Jaargang 19, Nr. 2 Jul 2018 Kobus Sandenbergh Ons ervaar almal dat ons politieke leiers n groot invloed op ons lewens het. Dit is waar van die RSA, waar ons uiteenlopende leierskapstyle in aksie sien sommige leiers wat hul posisies misbruik om hulself te verryk en ander wat dit gebruik as n geleentheid om te dien. Ons sien dit ook wêreldwyd as ons dink aan Donald Trump se Amerika Eerste en die Brexit-gebeure in Europa. Die dieper vraag oor leierskap lei ons nader na ons eie huis. Ons dink meestal net aan leierskap ondertoe en sywaarts (na kollegas), maar nie noodwendig aan hoe ons onsself lei nie, met ander woorde Selfleierskap. Die befaamde skrywer Dee Hock se aanbeveling is: We should invest 50 percent of our leadership amperage into the task of leading ourselves; and the remaining 50 percent should be divided into leading down, leading up, and leading laterally. Lees gerus ook Markus se eerste vyf hoofstukke en kyk na die wisselwerking in Jesus se lewe tussen die bediening van mense en sy sywaartse opleiding van die dissipels, maar ook hoe hy tyd maak vir alleenwees met homself en die Vader. Billy Hybels van die Willowcreek Gemeente in die VSA het krisisse ervaar toe hy as leier nie alles bymekaar kon hou nie. Uit die krisisse het hy geleer dat as ʼn mens jouself versorg en laat versorg, dit makliker is om ander te versorg. Maar hoe doen ek dit? Sy aanbeveling is om telkens n paar kritiese vrae aan jouself te vra, soos: Is ek seker van my roeping? Daar is n direkte verband tussen roeping en energie vir ʼn taak. Die Here se roeping energeer my en jou. Onthou wat dit vir Moses, Petrus en Paulus beteken het. Ons kan maklik ander uitdaag, maar wat doen ons vir onsself? Wat sit jy op jou geestelike agenda? Elke gemeente het leiers nodig wat seker is van hulle roeping! Is my liefde vir die Here warm? Ons bely almal dat ons die Here liefhet, maar n mens se liefde kan afkoel. Soos iemand gesê het: Jou liefde kan soos die maan wees, helder maar glad nie warm nie! Elkeen van ons het iets wat ons passie aanwakker. Is dit om te lees, n kursus by te woon of wat? Dit is elkeen van ons se verantwoordelikheid as leier om ons passie warm te hou. Is my integriteit deursigtig? In hierdie tyd van staatskaping en korrupsie is dit baie belangrik dat ons integriteit as gelowiges duidelik is. Dit wat ons doen en die manier en die gesindheid waarmee ons dinge doen, is ewe belangrik. Die gesindheid het dikwels ʼn groter impak as die werk wat ons doen. In die pers sien ons telkens dat gierigheid en verkeerde verhoudings leiers verlei en dat hulle daardeur hul integriteit verloor. Is my bagasie verwerk? Elkeen van ons ervaar by tye teleurstellings, seerkry en verwerping. Ons ignoreer dit dikwels of steek dit weg omdat dit pynlike ervarings is. Jesus moes vir Petrus drie keer vra of hy Jesus liefhet voordat Petrus erken het: Here, U weet alles. U weet dat ek U liefhet. (Joh 21:17). So het Jesus vir Petrus vergewe vir sy verloëning en ontkenning dat hy ʼn Jesusvolgeling is. Ons kan nie ander lei of begelei voordat ons ons eie seerkry en mislukkings verwerk het in die teenwoordigheid van die Gees nie. Is my ore oop vir die fluisteringe van die Gees? Ons kan die vraag ook anders stel in ons besige stadslewe: Is die pas waarteen ek God se werk doen vernietigend vir God se werk in my? Soms kan ons so besig raak dat ons outomaties begin leef. Ons skeep dan ons eie gesprek met God af en laat nie toe dat die Gees ons sagteware, ons harte, opdateer nie. Daarom is dit belangrik om te vra: Is my spoed stadig genoeg om die fluisteringe van die Gees te hoor? Ons kritiseer maklik ander se leierskapstyl of integriteit. Hoe vaar ek met die geestelike leierskap van myself en my familie?
