Die Pottebakker en ek die klei Ds. Willem Louw: NG Kerk Miederpark

Transcription

1 Skriflesing: Jer.18:1-10 Die Pottebakker en ek die klei Ds. Willem Louw: NG Kerk Miederpark Wat is dit wat tans veroorsaak dat jou geestelike verhouding met God so verwaarloos het dat jy nie meer in die Gees kan wandel en deur die Gees kan onderskei wat God vir jou in die Bybel wil uitwys nie? 1. Daar sal jy hoor! (vers2) Jeremia is in gesprek met God en wag op ʼn antwoord van die Here. Hy probeer vasstel wat God vir Hom sê om as profeet vir die volk te sê, maar hy kan nie hoor wat God vir hom sê nie. Hy sukkel om fyn ingestel te kom om te onderskei wat God vir hom wil sê. Soms gaan ons deur ʼn droë tydperk in ons kommunikasie met God. Dit gebeur dikwels omdat ons gejaag lewe en nie ingestel is om God se stem te hoor nie. Die Here stuur Jeremia pertinent om te gaan na die pottebakker se huis. Dáár sal hy God se stem hoor en weet wat God vir hom wil sê (Jer.18:2). Hy het toe gehoorsaam en na die pottebakker se huis gegaan. Terwyl hy daar staan en kyk hoe die pottebakker werk, het die Here vir hom deur Sy Gees insig gegee. Hieruit leer ons: 1) ʼn Stuk gehoorsaamheid moet eers volg om God werklik te kan hoor! Gaan af na die Pottebakker se huis toe, Ek sal daar met jou praat. Sekere dinge sal jy nooit hoor en verstaan nie, voordat jy nie eers die eerste dinge wat God vir jou gevra het om te doen, gehoorsaam het nie! In die TV reeks Amazing Race sal jy nie die volgende leidraad ontvang, voordat jy nie eers al die take van die eerste leidraad voltooi het nie. As Jeremia nie God se stem gehoorsaam het en na die Pottebakker se huis gegaan het nie, sou hy nooit gehoor het wat God eintlik met hom wou kommunikeer nie. Daar kom tye wat ons eers God onvoorwaardelik moet gehoorsaam, 1

2 voordat ons in daardie posisie is waar Hy sy eintlik boodskap of droom vir ons lewe aan ons kan bekendmaak. Miskien sukkel jy op die oomblik ook om God se stem te hoor... bid dan, dat jy gehoorsaam sal word aan die eerste opdrag wat God jou reeds gegee het! 2) ʼn fisiese plek waar ons moet wees, om te ontdek wat God vir ons wil sê. Mathew Hendriks vertaal Jer.18:2 soos volg: Go to the potter's house, and observe how he manages his work, and there I will cause thee, by silent whispers, to hear my words. Om by die pottebakker se wiel uit te kom moes Jeremia eers by die pottebakker se ashoop verbyloop waar hy al die stukkende potte en potskerwe sien van die gebreekte potte en die mislukte kunswerke. Hy stap in ʼn omgewing in waar hy afgesonder staan. God neem hom eenkant weg na ʼn stil plek. Daar het hy tyd gekry om waar te neem en diep na te dink. Om na daardie spesifieke plek te gaan, het hom laat dink aan Israel en God se droom vir Israel en hoe die volk misluk soos stukkende potskerwe wat die wêreld vol lê. Die prentjie berei sy denke voor vir dit wat God aan hom wil verduidelik. Dit bring insig, wat hy nie in sy normale dagprogram sou kry nie. Kry vir jou ʼn stiltetyd plek. Kry vir jou ʼn bidplek waar jy in afsondering elke dag kan gaan. Kry vir jou ʼn vaste roetine sodat jy daar rustig kan word. Sodat jy daar op God kan wag en jou hart volkome aan Hom kan wy. Geen mens kan in die verbygaan in ʼn gejaagde program sinvolle diep gesprekke met God voer nie. 3) omstandigheidsfaktore beïnvloed dikwels ons vermoë om God se stem te hoor. Nadat Jeremia alles deurgekyk het, val sy oog op die pottebakker wat daar by sy wiel staan en werk. Jeremia moes eers aanskou hoe die pottebakker die klei brei en voorberei om ʼn pot te vorm, voordat hy besef dat God deur die pottebakker ʼn beeld skep 2

