle van hulle kinders sal verwag dat hulle hul eer en dat hulle hul ook daartoe inspireer sodat hulle lewens lank geseënd sal wees. Here, ek weet ons laat n geestelike erfporsie aan ons kinders na. Gee dat daardie erfenis wat ons leiers nalaat ryk sal wees in die volheid van die Heilige Gees. Stel hulle in staat om n model te wees van n lewenswandel van onderdanigheid aan U wette. Gee dat hulle kinders hulle tot vreugde sal wees en dat hulle sal begeer om hulle te lei op u weë. GEBED - VADERSKAP Kleinkinders is vir oumense n trots; vaders is vir hulle seuns n sieraad. Spreuke 17 : 6 Want die Here straf die mens wat Hy liefhet net soos n vader doen met sy seun. Spreuke 3 : 12 n Vader van n kind wat reg doen, voel baie gelukkig; n wyse seun verskaf sy vader groot vreugde. Spreuke 23 : 24 Gee jou seun n goeie opvoeding en jy sal gerus wees oor hom; hy sal jou baie vreugde verskaf. Spreuke 29 : 17

16 HERE, ek bid dat ons leiers goeie, Godvresende mansvriende sal hê met wie hulle openlik dit wat op hulle harte is, kan deel. Gee dat hulle betroubare, verstandige mans sal wees wat waarheid in hulle lewens sal spreek en nie bloot sal sê wat hulle wil hoor nie. (Spreuke 28 : 23). Gee hulle die onderskeidingsvermoë om hulself los te maak van enige iemand wat nie n goeie invloed sal wees nie. ( 1 Kor 5 : 13). Wys hulle hoe belangrik Godvresende vriendskappe is en help hulle om dit in stand te hou. Gee vir hulle Godvresende egpare as vriende by wie hulle gemaklik kan voel. Ek bid vir stewige, vreedsame verhoudings met elkeen van hul familielede, bure, kennisse en kollegas. Ek bid vandag spesifiek vir hulle verhoudings met hulle kerkraad leierskap. Inspireer oop kommunikasie en wedersydse aanvaarding tussen hulle. Laat daar versoening wees waar daar vervreemding was. Bring vrede waar iets weer reggestel moet word. Ek bid dat hulle in hul harte hulle vader en moeder sal eer sodat hulle n lang en geseënde lewe sal hê (Eksodus 20 : 12). Gee dat ons leraars vergewensgesinde persone sal wees wat nie n wrok koester of in hul hart dinge teen ander hou nie. Here, U sê in U Woord: Wie sy broer haat, is in die duisternis.. En weet nie waar hy gaan uitkom nie, omdat die duisternis hom blind gemaak het. (1 Joh. 2 : 11). Ek bid dat ons leraars nooit deur die duisternis van onversoenlikheid verblind sal word nie, maar voortdurend in die lig van vergewensgesindheid sal wandel. Gee dat hulle nooit iemand sal veroordeel of verag nie, maar sal onthou dat ons tog almal voor die regterstoel van God moet verskyn. (Romeine 14 : 10). Help hulle om hul vyande lief te hê, hulle wat hul vloek te seën en goed te doen aan die wat hulle sleg behandel en vervolg (Matt. 5 : 44). Wys hulle wat dit beteken om n ware vriend te wees en help hulle om een te wees. GEBED - VERHOUDINGS Laat ons ook na mekaar omsien deur mekaar aan te spoor tot liefde en goeie dade. Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan. Heb. 10 : As jy dan jou gawe na die altaar toe bring en dit jou daar byval dat jou broerder iets teen jou het, laat jou gawe daar voor die altaar bly en gaan versoen jou eers met jou broeder, en kom dan en bring jou gawe. Matteus 5 : Maar as ons in die lig wandel soos Hy in die lig is, dan het ons gemeenskap met mekaar. 1 Joh. 1 : 7 Pasop vir julleself. En as jou broeder teen jou sondig, bestraf hom; en as hy berou kry vergewe hom...sewe maal op n dag. Lukas 17 : 3-4