FINANSIËLE OORSIG Geseën om ander te seën Saret Britz Wanneer ʼn mens jou motor laat diens, word ʼn rekenaar daaraan gekoppel om ʼn diagnose te gee. So reflekteer ons ook na die eerste kwartaal van ons finansiële boekjaar op ons finansies hier by NG Weltevreden. Ons refleksierekenaar flikker ʼn groen liggie van dankbaarheid, want hoewel ons in ʼn dinamiese werklikheid leef waar elke maand fyn gekyk moet word na rooi vlaggies, sien ons ʼn tendens van groen liggies. Ons finansies reflekteer die positiewe gesindheid wat ons beleef in die Weltevreden-familie. Daar is soveel energie by al ons lidmate! Ons voel en sien ʼn gemeente wat saamstaan om ʼn verskil te maak in die wêrelde waarin elkeen beweeg elkeen se stad. Wanneer ons vra vir hulp aan armes, word ons telkens verras deur die vrygewigheid van ons mense. Nuwe projekte word met entoesiasme ondersteun, en nie net finansieel nie. Ons sê dankie aan elkeen wat bydra tot die wenresep in hierdie gemeente. Ons dank gaan ook aan die Hemelse Vader wat versorging en seën oor ons uitstort in tye wanneer dit swaar gaan met ander gemeentes ons beker van dankbaarheid loop oor! Eerste kwartaal 2018: Oorskot R88,215 Begrote tekort: R303,145 Hierdie syfers is slegs moontlik weens volgehoue finansiële dissipline van die kerkkantoor om besparingsmoontlikhede te benut; die harde werk van bedienings om fondsinsamelingsprojekte te loods en die volgehoue ondersteuning van die gemeente deur middel van offergawes, skenkings en maandelikse bydraes. ʼn Duisend dankies! ʼn Paar jaar gelede het ʼn groot droom by NG Weltevreden ontstaan: Wat as die gemeente haar roeping om te lewe vir die stad op ʼn groter skaal sou kon vervul? Wat as ons donateurs vir ons projekte kon kry benewens die gemeentelede wat altyd help? Wat as ons institusionele hulp kon kry vir projekte waarby ons vir dekades betrokke is? Wat as ons dit vir klein sakeondernemings kon moontlik maak om noodsaaklike maatskaplike skenkings te maak en boonop belastingvoordele te kry as hulle ons ondersteun? Wat as en toe vind hierdie droom gestalte in die stigting van ʼn nie-winsgewende Openbare Weldaadsorganisasie, Novo Futurum, wat vertaal kan word as Nuwe Toekoms. In vele opsigte beteken die totstandkoming van hierdie organisasie ʼn nuwe toekoms vir die talle gemeenskapsprojekte waarby NG Weltevreden betrokke is. Nie net kan ons die finansiële volhoubaarheid van hierdie projekte verseker in onseker ekonomiese tye nie; ons kan ook met nuwe ywer werk aan die uitbou van ons projekte. Novo Futurum is die omgee-arm van NG Weltevreden. Dit is nie ʼn organisasie wat bestuur word deur onbekendes met onbekende projekte nie. Dit is juis gestig sodat ons mense ʼn ervaringsreis kan onderneem wanneer hulle ʼn skenking maak, of op ʼn meer persoonlike vlak betrokke kan raak by die projekte. Dit gaan oor meer as net ʼn geldjie in ʼn koevert dit gaan daaroor om werklik ʼn verskil te maak in iemand se lewe. Ons kan nou toegang kry tot groot en kleiner besighede se CSI (Corporate Social Investment) fondse om ʼn maatskaplike en sosiale verskil te maak vir armes, vir mense wat opleiding nodig het, vir diegene vir wie daar geen ander hulp bestaan nie. Ons kan ook vir ons mense in NG Weltevreden ʼn geleentheid gee om op ʼn veilige manier betrokke te raak by die gemeenskap. Jou omgee-geld is veilig want daar is nie ʼn middelman wat ook nog betaal moet word nie. Projekte waarby ons tans betrokke is sluit die volgende in: Abraham Kriel Kinderhuis (Blou Huis en Huis Erasmus); MES (Hillbrow); Jan Hofmeyer Kleuterskool, Golang Kleuterskool (Zandspruit), Kospakkies en Winterhoop hier in ons eie omgewing. Hiervoor het ons hande en rande nodig. Donasies (meer as R100 per jaar) kwalifiseer vir ʼn Artikel 18A-belastingsertifikaat. Kontak gerus die span: Dr Neil du Plessis Alda Boer Saret Britz Bankbesonderhede: Absa Bank Clearwater Mall Takkode: 632005 Rekeningnommer: 93 2740 2768 2 WELTEWOORD I Julie 2018