3 waardeur Hy met hom wil kommunikeer. God laat dikwels toe dat dinge wat in die praktyk gebeur, ons gedagtes begin rig op wat God wil hê ons moet raaksien. So is daar ook dikwels verskeie dinge wat ons aandag van God aftrek en veroorsaak dat ons nie God se stem kan onderskei nie. Die probleme by jou werk kan bv. jou gedagtes so in beslag neem dat jy nie meer kan stil word en intimiteit met God beleef nie. Dit kan wees dat God juis deur die krisis wat jy onlangs beleef het, met jou wil praat! Omdat jy dit net as nog ʼn probleem in jou besige program beskou, is jy so besig daarmee dat jy glad nie op God ingestel is en vra: Here wat probeer U vir my sê? nie. Dit maak dat jy nie God se stem kan hoor nie! Dit maak dat jy God ook nie kan gehoorsaam nie! Word bewus van God wat elke oomblik deur Sy Gees in jou woon. God wil deur spesifieke omstandighede en gebeure met jou praat. Vra na elke krisis in jou lewe: Here wat wil u vir my leer deur hierdie kursus? Dink diep na oor wat jy sien en wat gebeur. God probeer met jou praat! Net dwase jaag voort deur die lewe sonder om te dink. Weet dat God jou aandag trek deur omstandigheidsfaktore wat jy pas beleef het... God probeer vir jou iets uitwys. Moet dit nie mis nie! (God was besig om vir Jeremia daar by die pottebakker uit te wys in watter ellendige toestand die volk se verhouding met God was) 4) ʼn spesifieke tydsberekening of oomblik is nodig om ons gedagtes op God te rig. Ons sê altyd: Daar is ʼn tyd om te praat en ʼn tyd om stil te bly. Wanneer jy iets belangrik en sensitief met jou lewensmaat wil bespreek, weet jy tog self hoe belangrik dit is om dit op die regte oomblik te doen! Jou tydsberekening moet perfek wees as jy wil slaag! Daar is ʼn tyd dat jou gedagtes op iets ingestem is, en ʼn tyd wanneer jou gedagtes nie daarop ingestem is nie. Voorbeeld: As jy onder die motor lê en besig is om die swaar ratkas op te tel en vas te bout, wat jou pas R 8000 gekos het om te herstel, moet jou vrou nie vir jou kom vra of jy gou saam met haar na die mall toe sal gaan nie. Jy gaan haar redelik kortaf antwoord, nie waar nie? 3