17 GEBEDE HUL BESKERMING HERE, Ek bid dat U ons leraars teen enige ongelukkige, siektes, gevare of bose invloede sal beskerm. Bewaar hul veral in motors en vliegtuie. Beskerm hulle teen geweld en die planne van bose mense. Hou hulle veilig waar hulle ook al mag gaan. Laat elke tree van ons leiers vas wees op die koers wat U aangewys het sodat hul voete nie daarvan sal afwyk nie (Psalm 17 : 5). Indien hulle voete wel gly, hou hulle regop deur u genade (Psalm 94:18). Gee ons leiers die wysheid en onderskeidingsvermoë wat hulle sal help om veilig te wandel en nie in gevaar te beland nie (Spreuke 3 : 21-23). Wees U hulle rots, hul redding en hul veilige vesting sodat hulle stewig sal staan (Psalm 62 : 7). Ek bid dat selfs al gebeur vreeslike dinge om hulle, dit nie naby hulle sal kom nie (Psalm 91 : 7). Red ons leiers van enige planne van die vyand wat probeer om hulle lewe te vernietig (Psalm 103 : 4). Bewaar hulle waar hulle ook al gaan, nou en vir altyd. Psalm 121 : 8). Hy wat by die Allerhoogste skuiling vind en die beskerming van die Almagtige geniet, hy sê vir die Here: U is my toevlug en my veilige vesting, my God op wie ek vertrou. Psalm 91 : 1 2 Op die dag van gevaar sal die Here my wegsteek in Sy huis, my veilig laat skuil in Sy woonplek, my hoog op n rots laat staan. Psalm 27 : 5 Selfs al gaan ek deur donker dieptes, sal ek nie bang wees nie, want U is by my. In U hande is ek veilig. Psalm 23:4 Die Here is my rots, my skuilplek en my redder, my God, my rots, by wie ek skuil, my skild en sterk verlosser, my veilige vesting. Onder bespotting roep ek na die Here, dan word ek van my vyand verlos. Psalm 18 : 3-4

18 GEBED VIR HUL BEPROEWINGS HERE, net U ken die diepte van die las wat ons leiers dra. Ek versoek nie dat U dit wat U in hulle lewens doen so klein as moontlik maak nie, want ek weet dat U groot dinge te midde van beproewing doen. Ek wil hulle ook nie beskerm teen dit wat hulle onder die oë moet sien nie. Ek wil hulle net ondersteun sodat hulle as die wenners uit hierdie stryd sal tree. God, U is ons toevlug en beskerming, U was nog altyd bereid om ons te help (Psalm 46 : 2). U nooi ons om met vrymoedigheid na die genadetroon te kom, sodat ons barmhartigheid en genade kan ontvang (Hebreërs 4 : 16). Ek kom voor U troon en vra genade vir ons leiers. Versterk hulle harte vir hierdie stryd en gee hul geduld om op U te wag (Psalm 27 : 1-4), Bou hulle op sodat hulle in staat sal wees om dwarsdeur sterk te staan, ongeag wat gebeur. Help ons leiers om hulle altyd te verbly in die hoop, vas te staan in verdrukking; te volhard in gebed (Romeine 12 : 12). Gee hulle die volharding om die wedloop te hardloop en te voleindig, want U het gesê, al val die regverdige hoeveel keer, hy staan weer op (Spreuke 24:16). Help ons leiers om te onthou: Die Here bepaal die koers wat die mens met wie se pad Hy tevrede is, en Hy ondersteun hom. As so iemand val, bly hy nie lê nie, want die Here help hom op. (Psalm 37 : 23-24) Ek bid dat hulle na U sal opsien om by U te skuil tot die bedreiging verby is (Psalm 57 : 2), Gee dat hulle sal leer om op U te wag, want die wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie. (Jesaja 40 : 31). Ek bid dat hulle hul krag by U sal vind en dat U ons leraars sal hoor wanneer hulle tot U roep en hul uit al hul benoudhede sal red. (Psalm 34 : 7) Verheug julle hieroor, selfs al is dit nodig dat julle n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud, goud wat vergaan. Selfs die suiwerheid van goud word met vuur getoets, en die egtheid van julle geloof moet ook getoets word, sodat dit lof en heerlikheid en eer waardig mag wees by die wederkoms van Jesus Christus. (1 Petrus 1 : 6-7) Laat jou sorge aan die Here oor, Hy sal vir jou sorg. Hy sal die regverdige nie in die steek laat nie. (Psalm 55: 23)