Ontmoet ons nuwe Kerkraadsvoorsitter Tanya Krause Gerrie Jacobs is onlangs verkies tot nuwe Kerkraadsvoorsitter en ek het ʼn bietjie meer gaan uitvind oor die man wat vir die volgende jaar aan die stuur is. 1 2 Vertel ons so n bietjie meer van jouself Ek is die oudste van drie kinders. Ek is ʼn gebore en getoë Vrystater, wat in Bloemfontein grootgeword en gematrikuleer het. Na my militêre diensplig het ek BSc (Wiskunde en Rekenaarwetenskap) aan die destydse Randse Afrikaanse Universiteit (RAU), deesdae Universiteit van Johannesburg (UJ) behaal. Ek het ook ʼn honneurs-, M-graad en doktorsgraad daar voltooi. Nadat ek vir ʼn kort tyd as rekenaaropleier werksaam was by BankorpData, was ek vanaf 1985 tot die einde van verlede jaar verbonde aan die RAU en later UJ in verskillende hoedanighede as navorser, dosent, departementshoof en uiteindelik as Hoofdirekteur: Strategiese Beplanning, Institusionele Navorsing en Kwaliteitsbevordering. Ek is in 1994 tot volle professor bevorder. Ek was vanaf 2012 weer terug in die Fakulteit Opvoedkunde as nagraadse dosent in Wiskunde-Onderwys. Ek het as 60-jarige die Universiteit na 33 jaar diens verlaat. Ek werk vanaf Januarie 2018 as Wiskundedosent by die Embury Institute for Higher Education, waar ek Wiskunde vir voornemende onderwysstudente doseer op hul twee Gauteng-kampusse (Midrand en Montana, Pretoria). Embury is ʼn privaat-hoëronderwysinstelling en een van vyf maatskappye onder die Stadio Holdings-vaandel. Ek en my vrou, Melanie het mekaar as studente by die destydse RAU ontmoet. Ons het twee kinders, Minette en Gerrit, en het ook onlangs ons eerste kleinkind, Daniël, verwelkom. Hoe lank is jy al betrokke by NG Weltevreden? Ons het as gesin eintlik ʼn baie lang verbintenis met NG Weltevreden, oor twee afsonderlike tydperke. Ons het vanaf 1985 tot 1990 in Weltevredenpark gewoon en in daardie tyd aktief by die gemeente ingeskakel. Ek het onder andere vir vier jaar as diaken op die destydse Kerkraad gedien. Ek onthou nog goed hoe ʼn brandpunt die bou van die nuwe kerk was en hoe ons destyds eredienste gehou het in Laerskool Boskop se skoolsaal. Gerrit was een van die eerste omtrent 30 babas wat in die nuwe kerkgebou gedoop is. Ons gesin loop dus al ʼn betreklik lang pad saam met Ds Kobus, met ʼn onderbreking van 20 jaar toe ek en Melanie aangestel is as huisouers van 3 4 5 6 Skoonveld Dameskoshuis by RAU en vanaf 1990 tot 2010 in ander gemeentes was. Waar is jou gunsteling vakansieplek? Die Wes-Kaapse kusdorp, Hermanus met sy prag op verskeie vlakke en die vele wonderlike dinge om te doen, veral daar in die verleidelike Hemel-en-Aarde-vallei en ook die Botrivier-kontrei, is vir my ʼn gunsteling. Wat maak jou gelukkig? Ek is op my gelukkigste as ek weet die mense na aan my hart is gelukkig. Ek is tweedens ook besonder gelukkig as ek ten opsigte van ʼn bepaalde aangeleentheid of projek my uiterste bes gedoen het en kan sien dat dit ʼn verskil gemaak het aan mense se welsyn. Wat dink jy is ons grootste uitdaging as Christene vandag? Om eerstens op so ʼn wyse met die geweldige diversiteit van mense wat ons pad kruis, om te gaan dat hulle ons as beelddraers van die Christengeloof sal kan eien en in hul lewens sal ag en waardeer. Ons tweede groot uitdaging is om ʼn allernoodsaaklike bydrae tot ander mense se welsyn en lewenskwaliteit te lewer. NG Weltevreden wil daarna