4 Jeremia kom op die presiese oomblik by die pottebakker se huis, toe hy ʼn vars nuwe homp klei optel en begin voorberei. Dit is ʼn unieke proses om ʼn pot te maak, wat juis op daardie oomblik begin het. Hy staan en kyk in verwondering oor die geduld waarmee die pottebakker die klei bly vorm. Uiteindelik sou die pottebakker iets nuttig daarvan maak. Jeremia is presies betyds om die proses gade te slaan. Dikwels lê die probleem nie by God se praat vermoë nie, maar by jou en my luister vermoë. Word stil. Kyk. Luister. Neem waar... God is besig om te praat! 5) Soms moet iets eers gebeur, voordat ons in staat is om God se stem te hoor. Sommige dinge sal nooit verstaan word, voordat daar nie ʼn Goddelike ingrepe kom nie. Die Heilige Gees moet jou hart self voorberei. Sekere dinge soos geestelike wedergeboorte kan net die Heilige Gees vir jou gee. Sekere sondes sal ʼn mens bv. bly reg redeneer, totdat die Heilige Gees jou eendag self deur ʼn gebeurtenis oortuig dat dit wat jy doen, verkeerd is. Dan eers sal jy gewillig wees om uit jou eie dit reg te stel! In Luk 24 stap twee dissipels saam met Jesus na die dorpie Emmaus, maar hulle het nie besef dat dit Hy is nie, totdat Jesus iets doen wat hulle oë laat oopgaan... Maria by die graf, het gedink dit is die tuinier wat daar is. Totdat Jesus haar naam noem, en op daardie oomblik het sy besef, dat dit Jesus is wat hier by haar is en met haar praat... Jy kan die Bybel vir jare in die vlees lees, maar as God nie jou denke met die Gees verlig nie, en jy nie die Woord deur die Gees lees nie, sal jy God nooit werklik leer ken nie! 2. Die Pottebakker Jeremia hou die Pottebakker dop. Hier ontdek hy: 4

5 1) Die Pottebakker het intensies: Jeremia sien dat die pottebakker ʼn spesifieke intensie het. Hy werk doelgerig. Hy neem ʼn stuk rowwe klei en hy weet vooraf wat hy met daardie stuk klei wil doen! Hy gaan iets nuttigs en kosbaar vorm. Wanneer hy daardie klei tot ʼn produk gevorm het, bewonder hy die produk. Dit gee hom satisfaksie en hy is trots op daardie produk. Die produk is voltooi en gemaak vir ʼn spesifieke doel! So het God ook ʼn intensie met jou en my. So het Jesus Christus jou en my uit die sonde gered en ons uit genade deur Sy kruisdood verlos van die sonde. Jesus het vir ons met ʼn spesifieke doel aan die kruis gesterf. God het ʼn plan met jou en my lewe! Hy het ʼn eindproduk ingedagte. Moenie jou lewe opmors nie. Moenie die drome wat God vir jou in gedagte het, mis nie! Moenie God bedroef nie deur in sonde te volhard nie!. Buite God se doel, gaan jy seerkry, misluk en worstel, val en opstaan... 2) Die Pottebakker is absoluut in beheer. Die pottebakker kies die klei versigtig. Soms word die klei eers weer in water gegooi en deurmekaar geroer en vir weke in die water gelaat totdat die tekstuur sag en glad is soos slik. Die punt is: die pottebakker is absoluut in beheer. So is ons lewens ook in beheer van God. Ons lewe is nie oorgelaat aan blinde noodlot of toeval nie. Wat met ons gebeur, laat God toe. God is ook nie net ons maker nie. Hy is ons Vader. Hy is persoonlik betrokke in die lewe van Sy kinders. Hy gee om oor dit wat met jou gebeur en wat jy deurmaak. Hy is lief vir jou! Die pottebakker gebruik verskillende instrumente om sy klei te bewerk. Soms kies hy en gaan haal hy sy klei met ʼn graaf (Joh.16:7-11 die Gees werk en trek ons nader na God). Dan is daar die draaitafel. Die instrument is ontwerp om die klei in die rondte te draai. Die blad van die draaitafel was destyds van klip gemaak. Wanneer die klei op die draaitafel beland gebruik hy ʼn klein plankie of skrapertjie om onsuiwerhede uit die klei te verwyder. Soms gebruik die pottebakker net sy hande. Jeremia hou dop hoe die pottebakker met groot omgee en besorgdheid die klei vorm. Hy is in alles persoonlik betrokke! 5