19 GEBED VIR HUL GELOOF HERE ek bid dat U vir ons geestelike leiers vandag n bykomende maat van geloof sal gee. Verruim hulle vermoë om in U, U Woord, U beloftes, U weë en U mag te glo. Plaas n begeerte in hulle harte om met U te praat en U stem te hoor. Gee hulle begrip van wat dit beteken om in U teenwoordigheid gekoester te wees en nie net dinge te vra nie. Gee dat hulle U sal soek, heeltemal op U sal vertrou, deur U gelei sal word, U eerste sal stel, en U in alles wat hulle doen, sal erken. Here, U het gesê: geloof kom dus deur die prediking wat n mens hoor, en die prediking wat ons hoor, is die verkondiging van Christus (Romeine 10 : 17). Voed ons geestelike leiers se harte deur U Woord sodat hulle geloof groot genoeg sal wees om te glo dat by U alles moontlik is. (Matt 19 : 26). Gee hulle die volle oortuiging dat U sal doen wat U belowe het. (Romeine 4 : 21). Laat hul geloof n skild van beskerming wees. Stel dit in werking om die berge in hulle lewens te verskuif. U Woord sê: Elkeen wat deur God vry gespreek is omdat hy glo, sal lewe (Romeine 1 : 17); Ek bid dat ons leiers die soort lewe van geloof waartoe U ons almal geroep het, sal leef. Gee dat hulle met algehele sekerheid sal weet hoe groot is U goedheid: dit is altyd daar vir die wat U dien, U bewys dit voor die oë van die mense aan dié wat by U skuil. (Psalm 31 : 20) Maar n mens moet gelowig bid en nie twyfel nie, want iemand wat twyfel, is soos n brander in die see wat deur die wind aangejaag en heen en weer gedryf word. So n mens wat altyd aan die twyfel is en onbestendig is in al sy doen en late, moet nie dink dat hy iets van die Here sal ontvang nie. Jakobus 1 : 6-8 Enigiets wat n mens nie uit geloofsoortuiging doen nie, is sonde. Romeine 14 : 23

20 GEBED VIR HUL WANDEL Ek weet, Here, die mens kan nie self sy pad kies nie, niemand kan self sy koers bepaal nie ( Jeremia 10:23). Here, ek bid dus dat U ons geestelike leiers se voetstappe sal rig. Lei hulle in U lig, leer hul U weg, sodat hulle in U waarheid sal wandel. Ek bid dat ons leraars n dieper wandel met U sal hê en steeds meer van U woord sal begeer. Laat U teenwoordigheid soos n goeie smaak wees waarvan hulle nooit genoeg kry nie. Lei hulle op U weg en laat hulle dadelik bely wanneer hulle daarvan afwyk. Openbaar aan ons leiers enige verborge sondes wat hul sou kon verhinder om opreg voor U te wandel. Gee dat hulle diep berou ervaar wanneer hulle nie in gehoorsaamheid aan U wette leef nie. Skep vir ons leiers n rein hart, vernuwe hul gees en maak hulle standvastig. Moet hulle tog nie van U af wegdryf nie, en die Heilige Gees van hulle af weg neem nie. (Psalm 51 : 12-13). Here U woord sê die wat deur hulle sondige natuur beheers word, nie die wil van God kan doen nie (Romeine 8 : 8 ). Ek bid dus dat U ons leraars in staat sal stel om in die Gees te wandel en nie in die vlees nie, en daardeur die paaie van die geweldenaar te vermy (Psalm 17:4). Terwyl hulle deur die Gees gely word, gee dat hulle die vrug van die Gees sal dra: Liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing (Galasiërs 5:22-23). Hou ons leiers op die hoofweg van Heiligheid sodat hierdie weg ten volle in elke deel van hulle lewens geintegreer sal wees.

21 GEBED VIR HUL GESINDHEID Here vul ons leraar vandag met u liefde en vrede. Gee dat daar n kalmte, onverstoorbaarheid, en n gevoel van behaaglikheid in hulle pos vat omdat hulle lewens deur God beheer word eerder as deur die vlees. Help hulle om in hulle huise met n opregte hart voor U te leef. (Psalm 101 : 2) Laat U lig van U Gees op hulle skyn en hulle met U liefde vul. Ek bid dat ons leiers vriendelik en geduldig sal wees, nie selfsugtig of maklik vertoorn nie. Help hulle om alles met liefde te bedek, te glo, te hoop en te verdra (1 Kor. 13:7). Bevry hulle van woede, rusteloosheid, kommer, innerlike verwarring, onenigheid en druk. Gee dat hulle nie weens smart terneergedruk sal word nie.(spreuke 5 : 13), maar hulle hele lewe lank die fees van n blymoedige hart sal geniet. (Spreuke 15 : 15). Gee hulle n Gees vol vreugde. Help hulle om hul oor niks te bekommer nie, maar in alles dankbaar te wees sodat hulle die vrede wat alles te bowe gaan, kan ervaar. Gee dat ons leiers die punt sal bereik waar hulle sê: Ek het geleer om reg te kom met wat ek het. (Fil 4:11). Ek sê vandag vir ons leraars Die Here sal julle seën en julle beskerm; die Here sal tot julle redding verskyn en julle genadig wees; die Here sal julle gebede verhoor en aan julle vrede gee. (Num 6:24-26). Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus. Fil. 4:6-7 Laat vaar al julle oortredings en kry n nuwe gesindheid, n nuwe Gees. Esegiël 18:31 n Stad sonder n muur om hom te beskerm, so weerloos is n mens as hy nie selfbeheersing het nie. Spreuke 25 :28 Al het ek die gawe van profesië en ken ek al die geheimenisse en besit ek al die kennis, en al het ek al die geloof om berge te besit, maar ek het geen liefde nie, dan is ek niks. 1 Korinthiërs 13:2