streef om te Lewe vir die Stad. Daar is duisende mense wat potensieel deel is van ons stad en die uitdaging aan ons as Christene is om hulle te vind en hulle lewens positief aan te raak. Wat is jou droom vir NG Weltevreden? Ek koester ʼn paar drome, maar ek wil graag een uitspel: Om geag te word as ʼn gemeente wat konkrete vordering maak met die uitlewing van ons vier kernwaardes in die samelewing. Dit beteken dat ons beskou sal word as ʼn groep Christenmense wat: egte verhoudings het en diep vriendskappe ontwikkel met ons lidmate (en nie-lidmate); bekend is vir ons gasvryheid teenoor en akkommodering van alle mense op alle vlakke en in alle gemeentestrukture en by alle geleenthede; mense oor alle generasies in ons bedieninge akkommodeer en tuis laat voel en wat wedersydse begrip vir verskille tussen generasies op ʼn waardige wyse bevorder en deernis het en dit elke dag toon en prakties uitleef teenoor weerloses en noodhebbendes in ons samelewing. Julie 2018 I WELTEWOORD 3
DIE TAAL VAN ONS HART EN SIEL Saret Britz Christo Bezuidenhout orrelis Christo is n baie besondere musikant en beplan ʼn CD om sy 21-jaar in die musiekbedryf te vier. As gevolg van sy sigprobleem was dit nie maklik om sy BMus (Hons) by die Universiteit van die Vrystaat te verwerf nie, omdat hy al die musiekstukke moes memoriseer. Sy eerste pos as orrelis was by die NG Kerk in Moorreesburg, waar hy ook musiekonderrig gegee het. Later was Christo musiekdirekteur by die moedergemeente in Durbanville. By Strand Noord NG Kerk het hy sy passie ontdek om backtracks te maak vir musikante, en sy ander musiektalente ontgin klavier, klawerbord, viool en sang. Vir ons by NG Weltevreden is Christo goud werd want hy is nie net ons orrelis nie, maar ook ons telefonis en ons uitvoerproduk! Hy reël ook vir ons ʼn koorfees en begelei ʼn paar skoolkore in die omgewing. Christo tree gereeld op as gaskunstenaar by glansgeleenthede. Luister gerus mooi na die musiek van KykNet en ander TVproduksies Christo komponeer ʼn hele klomp van hierdie gewilde deuntjies in sy vrye tyd! After silence, that which comes nearest to expressing the inexpressible is music. Ferreira Marais singende, musiekmakende predikant Aldous Huxley Wat maak ʼn mens as jy eintlik musiek wil gaan swot maar jou ouers voel jy moet liewer ʼn bestendige loopbaan volg? Dan gaan voltooi jy maar BSc (IT) by UJ, tot hulle sê jy mag nóú musiek gaan swot by die South African Music Institute in Midrand. En as jy dan voel jy is nog nie reg vir alles wat die wêreld na jou kant toe gooi nie? Dan gaan studeer jy Teologie (by Tukkies) soos jou pa! So het Ferreira se loopbaan as singende, musiekmakende predikant ʼn baie stewige IT- en musiekbasis iets waaroor niemand kla nie! Want as jou grootste passie is om terug te ploeg in jongmense se musiekbelewenis, is daar nie ʼn beter manier as deur die gebruik van slim tegnologie nie! Ferreira het as 14-jarige begin met ghitaarlesse en van 16 af begin musiek maak by kerke. By Constantiakruin het ʼn jeugpredikant hom gevra om die leier van ʼn splinternuwe band te word. As student het hy hom uitgeleef as worship -leier by Mosaïek en die Alberton Lewenssentrum. Musiek het hom as t ware gelei na die bediening en hy was 27 toe hy Teologie begin studeer het by die Universiteit van Pretoria. Intussen was hy vir ses jaar die musiekleier by die Gereformeerde Kerk Linden en het ʼn groot rol gespeel in bewegings soos #Imagine en Ten Days of Hope. Drie van Ferreira se betroubaarste musiekvennote vorm tans saam met hom die groep S1. Hul debuut-cd is in Februarie 2018 by NG Weltevreden vrygestel. Hulle skryf ook reeds aan hul volgende album en ʼn hele