6 So gebruik God ook verskillende gebeure, verskillende omstandighede en verskillende mense om Sy kinders te vorm. In Heb13:5 sê God: Ek sal jou nooit verlaat nie en jou nooit in die steek laat nie. Onthou, as die instrumente van die lewe jou seermaak, ontsel, ontwrig, ontmoedig ens... Onthou, God is besig met jou. Hy het jou lief en vorm jou om nog meer gehoorsaam aan Hom te wandel... Die pottebakker se hand was ervare. Hy kon vooruit aanvoel as die klei nie reg reageer nie. Sy hand was voortdurend liggies op die klei. Wanneer hy verandering in die klei gewaar het hy voortydig die regte aanpassing met sy hande gemaak om die klei effens in ʼn ander vorm te begelei. God is besig om dieselfde met jou te doen... voel jy dit? Die Pottebakker het met groot geduld en toegespitse aandag gewerk. God is deur alle eeue op pad met Sy kinders. Met groot geduld werk God oor tyd heen. Hy het By Abraham begin, later kom Dawid en sy nageslag aan die beurt. Toe kom Jesus Sy Seun, en sy Dissipels volg hom... Nou is dit jou en my tyd. Ons beurt. Ons geslag moet nou vandag, vir God ʼn verskil maak! God het baie geduld. Moenie die tyd wat God vir jou bestem het om deel te wees van Sy Koninkryks-plan, mis nie! 3) Die pottebakker het mag oor alle klei. Die klei moet maak soos die pottebakker dit vorm. Die klei kan nie kies wat dit wil word nie en kan ook nie weerstand bied nie. Die pottebakker is absoluut in beheer! Geen klei kan die pottebakker stop of sy handewerk bevraagteken nie, of sy planne verander nie. Die klei kan ook nie terugpraat nie! Soms laat die Pottebakker ʼn stuk klei net eers eenkant lê om later weer daaraan aandag te gee. Die pottebakker weet presies wat hy met sy klei wil doen... Tog, soms ten spyte van alle maatreëls het ʼn stuk klei misluk om te word wat die bedoeling was dan word dit inmekaar gedruk en begin die pottebakker weer van voor... In Rom.9:21vra die Woord van God: Het die pottebakker nie die reg om uit dieselfde klomp klei iets besonders en iets alledaags te maak nie? Word rustig en gee jou lewe aan God oor! Gee Hom toestemming om jou te 6

7 vorm! Gee jou lewe weg vir God weg en Hy sal jou ten beste gebruik (Gal.2:20) Vertrou God. Ek lees in Fil.1:6: As God ʼn goeie werk in ons hart begin het sal Hy daarmee aanhou totdat Hy bereik het wat Hy wou bereik. Om bruikbaar te word, is dit nodig dat jy jou totaal onderwerp aan die Pottebakker. Slegs as ons gewillig is en ons volkome aan God en Sy gesag onderwerp, kan Hy ons karakter vorm en ons gehoorsaam word om Sy Vader te verheerlik. 3. Watter tipe klei is jy? n Belangrike eienskap van pottebakkersklei is dat dit die regte tekstuur moet hê sodat dit sag en aanpasbaar kan wees om gevorm te word, maar tog ook sterk kan wees, nadat dit in die oond gebak is. 1) Klei moet vry wees van onsuiwerhede Jeremia let op hoe die pottebakker die klei deurwerk met sy hande. Die pottebakker haal elke stukkie onsuiwerheid uit. Elke klippie of grassprietjie word verwyder en weggegooi. Klei wat vol onsuiwerhede is, kan nie gebruik word nie. Klei wat onsuiwerhede bevat sal uiteindelik kraak, of die klippies wat daarin voorkom sal verhinder dat die kleipot glad afgewerk kan word. ʼn Lewe vol sonde, word onbruikbaar vir God. Die Heilige Gees sal nie tuis wees in so ʼn lewe nie, gevolglik sal die krag van God in so ʼn lewe ontbreek. In Jeremia se tyd was die volk Israel vasgevang in ongehoorsaamheid. Die sonde was diep in hul harte ingegraveer. Gaan lees Jeremia 17. Die Woord sê dit was ingegraveer met ʼn diamantpunt op hulle harte en op die horings van hul altare. Daar was diep sondige gewoontes wat ouers oorgedra het na hulle kinders o Ouers, wat leer jou kinders vandag uit jou voorbeeld? Sien hulle in jou lewe dat jy die Here liefhet, gereeld aanbid en stiltetyd hou? Sien hulle hoe jy smag om gereeld saam met medegelowiges God in die kerkgebou te aanbid? Sien hulle jou diensbaarheid? Sien hulle jou 7