22 GEBED VIR HUL FINANSIES Here, ek dra ons leiers se finansies aan U op. Wees U in beheer en gebruik dit vir U doeleindes. Gee dat hulle goeie rentmeesters sal wees van alles wat U hulle gee, en dat hy en sy familie stemmig sal wees oor hoe dit aangewend word. Ek bid dat hulle sal leer om vry van swaar skuld te leef. Bring herstel en gee hulle leiding waar hulle nie verstandig was nie. Wys sy familie hoe hulle kan help om hul finansies te vermeerder en dit nie op n onverstandige manier te laat krimp nie. Help hulle om te onthou dat alles wat ons het aan U behoort, en om daarvoor dankbaar te wees. Ek bid dat ons leraars dit maklik sal vind om aan U en aan ander te gee soos U in die Woord leer. Gee hulle wysheid om geld verstandig te hanteer. Help hulle om goeie besluite te neem oor hoe om dit selfstandig te hanteer. Help hulle om goeie besluite te neem oor hoe om dit te spandeer. Wys hulle hoe om vir die toekoms te beplan. Ek bid dat hulle die volmaakte balans tussen spandabelrigheid en gierigheid sal vind. Laat hulle altyd goed betaal word vir die werk wat hulle doen en gee dat ons leiers se geld nie gesteel, verloor, verslind, vernietig of vermors sal word nie. Vermenigvuldig dit sodat wat hulle verdien ver kan gaan. Ek bid dat hulle nie oor finansies sal bekommerd wees nie, maar dat hulle eers die Koninkryk sal soek, wetend dat hulle alles sal kry wat hulle nodig het as hulle dit doen. (Lukas 12:31). Julle moet julle ook nie gedurig afvra wat julle gaan eet of drink nie, en julle moet nie besorg wees nie. Dit is alles dinge waaroor die ongelowiges in die wêreld begaan is, maar julle het n Vader wat weet dat julle dit nodig het. Beywer julle vir Sy koninkryk, dan sal Hy julle ook hierdie dinge gee. Lukas 12:29-31 God gee aan n mens rykdom en besittings en laat hom dit geniet. God laat die mens sy deel ontvang en sy werk met vreugde doen. Dit is n gawe van God. Prediker 5:18 Wie vir n arm mens iets oor het, sal self niks kort kom nie, maar wie anderpad kyk sal baie verwensings hoor. Spreuke 28:27 Ek was jonk en ek het oud geword, maar nooit het ek n regverdige verlate gesien of dat sy nageslag brood soek nie. Psalm 37:25 En my God sal in elke behoefte van julle ryklik voorsien volgens sy wonderbaarlike rykdom in Christus Jesus. Filippense 4:19

23 GEBED VIR HUL KEUSES Here vul ons leiers met die vrees vir die Here en gee hulle wysheid vir elke besluit wat hulle neem. Gee dat hulle U en U weë sal eer en U waarheid sal soek. Gee hulle die onderskeidingsvermoë om besluite te neem wat op u openbaring gebaseer is. Help ons leiers om Godvresende besluite te neem en bewaar hulle daarvan dat hul enige dwaasheid aanvang. Neem dwaasheid uit hulle harte en stel hul in staat om dwaling gou raak te sien en dit te vermy. Maak hulle oë oop sodat hulle die gevolge van enige geantisipeerde optrede duidelik sal sien. Ek bid dat ons leraars na Godvresende raadgewers sal luister en nie n onoortuigbare man sal wees nie. Gee hulle krag om die raad van die goddelose te verwerp en U raad bo alle ander te hoor. Ek verklaar dat al maak mense hoeveel planne, wat die Here besluit, staan vas (Spreuke 19:21). Leer hulle selfs in die nag terwyl hulle slaap (Psalm 16:7), en ek bid dat ons leiers in die môre sal doen wat reg is, eerder as om die leiding van hul eie vlees na te volg. Ek weet dat die wysheid van hierdie wêreld dwaasheid by U is, Here. ( 1 Korintiërs 3:19). Gee dat hulle nie daarin sal belê nie, maar hul oë op U sal hou en ore sal hê om U stem te hoor. Selfs wyse mense kan na die spreuke luister en so tot dieper insig kom. Wie reeds die nodige kennis het, kan die kuns aanleer. Spreuke 1:5 Moenie dink jy het die wysheid in pag nie, dien die Here en vermy wat slegs is. Spreuke 3:7

24