paar vertonings word beplan vir die tweede helfte van 2018. Terloops, S1 is die nommer van die kamer wat hulle telkens by eerstejaarskampe moes deel om musiek te maak. Maar vir eers is Ferreira en Carla se babadogtertjie Abi sy heel grootste ondersteuner en met Pappa se stem in haar ore raak sy sommer vinnig rustig. A painter paints pictures on canvas. But musicians paint their pictures on silence Leopold Stokowski Fran Carstens aanddiens-musiekkoördineerder Fran se liefde vir musiek het op die sitkamervloer in haar ouerhuis begin waar sy voor ʼn platespeler gesit en luister het na Tannie Carika se Byeboerwa en David Kramer se Royal Hotel. Sy het baie jonk begin klavierlesse neem en ook op n traporreltjie en klawerbord gespeel voordat haar ouers tevrede was dat sy wel n passie en aanvoeling het en vir haar n regte egte klavier gekoop het. Dit was een van die hoogtepunte in haar jong lewe. In matriek het sy besluit dat dit meer cool sal wees om ghitaar te speel. Haar pa het toe vir haar n klein klassieke ghitaar met nylonsnare gekoop en sy het haarself begin leer. Sy speel tans ook elektriese ghitaar. Fran het opgegroei in Amanzimtoti waar haar ma die 4 WELTEWOORD I Julie 2018
By NG Weltevreden is ons baie ernstig oor hoe musiek ingespan word in ons lofprysing, aanbidding, eredienste en feesvieringe. ʼn Mens kan jou nie indink daarin om kerk toe te kom en nêrens ʼn stukkie musiek te ervaar nie. Ons is baie trots op die bekwame musikante wat hul talente hier met ons deel. Where words fail, music speaks Hans Christian Andersen saakgelastigde van die NG Kerk Suidkusgemeente was. Sy was betrokke by die JKJA en SKJA en het later ook die sang begelei en opgetree as jeugleier. Tieners lê haar steeds na aan die hart. Sy het op ʼn tyd gedink sy wil predikant word en het selfs Teologie begin swot, maar sy sê die Here het ander planne met haar gehad. Fran is tans ʼn besigheidsanalis en webontwikkelaar by RapidStudio, maar is op haar gelukkigste wanneer sy sing of musiek speel en skryf. Sy is in 2012 aangewys as die wenner van die ATKV-Crescendo Kreatief liedjieskryfkompetisie ʼn hoogtepunt in haar musieklewe. Haar ander passie is om gedigte te skryf, wat sy self deesdae toonset. Sy is dankbaar vir haar talent en glo dat sy deur die uitleef daarvan mense se harte aanraak en eer bring aan die Skepper. Fran is ʼn toonbeeld van iemand wat haar passie uitleef en haar drome waar maak. Music is the language of the spirit. It opens the secret of life bringing peace, abolishing strife. Tharien Oosthuizen ensemble-organiseerder Kahlil Gibran Tharien het reeds as klein dogtertjie begin met klavierlesse en later ook vioollesse geneem. In haar matriekjaar het sy die Gr 8 Unisa-musiekeksamen in beide instrumente geslaag. Tydens haar BMus op Potchefstroom het sy ʼn derde instrument naamlik orrel by haar repertoire gevoeg. Die destydse SAUK het haar ʼn beurs aangebied en sy het haar loopbaan by die musiekafdeling van die SAUK begin, waar sy later ook by RSG aangestel is. Na hul troue het sy en Marius ʼn rukkie in die Kaap en ook in Nylstroom gewoon, voordat hulle weer Johannesburg toe getrek het. As musiekonderwyseres aan die Oos-Rand was sy betrokke by die afrigting van skoolkore en het Tharien groot pret gehad met die ontwikkeling van vyf musiekproduksies saam met haar broer en musikale sielsgenoot, Fourie Greyling. Deesdae is sy die musiekopsteller by RSG. As orrelis by NG Weltevreden het Tharien in 2007 die inspirasie gekry om by geleentheid ensemble-uitvoerings aan te bied waar verskillende instrumente tydens die erediens ingespan word. Tans maak die ensemble met meer as 50 instrumentaliste deel