8 offervaardigheid vir die God wat jy ontsaglik liefhet? Sien hulle hoe jy jou tiendes vir God gee? Sien hulle die vrug van jou geredde lewe? Hoor hulle jou vars passievolle getuienisse? o Of gebeur die teenoorgestelde? Graveer jy jou sondige voorbeeld diep in hul harte? o Spr.22:6 sê: Gee leiding aan ʼn jongmens oor hoe hy moet leef, en hy sal ook as hy al oud is nie daarvan afwyk nie. (vgl. ook Spr.13:24; 22:15; 23:13-14) 2) Klei moet sag en vormbaar wees Hardkoppige en eie willige mense is vir God onbruikbaar. God het ook Israel doelbewus 40 jaar in die woestyn laat rondtrek, laat swaarkry om sag te word. Hy het hulle ook in ballingskap laat wegvoer, maar Hy het hulle nie daar vergeet nie. (vgl. Rom.11:25-27) God het moeite gedoen om hulle te vorm en hulle weer teruggebring. Met droë harde klei kan die pottebakker niks maak nie. Daarom gooi die pottebakker bietjie water by die klei en brei die klei totdat dit sag en vormbaar is. Die pottebakker hou aan om die klei te brei totdat hy tevrede is met die tekstuur en daarna word die produk gevorm en in ʼn klei-oond gebak. Dit word dan in uiters hoë temperatuur gebak. So vorm God ons en bak Hy ons. Soms is dit vir ons pynlik wanneer God seerkry en swaarkry oor ons pad toelaat. God weet egter wat Hy daardeur in ons lewe wil bereik. God gee nooit op nie. Hy voltooi waarmee Hy in ons lewe begin het. 1Pet.5:6 sê: Onderwerp julle daarom in nederigheid aan die kragtige hand van God sodat Hy julle kan verhoog op die tyd wat Hy bestem het. Ten slotte: 3) Klei moet reg in die middelpunt van die wiel wees. Jeremia let op hoe die pottebakker die wiel waarop die klei is in die rondte laat spin deur met sy voet op die pedaal te trap. Hy besef dat God die omstandighede 8

9 van sy volk konstant laat draai en verander om hul te vorm. God doen dit steeds vandag met jou en my. Wanneer die klei nie presies in die sentrum van die pottebakers wiel staan nie, kan die pottebakker nie die klei vorm nie. Dan spat die klei in alle rigtings. Slegs as die klei 100% in die middel van die wiel staan, kan die pottebakker dit vorm tot ʼn pragtige produk. Wanneer die gelowige nie 100% binne God se wil is nie, en nie volkome Sy oog op God rig en begeer om deur God gevorm te word nie, sal die gelowige nie ʼn standvastige lewe in God vind nie. Enige mens wat eiesinnig sy eie pad wil volg sal uiteindelik uit God se hand val en vernietig word deur die sondige kragte van hierdie lewe en in die hel beland. Maar hy wat aan God oorgegewe lewe sal nooit verlore gaan nie. (Joh. 10:27-28) God is die pottebakker en ons die klei. Watter tipe klei is jy? Wie is jy? Waar staan jy nou in jou verhouding met God? Is jy in die sentrum van Sy wil? Wat gebeur met jou? Ervaar jy dat God met jou besig is. Jou aandag soek? Met jou wil praat? Kom ons raak stil in gebed. Wees bewus van God se teenwoordigheid. Praat met God in stil gebed. AMEN 9