uit van die begeleidingspan. Tharien gee steeds vioolles en is betrokke by die Florida simfonie-orkes en die Apple Green Orchestra. Tharien put inspirasie daaruit om haar talente met ander mense te deel en so haar dankbaarheid uit te druk. Music in the soul can be heard by the universe. Gideon Rademeyer musiekkoördineerder: tienuurdiens Lao Tzu As ʼn mens na Gideon se groot glimlag kyk, weet jy sommer hy is onlangs getroud. As ʼn mens na sy fluweelstem luister, kan jy nie glo hy het geen formele musiekopleiding nie. Musiek loop egter stroopsoet in sy are. Sy oupa het in boeremusiekorkeste gespeel en sy pa het gereeld in die huis klavier gespeel. Gideon het van kleintyd af geweet hy wil ʼn musikant wees en toe hy op 15 ʼn ghitaar optel, was dit die begin van groot dinge! Op 23 het hy en ʼn paar vriende ʼn band begin met die vlymskerp naam: Staaldraad. Hulle het regoor die land gespeel en selfs ʼn Huisgenoot Tempo-toekenning gekry vir hul eerste en enigste CD! Op 25 het hy by Constantiakruin-gemeente begin speel en later hier by NG Weltevreden waar hy seker maak dat die musiekkoördinering van die tienuurdiens vlot verloop. Gideon is eintlik ʼn opgeleide rekenaarprogrammeerder. Hy reken dit is nie veel anders as om musiek te maak nie, want beide verg besondere kreatiwiteit. Hy het in 2001 die Rhema Bible School Creative Ministry Diploma gedoen en dit opgevolg met ʼn diploma in Javaprogrammering. Hy bestuur tans sy eie sagtewaremaatskappy. Musiek is deel van sy DNA en hy is altyd reg om musiek te maak. Hy speel ghitaar, basghitaar, sing, speel klavier en dromme! In sy vrye tyd maak hy musiek wat hy tuis opneem en leef so sy kreatiewe kant uit. Gideon is ons eie IT-musiekboffin! Hier by NG Weltevreden glo ons musiek is ʼn genadegawe dit voed die siel. God het ons musikante aangeraak met ʼn besondere talent en hierdie mense deel hul gawes met ons. Baie dankie ook aan elkeen in die gemeente wat saam sing, saam luister en saam waardeer! Julie 2018 I WELTEWOORD 5
Mosambiek-uitreik 2018 - Geseënd deur ander te seën As jy ʼn stadsjapie uit die stad uit neem, is dit omtrent so vreesaanjaend as wanneer jy ʼn plaasjapie stad toe bring. Die donkerte druk jou vas, daar is geen stadsliggies nie, jy hoor vreemde naggeluide en dan weet jy: Mosambiek, hier is ek. Daar is nou nie meer omdraaikans nie. Ek het gedink net ek was benoud terwyl die ander mense almal oënskynlik opgewonde was. Maar ander lede van die span was bekommerd oor ander dinge, weet ek nou. Henk Myburgh, die organiseerder van NG Weltevreden se jaarlikse Mosambiek-uitreik saam met Mozaic Trust, moes sorg vir die logistieke reëlings om 34 mense veilig oor die grens tot by ons bestemming te kry, hul mae vol te kry en ook seker te maak dat die projekte betyds afgehandel word. Henk som die 2018-uitreik van 26 April tot 5 Mei in drie woorde op: Uitdagings, verwagting en dankbaarheid. Uitdagings soos om kop te hou te midde van al die reëlings; geen elektrisiteit, geen lopende water, stories van padblokkades, om minderjariges sonder hul ouers oor landsgrense te vervoer; malaria... Jy kom tot net een slotsom ons gaan Mosambiek toe in geloof, met God se hand van beskerming oor hierdie groep en mense wat vir ons bid. ʼn Mens ervaar weer dat gee altyd beter is as ontvang en besef dankbaar dat hierdie uitreik werklik ʼn verskil maak in die gemeenskap van gelowiges; nie net in die harte van die Mosambiek-mense nie, maar beslis ook in ons harte. Maar meer as enigiets, sê Henk, is dit kosbaar om te weet dat jy vir tien dae lank die hande en voete van Jesus is. Die uitreik is geestelik vervullend en gee meer vir elkeen wat betrokke is as vir hulle wat ontvang. Elkeen in die span het ʼn spesiale rol vervul deur die Heilige Gees toe te laat om leiding te neem en deur hulle te werk. Ek het stilweg onderneem om van die ervarings te kom vertel dit sluit ʼn jong student in met ʼn babatjie op die heup sodat die mamma saam met ons vroue kon aanbid; die spontane hand van ʼn twaalfjarige op die skouer van ʼn bejaarde Mosambiekman wat knielend vra dat daar vir hom gebid word; die woordelose verstaan by ʼn gereedskapskissie van ʼn versoek vir ʼn preekstoel in die kerk; glimlagte op die vroue se gesigte as daar vertel word dat hulle kosbaar is in die oë van God; en kinders wat jillend en gillend vir die eerste keer in hul lewe ʼn wipplank ervaar. Dit laat ʼn mens besef dat jy vir ʼn oomblik deel was van iets onbeskryflik moois. Ja, ons het ʼn groot impak gehad op die klein village van Mawayela, 60 km noord van Manjacaze. Ons kon die te-doen Saret Britz lysie afmerk, maar die impak wat die uitreik op óns gehad het, was soveel meer! Baie dankie vir julle wat ons so by alles ingetrek het, dit was awesome! Dit was ʼn eye opener nou besef mens wat jy het om voor dankbaar te wees net minder kla oor nietighede! As ons gespaar word en die gesondheid hou, maak ons weer so. Ons dank die Vader dat ons die geleentheid gehad het. Pieter en Bokkie Diedericks The Moz Outreach exceeded my every expectation. My sense of fulfilment was great and the look of happiness on the faces of the Mawayela people all the reward I needed. Also the consideration that you and others gave me as an English speaker was incredible and I will be forever grateful. Thank you and I look forward to the next time we meet. Alan Cleary Woorde wat by my opkom is goedheid en guns van die Here. Dit was vir my ʼn voorreg om by vroue, kinderbediening en kerkbou betrokke te wees. Mens sien die krag van die Here in die vroue van Mosambiek, in moeilike omstandighede geniet hul steeds die gemeenskap met vrouegelowiges. Dit was anders as ander jare omdat daar meer as dubbel soveel mense was. Dit was ʼn awesome ervaring vir my! Karmien Myburgh Om ander se opgewondenheid te sien wanneer spanlede deel is van iets groters; die opregte dankbaarheid van wildvreemde mense en om te sien en besef ek ontvang meer as wat ek kan verstaan, het my met trane laat besef hoe baie ons het om voor dankbaar te wees. Dankie vir almal se betrokkenheid, hoe klein of groot ook al! Dankie Jesus! Henk Myburgh Die mense van Mawayela was ʼn sprekende voorbeeld van mense wat hul onvoorwaardelike vertroue in die Here stel. Hul storie is een van hoop. Die uitreik is ʼn herinnering wat ek vir ewig sal koester. Nog nooit het ek so blessed gevoel al moes ek ʼn blessing wees nie. Dis ʼn voorreg om myself ʼn gemeentelid van NG Weltevreden te noem! My verlof is klaar ingesit om in 2019 weer te gaan! Marijke du Plessis 6 WELTEWOORD I Julie 2018
Ferreira Marais ʼn Groep jongmense van NG Weltevreden het weer vanjaar die middestad en die koue aangedurf. Die dag het vroeg begin toe ons vyfuur hier van die kerk af gery het. Ons het ʼn vinnige inligtingsessie gehad en toe oor die dag se program gesels. Na ʼn heerlike ontbyt het ons die dag met Bybelstudie en lofprysing begin. Vir die uitreik het die span die oggend saam met die studente- en MES-spanne mense se aandag by ʼn besige winkelsentrum probeer trek. Die MES-span het lewendige danse en ʼn opvoering uitgevoer op ʼn oop stuk voor die winkels. Na die danse het Ike, een van MES se studenteleiers, die evangelie van Jesus Christus deur middel van ʼn sketsbord uitgebeeld. Die toeskouers is genooi om Jesus as hul verlosser aan te neem en drie mense het na vore gekom. Die span het toe die geleentheid gehad om met die mense daar te gesels, saam met hulle te bid en ook net rond te kyk na ʼn baie bedrywige stad. Na ʼn heerlike middagete het die span ʼn klomp werk gekry om te doen. Stoele is herstel en bordspeletjies geverf vir die kinderbediening. Ons jongmense staan glad nie terug as dit by werk met hul hande kom nie! Later die middag het ons lekker sokker, pool en tafeltennis gespeel. Na aandete is ons span op ʼn sop-uitreik, waar ons sop help uitdeel het in Newtown onder die M1 brug, naby Carrstraat en ook by Hope Hill in Berea. Ons kan baie trots wees op ons jongmense wat so passievol en onselfsugtig van hulle tyd en liefde uitdeel. Sien julle weer volgende jaar by 10 Days of HOPE! #LivingTheLegacy Tanya Krause Nelson Mandela sou op 18 Julie 2018 100 jaar oud gewees het. Op Mandeladag word daar van ons almal gevra om ons harte oop te maak en iets goeds te doen vir mense in nood. Hierdie jaar het ons meer as 300 beanies, 180 serpe, 30 pare handskoene en 100 pare oorverwarmers (ear muffs) van gemeentelede ontvang. Ons het dit op Mandela-dag uitgedeel saam met sop, broodjies, advertensiebordslaapsakke en komberse. Ek weet nie wie se harte die warmste geklop het nie; dié wat ontvang het of dié wat gegee het! Dankie aan almal wat gehelp brei of hekel het, die dames wat op ʼn koue wintersoggend gehelp het met die uitdeel en die personeel wat seker gemaak het dat alles gereed was vir die oggend se verrigtinge. Mag Madiba se nalatenskap ons almal inspireer om ons harte en hande oop te maak vir dié wat minder as ons het en elke dag van die jaar te lewe vir die stad, soos Jesus van ons verwag! Julie 2018 I WELTEWOORD 7
Ilze de Villiers Pretweek 2018 het afgeskop met die koudste weer denkbaar en sommer reën ook. Maar die span tieners en helpers was op hul pos en baie vinnig het ons uitgevind dat kinders glad nie bang is vir koue weer nie! Soos altyd was ons borge briljant. Met Superspar Eagle Canyon se heerlike kos, en onder andere Tjokopaint as borg vir kreatiewe aktiwiteite asook Braam se Springkastele, sal hierdie jaar nog lank onthou word. Borge wat graag anoniem wil bly, word genooi om op die foto s na die vreugde op die kinders se gesigte te kyk. Baie dankie aan een en elkeen wat bygedra het om hierdie jaar so ʼn groot sukses te maak! Ons tieners het die naweek voor Pretweek mekaar ʼn bietjie leer ken en riglyne oor leierskap gekry. Dewald het geleer hoe om met die megafoon te werk en skielik was alles duideliker: Briljantjie, musical chairs, buite speel of eet. Die tieners het leiding geneem en volledig verantwoordelikheid aanvaar. Wat ʼn ongelooflike voorreg om met sulke oulike kinders te kon saamwerk! Die kombuisspan was soggens vroeg reeds gereed in die kombuis. Hierdie Pretweek sal onthou kan word as Briljant, en nie net vir die kinders se gunsteling dansliedjie Briljantjie nie! Die kinders het al die aktiwiteite baie geniet en ook baie geleer. Die kinders kon hope drukkies en aandag kry en stil kinders het ontpop. Tannie Alda was op haar pos met raad wanneer nodig. Oom Neil was ook kort-kort daar en so ook oom Terry, vir wie die kinders baie lief geword het. Die tieners het baie mooi na die kinders omgesien en daar was geen mediese krisisse nie. Die spane in die kombuis het gesorg dat die kos betyds gereed was en niemand het ooit honger huis toe gegaan nie! ʼn Groot dankie aan René, Christa, Zelda en Christelle wat die wiele laat draai het. Ons het reeds begin beplan aan Pretweek 2019 iets om na uit te sien! 8 WELTEWOORD I Julie 2018 Grafies versorg en gedruk deur On Demand Design & Imaging I 011 285 2060 Dankie Maretha Gous vir die taalversorging.